நான் கடவுளால்தான் படைக்கப்பட்டேனா?

நான் கடவுளால்தான் படைக்கப்பட்டேனா?

கடவுள் இவ்வுலகத்தை படைத்தார்.இதில் எவ்வித மாற்று கருத்தும் இல்லை.நாம் வாழும் இந்நிலப்பகுதி மட்டுமல்ல,இந்நிலப்பகுதியை  உள்ளடக்கிய, மாபெரும், கற்பனைகளுக்கு எட்டாத அளவுக்கு விரிந்து பரந்த பிரபஞ்சத்தையும் கூட கடவுள்தான் படைத்தார் என்பதிலும் மாற்றுக்கருத்துக்கு இடமில்லை.ஆனால் பரந்து  விரிந்த இவ்வுலகத்தில் வாழும் நான் அக்கடவுளால்தான் படைக்கப்பட்டேனா? இன்று உலகத்தில் இருக்கும் அனைத்தும் கடவுளால் படைக்கப்பட்டவைகளின் சந்ததியே அன்றி கடவுளால் படைக்கப்பட்டவர்கள் அல்ல என்பது எனது கருத்தாக உள்ளது.இவ்வாறு நினைப்பதற்கு நான் தூண்டப்பட்டேன்.

கடவுளால் படைக்கப்பட்ட அனைத்தும் மிக நன்றாக இருந்திருக்க வேண்டும்.அதை கடவுளே உறுதிப்படுத்தியும் இருக்கிறார்.

10 கடவுள் உலர்ந்த தரைக்கு நிலம் என்றும் ஒன்றுதிரண்ட நீருக்குக் கடல் என்றும் பெயரிட்டார். கடவுள் அது நல்லது என்று கண்டார்.[தொ.நூல் 1:10]

10. தேவன் வெட்டாந்தரைக்குப் பூமி என்றும், சேர்ந்த ஜலத்திற்குச் சமுத்திரம் என்றும் பேரிட்டார்; தேவன் அது நல்லது என்று கண்டார்.[ஆதி 1:10]

அவைகள் நன்றாக இருக்கிறது என்று உறுதிப்படுத்திய பின்னரே நமக்கு அவர் அளித்திருக்கிறார்.கூடவே அவர் கூறிய செயல்தான் இங்கு கூர்ந்து கவனிக்கப்பட வேண்டியதாக உள்ளது.அவர் கீழ்வருமாறு கூறுகிறார்,

11 அப்பொழுது கடவுள், “புற்பூண்டுகளையும் விதை தரும் செடிகளையும், கனி தரும் பழமரங்களையும் அந்த அந்த இனத்தின்படியே நிலம் விளைவிக்கட்டும்” என்றார். அது அவ்வாறே ஆயிற்று.

11. அப்பொழுது தேவன்: பூமியானது புல்லையும், விதையைப் பிறப்பிக்கும் பூண்டுகளையும், பூமியின்மேல் தங்களில் தங்கள் விதையையுடைய கனிகளைத் தங்கள் தங்கள் ஜாதியின்படியே கொடுக்கும் கனிவிருட்சங்களையும் முளைப்பிக்கக்கடவது என்றார்; அது அப்படியே ஆயிற்று.

அதாவது  விதைகளை கொடுக்க கூடிய மரங்கள் உண்டாக வேண்டும் என்றும் அவ்விதைகளை மூலம் மறுபடியும் அம்மரத்தின் சந்ததி தோன்றும் படியும் செய்து விட்டார்.இனிமேல் இச்செயல் எப்படி நடைபெற வேண்டும் என்று அவர் முடிவு செய்து, முதல் மரங்களை உருவாக்குகிறார்.அவைகள் இனிமேல் கடவுள் ஆணையிட்டபடியே தொடர்ந்து செயல்படும்.அதாவது கனிகள்,விதைகள்,மறுபடியும் மரங்கள் என்று ஒரு சுழற்சி நடைபெற்றுக்கொண்டு இருக்கும்.

இன்றும், அவருடைய செயல் முறையின் படி நடைபெற்றுக் கொண்டிருக்கும் மரங்களின் செயல்பாடு  நன்றாகவே உள்ளது.என்று மனிதனால் அதற்கு இடையூறு ஏற்பட்டதோ அன்றே தரம் குறைந்து விட்டது.மரம்,கனிகள்,விதைகள்,மறுபடியும் மரம் என்று இல்லாமல், செயற்கை முறையில் செடிகளை உண்டு பண்ண ஆரம்பித்தான். மனிதனுடைய இந்த அறிவு ஆரம்பத்தில் கொண்டாடப்பட்டது.கடவுளின் செயலில் மனிதன் மாற்றம் ஏற்படுத்தினான்.தொடக்கத்தில் அற்புதம் என்று புகழப்பட்ட இச்செயலின் தீமைகள் இன்று வெளியே வர ஆரம்பித்து விட்டன.சீக்கிரமாக வளர,செழித்து வளர,அதிக மகசூல் தர என்று பலவித செயல்களுக்காக மருந்துகள் கண்டுபிடித்தான்.அதின் தீமைகள் இன்று வெளியே வந்துவிட்டன.இயற்கையாக இருக்கும் அனைத்தும் இன்றும் நன்றாகவே இருக்கிறது.

செயற்கை முறையில் உற்பத்தியாகும் அனைத்தும் தீமைகளை கொண்டிருக்கின்றன.கடவுளின் படைப்பு மட்டுமே நன்றாக இன்னும் உள்ளது.இன்று,சிறிது சிறிதாக மக்கள் இதனை உணர்ந்து கொண்டே வருகின்றனர்.

எனவேதான் ஒரு முடிவுக்கு வரவேண்டியுள்ளது.இன்று நாம் காணும் அனைத்தும் கடவுளால் படைக்கப்பட்டது என்று நம்ப முடியவில்லை.தான் படைத்த அனைத்தும் நன்றாகவே இருக்கிறது என்று அவரே சரிபார்த்து இருக்கிறார். "நன்றாக இல்லாத ஒன்று" எப்படி அவரால் படைக்கப்பட்டிருக்கும்? சீமைப்பசுவின் பால் நன்றாக இல்லை என்பது இன்று கண்டறியப்பட்ட ஒன்று.அப்பசுவானது செயற்கை தன்மைகளை கொண்டிருக்கிறது.மனிதனின் அறிவு அதற்குள் உள்ளது.எனவே அது "நன்றாக இல்லை".இந்த சீமைப்பசுவின் சந்ததி எப்படி கடவுளால் படைக்கப்பட்டது என்று கூறமுடியும்?அதுபோன்றுதான் மனிதனின் கதையும் உள்ளது என்று நான் கருதுகிறேன்.

ஆரம்பத்தில் மனிதனை கடவுள் படைத்தார்.அதற்க்கு முன்னால் விலங்குகளை படைத்தார்.இந்த இருவரிடமும் அவர் ஒரு செயலை செய்யுமாறு கூறுகிறார்.அது என்ன?

28 கடவுள் அவர்களுக்கு ஆசி வழங்கி, “பலுகிப் பெருகி மண்ணுலகை நிரப்புங்கள்; அதை உங்கள் ஆற்றலுக்கு உட்படுத்துங்கள்; கடல் மீன்கள், வானத்துப் பறவைகள், நிலத்தில் ஊர்ந்து உயிர் வாழ்வன அனைத்தையும் ஆளுங்கள்” என்றார்.[தொ.நூல் 1:28]

28. பின்பு தேவன் அவர்களை நோக்கி: நீங்கள் பலுகிப் பெருகி, பூமியை நிரப்பி, அதைக் கீழ்ப்படுத்தி, சமுத்திரத்தின் மச்சங்களையும் ஆகாயத்துப் பறவைகளையும், பூமியின்மேல் நடமாடுகிற சகல ஜீவஜந்துக்களையும் ஆண்டுகொள்ளுங்கள் என்று சொல்லி, தேவன் அவர்களை ஆசீர்வதித்தார்.[ஆதி 1:28]

அது என்ன செயல்? "பல்கி பெருகுதல்",இதுதான் அச்செயல்.இதைத்தான் கடவுள் மனிதர்களிடம் செய்ய சொல்லியிருக்கிறார்.வேறு எதையும் அவர் கூறவில்லை.பல்கி பெருகுதல் மட்டுமே அவர்கள் வேலை.சரி எப்படி பல்கி பெறுக முடியும்? அதைப்பற்றி கடவுள் எதையும் கூறவில்லையே? மனிதர்களிலும்,விலங்குகளிலும் பல்கி பெருக்குதல் என்பது "இனப்பெருக்கம்" ஆகும்.இனப்பெருக்கத்திற்காக கடவுள் அற்புதமான ஒரு குணத்தை நமக்கும் விலங்குகளுக்கும் தந்திருக்கிறார்.ஆணுக்கும் பெண்ணுக்கும் இடையே வருகின்ற ஒரு "ஈர்ப்பு" இனப்பெருக்கத்திற்கு அடிப்படையாக அமைகிறது.

"ஒரு ஆணுக்கு ஒரு பெண்" என்ற கொள்கை மூலம் பல்கி பெருகுதல் சாத்தியம் இல்லை.ஒரு ஆன் பல பெண்களை மனம் செய்து கொண்டால் மட்டுமே இது சாத்தியம்.கடவுள் ஆண் மகனை அவ்வாறே படைத்திருக்கிறார்."ஒருவனுக்கு ஒருத்தி" கொள்கை மூலம் மனித இனம் பல்கி பெருகியிருக்க முடியாது.ஒரு நல்ல ஆன் மகனின் ஆண்மை வீணாக்கப்படும்  என்பதே எனது கருத்து.ஒரு இளங்காளையை ஒரு பசுவிற்கு மட்டும் என நாம் வைத்துக்கொண்டால் மாடு இனம் எவ்வாறு பெருகும்?அந்த இளங்காளை  வீணடிக்கப்படுகிறது என்றுதானே பொருள்?படைப்பின் கருத்து இது அல்லவே!

ஒரு நல்ல ஆண்மகனையும் ஒரு நல்ல பெண் மகளையும் கடவுள் படைத்திருக்க வேண்டும்.அவர்கள் மூலம் "பல்கி பெருகுதல்" ஆரம்பித்து இருக்க வேண்டும்.இவ்வளவு நாள் ஆகி விட்டது.கடவுள் படைத்த "அதே ஆண்மகன்" இன்று இருக்கிறானா? கடவுளால் படைக்கப்பட்ட "அதே பெண்மகள்"  இன்று இருக்கிறாளா?இக்கேள்வி ஏன் எழுகிறது?இன்றைய சூழ்நிலை இக்கேள்விக்கு என்னை தள்ளுகிறது.

ஒரு நல்ல ஆண்மகன் என்பதற்கு என்ன அடையாளம்?அதுபோன்று ஒரு நல்ல பெண்மகள் என்பதற்கு என்ன அடையாளம்? இதற்கு பதில் "பல்கி பெருகுதல்" செயலில்தான் உள்ளது.இச்செயலுக்காண அடிப்படை தேவை "ஈர்ப்பு" ஆகும்.ஆணுக்கு பெண்ணின் மீதும்,பெண்ணிற்கு ஆணின் மீதும்  ஈர்ப்பு வர வேண்டும்.ஒரு இளங்காளை உள்ளது என்று நினைத்துக் கொள்ளுங்கள்.இந்த காளைக்கு "வீரியம்" ஏற்படும் போது  அதற்கு ஒரு பசு இல்லையென்றால் என்ன நடக்கும்? மிக மோசமான விளைவுகள் ஏற்படும்."உயிர் சுழற்சி" பாதிக்கப்படும்.மனிதனானவன்  காளையின்  இச்செயலை நம்பியிருக்கிறான்.எனவே ஒரு இளங்காளைக்கு ஒரு பசு அல்ல ,பல பசுக்கள் தேவைப்படும்.அதன் "வீரியத்துக்கு" ஈடுகொடுக்க அதற்கு பசுக்கள் இல்லையென்றால் விபரீதமான விளைவுகளுக்கு நாம் செல்ல வேண்டியிருக்கும்.அக்காளைக்கு "அந்த வீரியத்தை" கொடுத்தது யார்? சந்தேகமே இல்லை,அது கடவுள்.அது போன்றுதான் மனிதனும்.

ஒரு ஆண்  மகனுக்கும் "வீரியம்" இயற்கையாகவே உள்ளது.அது கடவுள் படைப்பு.இதன் விளைவு, பெண்ணின் மீதான "ஈர்ப்பு". எனவே அவன் ஒரு பெண்ணை தேடுகிறான், தன் வீரியத்தின் தாகத்தை  தனிக்கிறான்.இது கடவுளின் செயல்.எனவே "பல்கி பெருகுவதற்கு" பெண்கள் தேவை.பெண்களின் படைப்பும் அதற்கு ஏற்றாற்போலவே உள்ளது.ஒரு வீரியம் மிக்க ஆண் ஒரு பெண்ணை மட்டுமே மனம் கொள்ள வேண்டும் என்று கொண்டால்,அவனுடைய வீரியத்தின் தாக்கம் அப்பெண்ணின் மீது அதிகமாக இருக்கும்.பெண்ணின் உடலமைப்பு அதற்க்கேற்றாற்போல் இல்லை,அப்படி படைக்கப்படவும் இல்லை.எனவே அவளால் அவனுக்கு ஈடுகொடுக்க இயலாது.ஒருவேளை அவள் இறந்து போகவும் வாய்ப்பு உள்ளது.எனவேதான் அவனுக்கு பல பெண்கள் தேவைப்படுகிறது.இது பெண்களுக்கு பாதுகாப்பும் கூட.இவை அனைத்தும் "ஒரு நல்ல ஆண் மகனுக்கு" மட்டுமே பொருந்தும்.கடவுள் முதன்முதலில் படைத்த ஆண்  மகன் இப்படியே இருந்திருக்க வேண்டும்.இல்லையென்றால் "பல்கிப்பெருகுதல்" நடைபெற்றிருக்காது.

ஒரு நல்ல ஆண் மகன் என்பவன் முழுவதும் ஆண்மைத்தன்மை கொண்டவன் மட்டுமே.அழகு சார்ந்து ஆண்மை  தன்மையை விவரிக்க முடியாது.

இப்பொழுது,ஏன் இக்கட்டுரையை எழுதுகிறேன் என்பதற்கு வருகிறேன்.அந்த முதலில் படைத்த "ஆண் மகன்" போன்றே இன்றைய அனைத்து ஆண் மகன்களும் இருக்கின்றனரா? அது போன்றே முதலில் படைக்கப்பட்ட "அந்த பெண் மகள்" போன்றே இன்றைய அணைத்து "பெண் மகள்களும்" உள்ளனரா?

ஆண் மகனுக்கு இலக்கணம்,அவனுடைய ஈர்ப்பு "பல்கி பெருகுதலை" நடப்பிக்கும் ஒன்றாக இருக்க வேண்டும்.அது போன்றுதான் பெண் மகளுடையதும்.இதிலிருந்து வழி விலகியிருந்தால் அது கடவுளின் செயலை,அதாவது பல்கிப்பெருகுதலை, நடப்பிப்பதாக  இருக்குமா? இன்று அனைவரும் அவ்வாறுதான் இருக்கிறோமா? இல்லை என்ற பதில்தான் உள்ளது.அப்படியென்றால் இன்றைய அனைவரும் கடவுளின் படைப்புதானா? அவர் எப்படி தன்னுடைய வார்த்தையிலிருந்து விலகுவார்? இன்று உலகத்தில் இருக்கும் ஒவ்வொருவரையும் அவர்தான் படைத்தார் எனில்,

• ஓரின சேர்க்கையாளர்களையும் அவர்தான் படைத்தாரா?
• விபச்சாரர்களையும் அவர்தான் படைத்தாரா?

ஏன் இக்கட்டுரை:

இக்கேள்விக்கு என்ன பதிலை கூற முடியும்?ஒரு மாணவனின் அழுகை என்னை இக்கேள்விகளுக்குள்  என்னை தள்ளியது.மாணவன் ஒருவன் ஒரு சிறு தவறை செய்து  வந்தான். [தாமதம்தான் அவன் தவறு].அவன் பல முறை இதே தவறை செய்திருக்கிறான்.ஆனால்,அச்சிறுவன் மிக ஒழுக்கமானவன். ஆசிரியர்களுக்கு கீழ்ப்படிபவன்.அவனை அழைத்து என்னிடம் கொண்டு வந்து விட்டார்கள்.அவனுடைய பெற்றோர்களுக்கு தொலைபேசியில் அழைத்து விசாரித்தபொழுது அவனை அடிக்க சொன்னார்கள்.இதை அவனிடம் சொன்னபொழுது,அவன் தேம்பி அழுதான்.

அவனை யாரும் விரும்புவதில்லை என்று கூறினான்.அவனை கூர்ந்து கவனித்ததில்,அவனுடைய செய்கைகள் "ஒரு ஆண்  மகனுக்ககுறியத்திலிருந்து சற்று விலகியிருந்தது.இது அவனை கேலிப்பொருளாக ஆக்கி இருந்தது."இவனை கடவுள்தான் படைத்தாரா? என்பதுதான் என் கேள்வி.இவனுடைய எதிர்காலம் எப்படி இருக்கும் என்று எனக்கு மிக வருத்தமாக இருந்தது.இன்றைய மனிதர்களை கடவுள்தான் படைத்திட்டார் எனில் இவனையும் அவர்தான் படைத்திருக்க வேண்டும்.என்னையும் அவர்தான் படைத்திருக்க வேண்டும்.இவன், "தன்னுடைய கட்டுப்பாட்டில் இல்லாத ஒரு செயல்" மூலம் கடவுளிடம் தண்டனை வாங்கினால்,அது எப்படி என்று என்னால் புரிந்து கொள்ள முடிய வில்லை.

ஒருவனுடைய வெளிப்புற செயல்பாடுகள் அவன் எந்த அளவு ஆண்மைத்தன்மை கொண்டிருக்கிறான் என்பதை வெளிப்படுத்துகிறது. தன்னுடைய "ஆண்  தன்மை குறைவு" பிறப்பிலேயே உள்ளது எனில் இதன் விளைவாக ஏற்படும் பாலியல் குற்றங்களுக்கு அவன் எப்படி பொறுப்பாக முடியும்?இவனுடைய பிறப்பை கடவுள்தான் தீர்மானித்தார் எனில் இவனால் எப்படி அதிலிருந்து மீள முடியும்?ஆனால் இச்செயலுக்கு கடவுள் தண்டனை அறிவித்திருக்கிறார்.ஒருவனை, தான்  அருவருக்கும் செயல்களை விரும்பும் மனநிலையில் கடவுளே படைத்து,பின்னர் அச்செயல்களின் காரணமாக அவனுக்கு தண்டனை அளித்தால் அதனை எப்படி நம்மால் விளக்க முடியும்?இது போன்று எண்ணற்ற சிறுவர்களையும்,இளைஞர்களையும் இன்று நம்மால் காண முடியும்.

இதுபோன்ற  இளைஞர்களின்  கேள்வி எப்படி இருக்கும்?  கடவுளால்தான் படைக்கப்பட்டேனா? அவ்வாறு நான் அவரால்தான் படைக்கப்பட்டேன் என்றால் அருவருக்கும் சிந்தனைகள் என் மனதில் தோன்றுவது எப்படி?அச்சிந்தனைகளை நான் விரும்புவது எப்படி?என்னைப்போல் படைக்கப்பட்ட மற்றொருவர் அச்சிந்தனைகளை வெறுக்க முடிந்தது என்றால் என்னால் முடியாமல் போனது எப்படி?என்னால் முடியாமல் போனதற்கு என்னுடைய இயலாமை காரணம் என்றால் நான் எப்படி பொறுப்பாளி ஆவது?என்னுடைய இயலாமைக்கு யார் அல்லது எது காரணம்?ஒருவருக்கு இம்மாதிரியான சிந்தனைகள் தோன்றவே இல்லை என்றால் எனக்கு ஏன் தோன்றியது?

கடவுள் தடை செய்த செயல்களில் சில அடுத்தவர் மனைவியை அபகரிப்பது,ஓரின சேர்க்கை போன்றவைகள் ஆகும்.சிறு வயதில் நான் எப்படி இருந்தேன் என்பதை நினைத்துப்பார்க்கும் பொழுது இம்மாதிரியான எண்ணங்கள் இருந்ததே இல்லை.வயது ஆக ஆக இம்மாதிரியான எண்ணங்கள் தோன்ற ஆரம்பித்தன.இது எப்படி?என்னைப்போல் இருக்கும் ஒருவருக்கு இந்த எண்ணங்கள் இல்லை.எனக்கு எப்படி வந்தது?அனைவரும்தான் குழந்தைப்பருவதை கடந்து,விடலைப்பருவத்தை தாண்டி,முழு மனிதனாக மாறுகின்றனர்.தடை செய்ய பட்ட செயல்களை செய்ய வேண்டும் என்ற உந்துதல் எல்லோருக்கும் வருவதாக நாம் எண்ணினால்,அந்த எல்லோரும் அச்செயல்களை செய்வது இல்லை.பலர் செய்கின்றனர்,பலர் செய்வதில்லை.செய்யாமல் இருப்பவர்கள் அனைவரும் எப்படி தங்களை கட்டுப்படுத்திக்கொண்டனர்.செய்யக்கூடாது என்ற வலிமையான எண்ணம் எப்படி அவர்களுக்கு வந்தது?யார் அவர்களுக்குள் அந்த வலிமையை வைத்தது?செய்தவர்களுக்கு அந்த வலிமை இல்லாமல் போனது எப்படி?

செய்யக்கூடாது என்று நினைத்தும் தங்களை கட்டுப்படுத்த முடியாமல் அச்செயல்களை சிலர் செய்விடுகின்றனர்.இதற்கு என்ன காரணம்.ஓரின சேர்க்கை எனக்கு பிடிக்காது என்று பலர் கூறுகின்றனர்.இயற்கையாகவே அவர்களுக்கு பிடிக்காமல் போனது எப்படி?வேறு சிலருக்கு இயற்கையாகவே அதில் நாட்டம் வருகிறதே அது எப்படி?இதை நான் செய்யக்கூடாது என்று நினைக்கிறேன்,ஆனால் என்னை கட்டுப்படுத்த முடியாமல் அதில் ஈடுபட்டு விடுகின்றேன்,அது எப்படி? என்னை நான் கட்டுப்படுத்தமுடியாமல் போனதற்கு எது காரணம்? மற்றொருவர் தன்னை கட்டுப்படுத்தியதற்கு எது காரணம்? அந்த எண்ணங்கள் இயற்கையாகவே உள்ளவர்களுக்கும்,இயற்கையாகவே இல்லாதவர்களுக்கும் இடையே ஒரு சமமான போட்டி இல்லையே.இருவருக்கும் அம்மாதிரியான எண்ணங்கள் இருந்து பின்னர் யார் செய்யாமல் இருக்கிறார்களோ அவர்தான் தன்  கெட்ட  எண்ணங்களை வென்றவர் என்று கூற முடியும்.இயற்கையாகவே,அதாவது பிறப்பிலேயே ஒருவருக்கு கூடுதல் பலமும்,மற்றொருவருக்கு குறைந்த பலமும் கொடுக்கபட்டிருந்ததே அதற்க்கு யார் காரணம்?

இதற்கு கடவுள்தான் காரணம் என்றால் அதில் நியாயம் இல்லையே.ஒருவருக்கு கூடுதல் பலத்தை கொடுத்துவிட்டு,தோற்றவனை தண்டிப்பது எப்படி சரியாகும்?நான் தாழ்ந்த  வகுப்பில் பிறந்ததற்கு கடவுள் காரணமா? மற்றவர் உயர்ந்த வகுப்பில் பிறந்ததற்கும் கடவுள்தான் காரணமா?இது எப்படி சரியாகும்?என் பெற்றோர்கள் ஏழையாக இருந்த காரணத்தினால் நானும் ஏழையாக பிறந்திருக்கிறேன்.என் பெற்றோர்களே என் ஏழ்மைக்கு காரணம்.ஆனால் என் ஏழ்மை நிலை மாறலாம்.

எனவே என் படைப்பிற்கு காரணம் கடவுள் அல்ல என்ற முடிவுக்கு வரவேண்டி உள்ளது.காரணம் என்னைப் போன்ற ஒரு ஒருவனை கடவுள் படைத்து விட்டு பிறகு என் அசிங்கமான  செயல்களின் காரணமாக என்னை தண்டிப்பது என்பது சரி என்று தோன்றவில்லை.எனக்கு அவர் நல்ல எண்ணங்களை படைத்திருந்தால் நான் அருவருக்கக்கூடிய செயல்களை செய்திருக்க மாட்டேன்.இந்த வயதில் இம்மாதிரியான அசிங்கமான மற்றும் அருவருக்கும் எண்ணங்கள் எல்லோருக்கும் தோன்றுவதில்லை என்பதுதான் இங்கு கவனிக்க வேண்டிய தகவல்.ஒருவருக்கு கெட்ட மற்றும் அருவருக்கும் செயல்களை எதிர்க்கும் வலிமை உள்ளது மற்றவருக்கு அந்த வலிமை இல்லை.

இதை எவ்வாறு பார்க்கலாம் என்றால்,கடவுள் மனிதனை படைத்தார்.அவர்களிடம்  பல்கி பெறுக சொன்னார்.பல்கி பெருகுவது எப்படி நடைபெற வேண்டும் என்பதை அவனுக்குள், அவனுக்கு தெரியாமலே அவனுள் அது இயற்கையாகவே இருக்குமாறு செய்திருக்கிறார். ஒரு குறிப்பிட்ட வேலை குறிப்பிட்ட விதத்தில் நடைபெறுமாறு செய்திருக்கிறார்.நடைபெறும்பொழுது அவர் இடைபடுவது இல்லை என்றே நமக்கு  தோன்றுகிறது.அவ்வாறு அவர் இடைப்பட்டால் ஒருவருக்கு சாதகமாகவும் மற்றொருவருக்கு பாதகமாகவும் நடைபெற்றது போல் ஆகிவிடுகிறது.அதாவது ஓரின சேர்க்கை எண்ணங்கள் இல்லாதவர் வலிமை உள்ளவர்  என்றும் மற்றவர் வலிமை இல்லாதவர் என்றும் ஆகி விடுகிறது.ஒழுங்குபடுத்தப்பட்ட ஒரு செயல்முறை போன்று மனிதன் பல்கி பெருக்குதல் நடைபெற்று கொண்டிருக்கிறது.அவர் நினைத்தவாறு வெளிவராத பொருட்களை தூக்கி எறிந்து  விடுகிறார். நல்ல பொருட்களை வைத்துக்கொள்கிறார்,பக்கத்தில் காட்டப்பட்டுள்ள படத்தைப் போன்று.அவர் மேலேயிருந்து பார்த்துக்கொண்டு இருக்கிறார்.தன்னுடைய செயல்முறையின்படி நடக்கும் அனைத்தையும் அவர் கூட்டி சேர்க்கிறார்,அப்படி இல்லாமல் வழிதவறி வருபவைகளை தூர எரிந்து விடுகிறார்.அவருக்கு அது தேவை இல்லை.

எனவே நான் படைக்கப்பட்டது என் பெற்றோர்களால்.பல்கிப்பெருகும் செயல்முறை திட்டம்  கடவுளால் வகுக்கப்பட்டது.ஆனாலும் இன்னும் ஒரு கேள்வி எஞ்சியிருக்கிறது.இவ்வாறு கடவுளால் வகுக்கப்பட்ட செயல் முறையின் அடிப்படையில் பல்கிப்பெருகுதல் நடைபெறுகிறது என்றால்,இடுபொருட்களின்,அதாவது மனிதர்களில் அசிங்க எண்ணங்கள் ஊடுருவியது எப்படி?இதற்கு பதிலை காண்பதற்கு முன் "செயல்முறைத்திட்டம்" என்றால் என்ன,அது எவ்வாறு மனிதர்களால் நடைமுறைப்படுத்தப்பட்டுக்கொண்டு இருக்கிறது என்பதை பார்த்துவிடலாம்.

செயல்முறைத்திட்டம்:

ஒருகுறிப்பிட்ட வேலை செய்துமுடிக்கப்பட வேண்டும் என்று நாம் கற்பனை செய்து கொள்வோம்.இவ்வேலை எப்படி செய்யப்படவேண்டும் என்று "அறிவுள்ள ஒருவர்" முடிவு செய்கிறார்.அதன்படி ஒரு குறிப்பிட்ட வரிசையில் இவ்வேலை நடைபெறும். வேலையின் முடிவில் நமக்கு என்ன தேவையோ அது கிடைக்கும்.எடுத்துக்காட்டாக,கார் தயாரிக்கும் தொழிற்சாலை ஒன்றை கற்பனை செய்துகொள்ளுங்கள்.பல செயல்கள் பல்வேறுகட்டமாக ஒரு குறிப்பிட்ட வரிசையில் நடைபெறுகிறது.அனைத்தும் முடிந்த பின்னரே நமக்கு ஒரு கார் கிடைக்கிறது. இந்த வரிசையான செயல்முறை அனைத்தையும் செய்வதற்கு பல வேலையாட்கள் தேவைப்படுகின்றனர்.எப்படி அந்த செயல்கள் நடைபெற வேண்டும் என்று தீர்மானிக்கப்பட்டுள்ளதோ அவ்வாறே அவைகளை வேலையாட்கள் நிறைவேற்ற  வேண்டும். அதில் சிறிது தவறினாலும் கடைசியாக கிடைக்கும் கார் "நல்ல காராக" இருக்காது.வரிசை முறையில் செய்யப்படும் செயல் அனைத்தும் சேர்ந்து செயல்முறைத்திட்டம் ஆகும்.இப்போது சில கேள்விகள்.

• இந்த செயல் முறைத்திட்டத்தை கண்டிப்பாக கடைபிடிக்க வேண்டுமா?
• வேலை செய்யும் ஒருவர் தானாகவே உரிய அனுமதி பெறாமல்  ஏதாவது "புதுமையை" உட்புகுத்தலாமா?
• வகுக்கப்பட்ட செயல்முறைத்திட்டத்திலிருந்து சிறிது வழிவிலகலாமா?
• எனக்கு பிடிக்க வில்லை என்று வேலையாள் ஒருவர் ஒதுங்கி கொள்ளலாமா?
• ஒரு குறிப்பிட்ட வழிமுறையில்தான் இக்கார் தயாரிக்கப்பட வேண்டும் என்பதிலிருந்து மாறுபட்டு வேலையாள் ஒருவர் செயல்படலாமா?
• வேலையாள் என்பவர்,சம்பளத்திற்கு வேலை செய்பவர் அவ்வளவுதான்.தொழிற்சாலையின் சொந்தக்காரர் வகுத்த செயல்முறையில் இருந்து அவருடைய அனுமதியின்றி வேலையாள் தன்னுடைய முடிவுகளை புகுத்தலாமா?

சில வருடங்கள் கழித்து,தொழிற்சாலையின் சொந்தக்காரர் ஒன்றை உணர்கிறார்.வெளிவரும் கார்கள்  தான் விரும்பியபடி இல்லை.அப்படியென்றால் செயல்முறைத்திட்டத்தில் தவறு நடந்திருக்க வேண்டும் அல்லது அத்திட்டத்தை நடைமுறைப்படுத்திக் கொண்டிருக்கும் வேலையாட்கள் தவறுதலாக அதை செய்துகொண்டிருக்க வேண்டும்.செயல்முறைத்திட்டம் தவறு  இடம் இல்லை.காரணம்,அதை முதலில் சரிபார்த்து பின்னரே அவர் அதை செயல்பாட்டுக்கு கொண்டு வந்திருந்தார்.மேலும்   இங்கு இல்லை.எனவே வேலையாட்கள்தான் இதற்கு காரணம்.அணைத்து நிலைகளில்  இருக்கும் வேலையாட்கள் அனைவருமே இதற்கு காரணம்.இப்பொழுது மேலும் சில கேள்விகள்,

• வேலையாட்களின் தவறுக்கு யார் காரணம்?முதல் தவறை யார் செய்தது?
• தவறு செய்ய வேண்டும் என்ற எண்ணத்திற்கு யார் காரணம்?
• செயல்முறைத்திட்டத்தை மீற  வேண்டும் எண்ணம் எப்படி வந்தது?
• ஆரம்பத்தில் கார்கள் நன்றாகவே வெளிவந்தது,ஆனால் தற்போது நன்றாக இல்லை.
• நன்றாக இல்லாத கார்களுக்கு யார் பொறுப்பு?வேலைக்காரர்களா?அல்லது தொழிற்சாலையின் சொந்தக்காரரா?
• கார் நன்றாக இல்லை என்று காரை தூக்கி எறிய தொழிற்சாலையின் சொந்தக்காரருக்கு உரிமை உள்ளதா இல்லையா?
• முதலில் ஒரு வேலையாள் செய்த தவறின் காரணமாக பின் வந்த வேலையாட்கள் அவரின் தவறை ,தவறு என்று அறியாமலே செய்து விட்டனர்,இப்பொழுது பின்வந்த வேலையாட்கள் தண்டிக்கப்படலாமா?
• இப்பொழுது தொழிற்சாலையின் சொந்தக்காரர் கடவுள் என்றும்,தொழிற்சாலை இப்பூமி என்றும்,வேலையாட்கள் நாம்தான் என்றும் கற்பனை செய்து கொள்ளுங்கள்.

மற்றுமொரு உதாரணத்தை பாருங்கள். தக்காளிப்பழம் எப்படி நமக்கு கிடைக்கிறது.முதல் செடியை கடவுள் நமக்கு தந்தார்.அச்செடி விதையை தந்தது. அவ்விதையிலிருந்து மறுபடியும் செடி வந்தது.இது ஒரு சுழற்சி முறை.இச்சுழற்சி நமக்கும், மண்ணுக்கும் தேவையான அனைத்தையும் தந்து விடுகிறது.  இச்சுழற்சி இந்நாள் வரையில் இருக்கிறதுஆனால் மேலும் புதுமைகளை புகுத்துகிறேன் என்று மனிதன் தன்னுடைய மூளையை அதற்குள்  ஆரம்பித்தான்.ஆனால்,இப்படி மட்டும்தான் தக்காளி இன்று விளைவிக்கப் படுகிறதா?இல்லை என்பதுதான் பதில்.கடவுளின் செயல்முறைத்திட்டத்தில் மாற்றம் மனிதனால் ஏற்படுத்தப்படுகிறது. ஆய்வுக்கூடங்களில் தக்காளியை  செய்கிறான்.இவைகளின் வீரியம் எப்படி இருக்கிறது?அதாவது இவ்வாறு உருவாக்கப்பட்ட தக்காளிகளில்  விதைகள் வீரியம் மிக்கதாக இருக்குமா என்றால்,இல்லை.மறுபடியும் விதைகளுக்கு பதிலாக  செடியை உருவாக்குகிறான்.எங்கு செடியை வாங்கினோமோ அங்கேயே மறுபடியும் சென்று விதை வாங்க வேண்டும்.இப்படி விளைந்த தக்காளிகள் கடவுளால் உண்டாக்கப்பட்டவைகளா?இல்லை என்பது தவிர வேறு பதில் இல்லை.கடவுளால் வந்திருந்தால் ,  வீரியம் இல்லாமல் இருக்குமா? 

அப்படியென்றால் இடையில் மாற்றம் செய்தது யார்?ஏன் மாற்றம் செய்ய வேண்டும் என்ற எண்ணம் வந்தது? இயற்கையாக கடவுள்  தந்ததை விட  மனிதனுடைய கண்டுபிடிப்பு மிகவும் பயனுள்ளது என்று பக்கத்திலுள்ள தக்காளியைப் பார்த்தவுடன் தோன்றியிருக்கும் ஆனால் இதன் மோசமான விளைவுகளை இன்று அறிந்து கொண்டோம்.இயற்கையை ஈடுசெய்ய முடியாது,அதாவது கடவுள் படைத்ததை ஈடு செய்ய முடியாது.இன்று பக்கத்திலுள்ள படத்தில் காட்டியுள்ள "மனிதத் தக்காளியிலிருந்து கிடைக்கும் விதைகள் "வீரியமாக" இருக்குமா?இன்றைய பரிசோதனை முடிவுகள் "இல்லை" என்றே கூறுகிறது."வீரியம் இல்லாத இந்த விதைகளில் இருந்து வெளிவரும் இதன் சந்ததிகள் எப்படி இருக்கும்? "கடவுளின் தக்காளி" போன்று இருக்காது என்பது உறுதி.இப்பொழுது,

• இந்த "வீரியமற்ற சந்ததிக்கு" யார் பொறுப்பு? மனிதனா இல்லை கடவுளா? கடவுள் இல்லை என்பது உறுதி.
• கடவுள் இல்லை என்றால் இவர்கள் "தூர எறியப்படுவதற்கு" வேண்டியவர்கள்.
• இப்பூமிக்கு சொந்தக்காரர் "தூர எறியும்" முடிவை எடுக்க அவருக்கு அனைத்து அதிகாரமும் உள்ளது.
• இவ்வாறு மனிதனின் மூளையால் உருவான அனைத்தும் தூர எறியப்படுவதற்கு உரியவைகளே.
• கடவுளின் "செயல்முறைத்திட்டத்திற்கு" நிகர் எதுவும் இல்லை.அதற்கு மாற்று என்று ஒன்று இல்லை.

இப்பொழுது மனிதனுடைய  மீறுதலின் விளைவாக பிறந்த இந்த வீரியமற்ற குழந்தைகளை என்ன செய்வது.இவர்களின் சார்பாக யார் பேசுவார்? வீரியமற்ற தன்மை என்பது பல்வேறு மனிதர்களுக்கு பல அளவுகளில் உள்ளது.அதைப்பொறுத்து அவர்களின் தன்மை மாறுபடுகிறது.ஆண்களுக்கு பெண் தன்மையும், பெண்களுக்கு ஆண் தன்மையும் பல் அளவுகளில் உள்ளது.சில பேருக்கு சிறிய அளவிலும் வேறு சிலருக்கு அதிக அளவிலும் இருக்கிறது.இதன் விளைவுகள்தான் இன்றைய விபரீத ஆசைகள்.கடவுளின் செயல்திட்டம் மீறப்பட்டதின் விளைவுதான் இதற்கு மூலகாரணம்.

யார் முதலில் மீறியது? முதலில் மீறியவர் அவராக மீறினாரா இல்லை தூண்டப்பட்டாரா?தூண்டப்பட்டார் எனில் யார் தூண்டியது?அதை கடவுள் எப்படி அனுமதித்தார்?கடவுள் மனிதனுக்கு சுய  அதிகாரம் கொடுத்திருக்கிறார்,அதாவது தன்  முடிவுகளை தானே எடுத்துக்கொள்ளலாம்.அப்படிப்பட்ட சூழ்நிலையில்,முதலில் மீறியவனை யாரோ தூண்டியிருக்க வேண்டும்.தான் மனிதனுக்கு கொடுத்த சுய அதிகாரத்தின் காரணமாக கடவுள் அவனை தடுக்க வில்லை.அவனுக்குத்தான் யோசிக்க தெரியுமே.இதன் காரணமாக கடவுள் அவனை தடுக்க வில்லை.விளைவு,அவன் செயல்திட்டத்தை மீறியிருக்கிறான்.எந்த அளவுக்கு மீறினான் என்று தெரிய வில்லை.ஆனால்  படிப்படியாக இன்று அது மோசமான நிலைமைக்கு வந்திருக்கிறது.ஆனாலும் ஒரு கேள்வி எஞ்சியிருக்கிறது,

• மீறுதல் எண்ணம் இவ்வுலகத்தில் வந்தது எப்படி?அதைத்தானே முதல் மீறுதலை செய்தவன் செய்தான்.

இப்பொழுது,பாதிக்கப்பட்டவர்களின் சார்பாக யார் கடவுளிடம் பேசுவது?தவறு நடந்து விட்டது.இம்மாதிரியான இளைஞர்களின் மன   நிலைமை மிக மோசமாக உள்ளது."கடவுளின் செயல்திட்டத்தை மீறுகிறோம்" என்ற எண்ணமே இல்லாத அளவுக்கு நிலைமை இன்று உள்ளது.ஆணுக்கும் பெண்ணுக்கும் இடையேயான "ஈர்ப்பு" இன்று "போதை" என்ற நிலைமைக்கு வந்துவிட்டது.அது பல்கி பெருகுவதற்கான செயல் என்று இல்லாமல், தன் தாகத்தை குறைக்கும் செயல் என்று ஆகி விட்டது.அத்தாகம் குறைப்பதற்கென்று இன்று ஆபாச காட்சிகள் உள்ளன.பல்கிப்பெருகுதல் என்ற செயல் மீறப்பட்டு அது ஒரு போதை என்ற நிலையில் உள்ளது.

முதல் மீறுதலின் விளைவாக கிடைத்த சந்ததிக்கு கடவுள் காரணம் அல்ல என்று இப்பொழுது உறுதியாகிறது.மேலும் இன்றைய மனிதர்களை அவர் படைக்கவில்லை.அவரின் படைப்புகள் அனைத்தும் அதிஅற்புதமானவைகள்.என்னை அவர்தான் படைத்தார் என்று அவரை நாம் .தாழ்த்த கூடாது என்றே நான் கருதுகிறேன்.என் படைப்பிற்கு என் பெற்றோரே காரணம்.அவர்களுக்கு அவர்கள் பெற்றோர் காரணம்.பிறக்கும் ஒவ்வொரு மனிதனும் கடவுளின் "செயல்முறைத்திட்டத்தின்" விளைவு ஆகும்.ஓவ்வொருவரும் பிறந்தவுடன் அவனை அல்லது அவளை அவர் பார்க்கிறார்.அவர் விரும்பும் தன்மைகள் இருந்தால் அவனை அல்லது அவளை அவர் ஆதரிக்கிறார். இல்லையென்றால் விட்டுவிடுகிறார்.கடவுளின் செயல்முறைத்திட்டத்தில் தேவையில்லாதவைகளை புகுத்தியது மனிதனே! அதற்கு கடவுள் காரணம் அல்ல.

இன்று நிலைமை மிக மோசமான அளவில் உள்ளது.தாங்கள் "கடவுளின் செயல்முறைத்திட்டத்தில்" மனிதனால் ஏற்பட்ட ஊழலின் காரணமாக பிறந்தவர்கள் என்று உணராமல் அல்லது உணர முடியாமல் இன்றைய வீரியம் குறைந்த இளைஞர்கள்(ஆண்களிலும் மற்றும் பெண்களிலும்) உள்ளனர்.தங்களின் இத்தன்மை தங்கள் பெற்றோரிடமிருந்தே வந்திருக்கிறது என்று உணர வில்லை.அவர்கள் பெற்றோர்களுக்கு அவர்களுடைய  பெற்றோரிடமிருந்து என இது ஒரு சங்கிலி தொடர்.தங்களின் இத்தன்மைக்கு தங்களை படைத்த கடவுள்தான் காரணம் என்று நினைக்கின்றனர்.ஆனால் கடவுள் காரணமாக இருக்க முடியாது என்று இப்பொழுது புரிந்திருக்கும் என நினைக்கிறேன்.எனக்கு என்னுடைய பெற்றோ,அவர்களுக்கு அவர்களுடைய பெற்றோர் என இது பின்னோக்கி செல்லும்.அவ்வாறு சென்றால்,முதல் தவறை யார் செய்தது என்று தெரிந்து.விடும் ஆனால் இது சாத்தியம் அல்ல.

இளமைப்பருவம் அடைந்த வாலிபர்களில் சிலர் விபரீத எண்ணங்களுக்கு ஆட்படுகின்றனர்.ஒரு சில மேற்குறிப்பிடப்பட்ட செயல்கள் தவிர அவர்கள் பெரும்பாலும் நற்குணங்கள் நிரம்பப் பெற்றிருக்கின்றனர்.சில ஆண் பிள்ளைகள் தங்களில் மாற்றங்களை காண்பதாக கூறுகின்றனர்.தங்கள் குணங்கள் பெண்களை போன்று இருப்பதாக கூறுகின்றனர்.அன்றாட நடவடிக்கைகளில் கூட அவர்களுடைய செயல்பாடு மற்றவர்களிடம் இருந்து மாறுபடுவதை கண்கூடாக காண முடியும்.இது அந்த குறிப்பிட்ட இளைஞனை அடுத்த நடவடிக்கைக்கு தள்ளுகிறது.தன்னை அறியாமலே,தான் ஒரு பெண் என்று நினைக்க ஆரம்பிக்கிறான்.இது எப்படி?இதை பிறவி குறைபாடு என்று கூறுவதா,அல்லது ஒரு நோய் என்று கூறுவதா? அல்லது கடவுளின் செயல் என்று கூறுவதா?கடவுளின் செயல் என்றால் அக்குறிப்பிட்ட இளைஞன் தண்டிக்கப்படலாமா?

இவ்வகையான இளைஞர்களின் செயல்பாடுகள் அருவருக்கும் அளவிற்கு செல்கின்றன.ஆண்களுக்கு ஆண்கள் மீதான ஈடுபாடு விடலைப்பருவத்திலிருந்து வெளியே தெரிய ஆரம்பிக்கிறது.பெண்களுக்கும் அதுபோன்றுதான்.இவ்வாறு பிறந்த "வீரியமற்ற சந்ததிக்கு" இப்பொழுது என்னதான் வழி  உள்ளது?

அடுத்தக் கட்டுரையில் அதை நாம் காணலாம்.

இரா.இருதயராஜ்.

கிறித்தவ உலகில் பயன்படுத்தப்படும் சில வார்த்தைகளின் விளக்கங்கள்

கிறித்தவ உலகில் பயன்படுத்தப்படும் சில வார்த்தைகளின் விளக்கங்கள் 

புதிதாக கிறித்தவ மாதத்தில் இனைபவர்கள் எதிர்கொள்ளும் சில குழப்பங்களில் ஒன்று அங்கு பயன் படுத்தப்படும் வார்த்தைகளின் பொருள் ஆகும்."பிஷப்" என்றால் என்ன பொருள்? அது எந்த மொழியை சேர்ந்தது? என்பது போன்ற விவரங்கள் பெரும்பாலான மக்களுக்கு தெரிந்திருக்க வாய்ப்பில்லை.அவ்வாறான சில வார்த்தைகள் சிலவற்றை நாம் பார்க்க இருக்கிறோம்.

1.பிஷப்(Bishop):

இவ்வார்த்தையின் பொருள்:"தனிப்பெரும் தலைவர்","தனிப்பெரும் மேற்பார்வையாளர்" போன்றவை ஆகும். இவ்வார்த்தை கிரேக்க மொழியினை சேர்ந்தது ஆகும்.அம்மொழியில் இவ்வார்த்தை "episkopos" என்று அழைக்கப்படுகிறது.கிறித்தவத்தின்  முதல் பிஷப் இக்னசிஸ்(Ignatius) ஆவார்.அக்காலத்தில் சிரியாவில், அந்தியோக்(Antioch) என்ற நகரத்திலிருந்த சபையின் தலைவர் இவர் ஆவார்.

2.கத்தோலிக்(Catholic):

இவ்வார்த்தையின் பொருள்: "அனைத்து", அனைத்தும் உள்ளடங்கிய", பொதுவான, போன்றவை ஆகும்.இவ்வார்த்தை கிரேக்க மொழியினை சேர்ந்தது ஆகும்.அம்மொழியில் இவ்வார்த்தை "katholikos/ē" ஆகும்.பிரிந்து கிடந்த ஆரம்ப கால கிறித்தவ பிரிவினரை இணைப்பதற்கு இவ்வார்த்தை பயன் பட்டது.இவ்வார்த்தையை முதலில் பயன்படுத்தியவர் அந்தியோக்கை(Antioch) சேர்ந்த  "பிஷப் இக்னசிஸ்(Ignatius) ஆவார். 

3.மூப்பர்கள்(Elders):

Presbyteroi என்ற கிரேக்க வார்த்தையில் இருந்து Priest என்ற ஆங்கில வார்த்தை வந்தது.யூத மார்க்கத்தில் "ஆசாரியர்கள்" எவ்வளவு முக்கியத்துவத்தை பெற்றிருந்தனரோ அவ்வாறான ஒரு பொறுப்பைக் குறிப்பதற்கு இவ்வார்த்தை பயன்பட்டது. இயேசு இறந்த பிறகு அப்போஸ்தலர்களுக்கு தலைமை ஏற்பது யார் என்ற குழப்பம் ஏற்பட்டது.அப்பொழுது எருசலேம் சபையின் இருந்த ஒரே தலைமை இயேசுவின் சகோதரரான "James"(இவர் பெயர் உண்மையில் James என்பது கிடையாது.காரணம்,James என்பது ஹீப்ரு வார்த்தை அல்ல,அது ஆங்கில வார்த்தை.இவர் பெயர் உண்மையில் "யாக்கோபு".எப்படி இவர் பெயர் மாற்றப்பட்டது என்பது தனி வரலாறு).இவரின் தலைமையில் இருந்த அப்போஸ்தலர்கள் மற்றும் பிற மூப்பர்கள் Presbyteroi என்ற கிரேக்க வார்த்தை மூலம் அழைக்கப்பட்டனர்.எனவே இவ்வார்த்தையின் பொருள் "மூப்பர்கள்" ஆகும்.

4.வேலைக்காரர்கள்(Deacon):

இவ்வார்த்தையின் பொருள் "உதவியாளர்கள்","வேலைக்காரர்கள்". இது கிரேக்க வார்த்தையான "diakonos" என்பதிலிருந்து வந்தது. மூப்பர்களுக்கு உதவி செய்தவர்களை குறிக்க இவ்வார்த்தை அக்காலத்தில் பயன்பட்டது.

5.அப்பம் உண்ணுதல்(Eucharist):

இதன் பொருள் "நன்றி நிறைந்த" என்பதாகும்.இது eukharistos என்ற கிரேக்க வார்த்தையில் இருந்து வந்தது.யூதர்கள் சனிக்கிழமைகளில் தங்கள் ஓய்வு நாளை கடைபிடித்தனர்.இதற்க்கு போட்டியாக கிறித்தவர்கள் தங்கள் தலைவர் இயேசு உயிர்த்தெழுந்த நாளை சிறப்பு நாளாக கடைபிடிக்க ஆரம்பித்தனர்.பழைய ரோமர்கள் தங்கள் சூரிய கடவுளுக்குரிய நாளாக ஒரு நாளை கொண்டிருந்தனர்.அந்த நாளை "Sunday" என்று அழைத்தனர்.அது யூதர்களின் ஓய்வு நாளான சனிக்கிழமைக்கு அடுத்ததாக வந்தது.யூதர்களுக்கு போட்டியாக ஏதாவது செய்ய வேண்டும் என்ற தூண்டுதலின் காரணமாக இந்த "Sunday"வை அவர்கள் சிறப்பு நாளாக கடைபிடிக்க ஆரம்பித்தனர்.இந்நாளில் சிறப்பு விருந்து நடந்தது.இயேசுவின் உயிர்தெழுதலைக் குறிக்கும்படியாக அப்பாத்தையும் திராட்சை இரசத்தையும் உண்ணும் பழக்கத்தை அறிமுகப்படுத்தினார்.முதல் பிஷப்பாகிய அந்தியோக்(Antioch)-ஐ  சேர்ந்த இக்னசிஸ்(Ignatius) இதனை முதன்முதலில் "Eucharist" என்று அழைத்தார்.

6.கடிதம்(epistolē):

இது கிரேக்க வார்த்தையான "epistolē" என்ற வார்த்தையிலிருந்து வந்தது. இதன் பொருள் "கடிதங்கள்" என்பது ஆகும். குறிப்பாக அப்போஸ்தலன் பவுலின் கடிதங்களை குறிப்பதற்கு இவ்வார்த்தை பயன்பட்டது. இக்கடிதங்கள் "அன்றாட வாழ்வில் பேசும் கிரேக்க மொழியில் எழுதப்பட்டது.அழகு தமிழுக்கும்  அன்றாட தமிழுக்கும் வேறுபாடு உள்ளது போன்று அன்றாட கிரேக்க மொழிக்கும் அலுவல் கிரேக்க மொழிக்கும் வேறுபாடுகள் உண்டு.

7.சேகரம்(Diocese):

இவ்வார்த்தைக்கு ஆச்சரியமான ஒரு சிறப்பு உண்டு.இவ்வார்த்தையானது,கிறித்தவர்களை அதிகமாக துன்புறுத்திய ரோம மன்னனான "டையோக்ளேசின்(Diocletian)" என்பவன் பயன்படுத்திய வார்த்தையில் இருந்து வந்தது.இவ்வார்த்தையானது கிரேக்க வார்த்தையான "dioikein" என்ற வார்த்தையில் இருந்து உருவானது.பின்னர் லத்தீன் மொழிக்கு மாறியது. மேற்குறிப்பிடப்பட்ட மன்னன் தன்னுடைய ஆட்சிக்குட்பட்ட பகுதிகளை 12 பகுதிகளாக பிரித்திருந்தான். அப்பிரிவுகளுக்கு பெயர் "Diocese".அதுதான் பின் வந்த கிறித்தவர்களால் எடுத்துக் கொள்ளப்பட்டது. ஒரு "பிஷப்பின்" ஆளுகைக்கு உட்பட்ட பகுதியை Diocese என்கிறோம்.

7.கதீட்ரல்(Cathedral):

இவ்வார்த்தையானது லத்தின் மொழியை சேர்ந்தது.லத்தின் மொழி ஏறத்தாழ கிரேக்க மொழியை சார்ந்தே இருக்கும்.இவ்வார்த்தையின் பொருள் "பிஷப்பின் இருக்கை" ஆகும்.அதாவது,ஒரு நகரத்தில் எந்த சபையில் பிஷப்பின் இருக்கை  உள்ளதோ அதுவே கதீட்ரல் ஆகும்.பிஷப் இங்குதான் அமர்ந்திருப்பார்."Cathedra" என்ற லத்தின் வார்த்தையின் பொருள் "இருக்கை(Chair)" ஆகும்.கிறித்தவத்தை ரோம அரசர்கள் ஏற்றுக்கொள்ள ஆரம்பித்தபொழுது, பிஷப்புகள் பெரும் அதிகாரம் பெற்றனர்.கிட்டத்தட்ட அவர்கள் மன்னனுக்கு சமமானவர்கள் ஆயினர்.தங்களுடைய இருக்கைகளில் அவர்கள் அமர்ந்திருக்கும் விதம் காலப்போக்கில் மன்னர்கள் அமர்த்திருக்கும் விதத்தை போலானது.மக்களுடைய அன்றாட வாழ்வியல் பிரச்சனைகளுக்கு இந்த இருக்கைகளில் அமர்ந்திருந்து தீர்ப்பு வழங்கினர்.இதற்கும் முன்னர் கல்விக்கூடங்களில் மட்டும் பயன்படுத்தப்பட்டு வந்த இவ்வார்த்தையை கிறித்தவம் தனக்கு எடுத்துக்கொண்டது.

8.சேப்பல்(Chapel):

இவ்வார்த்தை இலத்தீன் மொழியை சேர்ந்தது ஆகும்.இதன் பொருள் "சிறு சபை(small Church)".இந்த வார்த்தை "capella" என்ற இலத்தீன் வார்த்தையின் பொருள் "சிறு மேலங்கி" என்பது ஆகும்.கி.பி 400-களில் வாழ்ந்த கிறித்தவ மத துறவியாகிய மார்ட்டின் என்பவரால் இவ்வார்த்தை கிறித்தவத்திற்கு வந்தது.இவர் துறவி ஆவதற்கு முன்னர் போர்வீரனாக இருந்தார்.இவரைப்பற்றிய ஒரு கதை உள்ளது.இவர் போர் வீரனாக இருந்த போது,ஒரு முறை தன்னுடை மேலங்கியை கிழித்து ஒரு ஏழைக்கு வழங்கினார்.பின்னர் பார்த்தால் ,அந்த ஏழை வேறு யாரும் அல்ல இயேசுதான் என்று அறிந்து கொண்டதாக அந்த கதை உள்ளது.பின் வந்த பிராங்கிஸ்(Frankish) என்ற காட்டுமிராண்டிகள் இந்த கிழிந்த மேலங்கியை மிகவும் போற்றினர்.இந்த மேலங்கியை போற்றி பாதுகாத்து கொண்டிருந்த சபைகள் அனைத்தும் "Capellae" என்று அழைக்கப்பட்டன.இதுவே மேற்கத்திய கிறித்தவர்கள் அதிகம் பயன்படுத்தும் ஒரு சொல்லாக இன்று மாறிவிட்டது.நாளடைவில் மேற்கத்திய கிறித்தவர்கள்,"தனியார்களால் நடத்தப்படும் சிறு சபைகளை" குறிப்பதற்கு இச்சொல்லை பயன்படுத்தினர்.

இரா.இருதயராஜ்.

Ref :

1.a history of christianity :By Diarmaid MacCulloch

நாசரேத்து எனும் ஊரிலே வந்து வாசம் பண்ணினான்,நசரேயன் எனப்படுவார் [மத் 2:23]

நாசரேத்து எனும் ஊரிலே வந்து வாசம் பண்ணினான்,நசரேயன் எனப்படுவார் [மத் 2:23]

மத்தேயு இரண்டாம் அதிகாரம் கடைசி வசனம் இது.மாற்கு தன்னுடைய புத்தகத்தை எழுதிய பின்னர்தான் மத்தேயு தன்னுடைய இந்த புத்தகத்தை எழுதுகிறார்.மத்தேயு நற்செய்தி புத்தகம் மற்ற மூன்று நற்செய்தி புத்தகங்களில் இருந்து ஒரு குறிப்பிட்ட செய்தியில் வேறுபடுகிறது.மற்ற நற்செய்தி புத்தகங்கள் இயேசுவின் வாழ்க்கையை பல்வேறு விதமாக சித்தரித்துக் காட்டியிருந்தாலும்,பழைய ஏற்பாட்டு தீர்க்கதரிசன வசனங்கள் மூலம் இயேசுவின் வாழ்க்கையை மத்தேயு விளக்கியிருப்பார்.மற்ற எழுத்தாளர்கள் இவற்றை கையாளவில்லை.இறைவாக்காளர்கள் பலர் நமக்கு இருக்கின்றனர்.ஏசாயா, எரேமியா போன்றோர் பெரும் இறைவாக்கினர் ஆவர்.இவர்களுடைய வாக்குகள் பெரும்பாலானவைகளை இயேசு நிறைவேற்றி இருக்கிறார் என்று நமக்கு மத்தேயு கூறியிருக்கிறார்.அதன் காரணமாக இயேசுவே வரவேண்டிய "மேசியா" என்று மத்தேயு நிரூபிக்க முயன்றிருப்பார்.அவ்வாறான ஒரு வாக்குதான் மேற்கூறிய வசனம்.இந்த வசனத்தை நாம் முதலில் பார்த்துவிடலாம்.

23 அங்கு அவர் நாசரேத்து எனப்படும் ஊருக்குச் சென்று அங்கு குடியிருந்தார். இவ்வாறு, ‘நசரேயன்’ என அழைக்கப்படுவார் என்று இறைவாக்கினர்கள் உரைத்தது நிறைவேறியது.[மத் 2:23]

23. நாசரேத்து என்னும் ஊரிலே வந்து வாசம்பண்ணினான். நசரேயன் என்னப்படுவார் என்று, தீர்க்கதரிசிகளால் உரைக்கப்பட்டது நிறைவேறும்படி இப்படி நடந்தது.[மத் 2:23]

பழைய ஏற்பாட்டில் இருக்கின்ற எண்ணற்ற இறைவாக்குகளை இயேசு நிறைவேற்றி உள்ளார்,அவ்வாறான ஒன்றுதான் மேற்கூறிய வாக்கியம் என்று மத்தேயு கூறுகிறார் என்பதை மேற்கூறிய வாக்கியத்தின் கடைசி வரிகளில் இருந்து நம்மால் புரிந்து கொள்ள முடியும்.மேலே குறிப்பிடப்பட்ட அக்குறிப்பிட்ட வாக்கியத்தில் நாம் ஒரு சில தகவல்களை ஆராய இருக்கிறோம்.

முதல் தவறு:

மத்தேயுவின் பல தவறுகளில் இதுவும் ஒன்று.இங்கே அவர் இரண்டு தவறுகளை செய்திருக்கிறார்.ஒன்று,அவர் சுட்டிக்காட்டிய பழைய ஏற்பாட்டு இறைவாக்கு பழைய ஏற்பாட்டில் இல்லை.இரண்டாவது,"நசரேயன்" என்ற வார்த்தையை தவறாக புரிந்து கொண்டது.

முதலில் மத்தேயுவால் குறிப்பிடப்பட்டுள்ள அக்குறிப்பிட்ட இறைவாக்கு எங்குள்ளது?எவ்வளவு தேடினாலும் அது கிடைக்காது.அப்படி ஒரு இறைவாக்கு பழையஏற்பாட்டில் இல்லவேயில்லை.அப்படியென்றால்,

• இல்லாத இறைவாக்கை மத்தேயு மேற்கோள் காட்டினாரா?இல்லாத ஒன்றை எப்படி மத்தேயு மேற்கோள் காட்டுவார்?அது சாத்தியமா?அவ்வாறு அவர் செய்திருந்தால் அது எவ்வளவு பெரிய தவறு?
• ஒருவேளை மத்தேயு ஏதோ ஒரு இறைவாக்கை மேற்கோள் காட்டியதை மொழிபெயர்த்தவர்கள் தவறாக மொழிபெயர்த்துவிட்டதன காரணமாக நாம் தேடியும் கிடைக்கவில்லையா?
• இரண்டில் எது தவறு?

அக்குறிப்பிட்ட இறைவாக்கை அனைத்து இறைவாக்கினர் புத்தகங்களிலும் தேடிப்பார்த்தாயிற்று.ஆனாலும் கண்டுபிடிக்க இயலவில்லை.அப்படியென்றால் எங்கிருந்துதான் இவ்வாக்கியத்தை மத்தேயு நமக்கு கொடுத்திருக்கிறார்?இதற்க்கு பதில்,தெரியவில்லை.வரலாற்று ஆய்வாளர்கள்தான் பதில் சொல்ல வேண்டும்.ஏன் மத்தேயு இப்படி செய்தார் என்பதற்கும் காரணம் தெரியவில்லை.

மத்தேயுவின் புத்தகம் முழுவதும் இப்படிப்பட்ட இறைவாக்குகள் நிறைவேற்றப்பட்ட தகவல்கள் நிரம்பியுள்ளன.ஆர்வமிகுதியின் காரணமாக அத்தவறை மத்தேயு இளைத்துவிட்டாரா என்றும் தெரியவில்லை.எப்படியாயினும், அக்குறிப்பிட்ட வாக்கியம் படிப்பவர்களை ஏமாற்றுகிறது என்பது எனது கருத்து.

இரண்டாவது தவறு:

இல்லாத இறைவாக்கை மத்தேயு கொடுத்துவிட்டார் என்பது ஒரு குற்றச்சாட்டாக இருந்தாலும்,அடுத்த தவறு முதல் தவறை விட மோசமாக உள்ளது.இறைவவாக்கினர்களின் காலம் ஆயிரம் வருடங்களுக்கு முற்பட்டது.அவர்களின் புத்தகங்கள் பல கண்டுபிடிக்கப்படாமல் கூட இருக்கலாம்.அல்லது மத்தேயு மேற்கோள் காட்டிய இறைவாக்கு அடங்கிய புத்தகம் அவரின் காலகட்டத்தில் இருந்திருந்து, பின்னர் காணாமல் போயிருக்கலாம் அல்லது அழிந்து கூட போயிருக்கலாம்.அதன் காரணமாகவே அந்த இறைவாக்கை நாம் தேடிப்பார்த்தும் நம்மால் கண்டுபிடிக்க இயலவில்லை என்று முடிவு செய்து கொள்ளலாம்.

ஆனால் அக்குறிப்பிட்ட இறைவாக்கில் இருக்கும் ஒரு வார்த்தைதான் மத்தேயு மீதான சந்தேகத்தை அதிகப்படுத்துகிறது.அக்குறிப்பிட்ட வார்த்தை "நசரேயன்" ஆகும்.நசரேயன் என்றால் என்னவென்று முதலில் நாம் தெரிந்து கொள்ள வேண்டும்.இதைப்பற்றி தெரிந்து கொள்ள எண்ணாகமம் புத்தகத்தை படிக்க வேண்டும்.எண் 6:1-21 வாக்கியங்கள் "நசரேயன்" என்பவன் யார் என்று நமக்கு கூறுகிறது.

1 ஆண்டவர் மோசேயிடம் கூறியது;

2 இஸ்ரயேல் மக்களிடம் சொல்; ஓர் ஆணோ பெண்ணோ தன்னை ஆண்டவருக்குத் தனிப்படுத்திச் சிறப்பான பொருத்தனையான நாசீர் பொருத்தனை செய்து ஆண்டவருக்குத் தன்னை அர்ப்பணித்தால்,

3 திராட்சை இரசம், மது ஆகியவற்றை அவன் விலக்க வேண்டும்; திராட்சை இரசம், மது ஆகியவற்றின் காடியை அருந்தக் கூடாது. திராட்சைப்பழச் சாற்றைக் குடிக்கக் கூடாது. திராட்சைப் பழங்களையோ, வற்றலையோ உண்ணவும் கூடாது.[எண் 6:1-21]

1. கர்த்தர் மோசேயை நோக்கி:

2. நீ இஸ்ரவேல் புத்திரரோடே சொல்லவேண்டியது என்னவென்றால்: புருஷனாகிலும் ஸ்திரீயாகிலும் கர்த்தருக்கென்று விரதம் பண்ணிக்கொண்டவர்களாயிருக்கும்படி நசரேய விரதமாகிய ஒரு விசேஷித்த பொருத்தனையைப் பண்ணினால்,

3. அப்படிப்பட்டவன் திராட்சரசத்தையும் மதுபானத்தையும் விலக்கக்கடவன்; அவன் திராட்சரசத்தின் காடியையும் மற்ற மதுபானத்தின் காடியையும், திராட்சரசத்தினால் செய்த எவ்விதமான பானத்தையும் குடியாமலும், திராட்சப்பழங்களையாவது திராட்ச வற்றல்களையாவது புசியாமலும்,

4. தான் நசரேயனாயிருக்கும் நாளெல்லாம் திராட்சச்செடி விதைமுதல் தோல்வரையிலுள்ளவைகளினால் செய்யப்பட்ட யாதொன்றையும் புசியாமலும் இருக்கக்கடவன்.[எண் 6:1-4]

இக்கட்டுரையைப் படிப்பவர்கள் எண் 6-ம் அதிகாரம் முழுவதையும் படித்துப்பார்க்க வேண்டும். மேற்குறிப்பிட்ட வாக்கியங்கள் நமக்கு கூறுவது என்னவென்றால்,கடவுளுக்கு தன்னை "அர்ப்பணித்து" கொண்டவர்களைத்தான் "நசரேயன்" என்கிறோம்.அவ்வாறு அழைக்கப்படுவதற்கு அந்த "நசரேயன்" குறிப்பிட்ட வழிமுறைகளை கடைபிடிக்க வேண்டும்.அது சற்று கடினமானதும் கூட.

இந்த "அர்பணிப்புக்கென்று" இருக்கும் சட்டதிட்டங்களை கடைப்பிடித்து வாழ்பவரே "நசரேயன்".இயேசுவும் தன்னை கடவுளுக்கென்று அர்ப்பணித்து கொண்டவர்தான் என்று காட்டுவதற்காக மத்தேயு முயன்றிருக்கிறார்.இதற்கு கீழ்வருமாறு உதாரணம் கூறலாம்.

இன்றைய காலகட்டங்களில் நம்முடைய அரசியல்வாதிகளை எடுத்துக் கொள்வோம். குறிப்பாக மறைந்த ஜெயலலிதாவை எடுத்துக் கொள்வோம்.அவர் அ.இ.அ.தி.மு.க. என்ற கட்சியின் தலைவர்.அக்கட்சியின் உறுப்பினர்கள் ஜெயலலிதாவை ஈர்ப்பதற்காகவும்,அவரின் கவனத்தை பெறுவதற்காகவும் செய்யும் செயல்கள் நகைப்பை உண்டு செய்யும் அளவுக்கு இருக்கும்.அவரின் கவனத்தை ஈர்ப்பதற்கு என்ன வேண்டுமானாலும் அத்தொண்டர்கள் செய்வர்.இது நமக்கு நன்றாக தெரிந்த செய்தி."ஆர்வத்தின் அளவு"தான் இங்கு கவனிக்கப்பட வேண்டிய ஒன்றாகும்.அவ்வாறான ஆர்வத்தின் மிகுதியால்தான் மத்தேயுவும் செயல்பட்டுள்ளார் என்பது எனது கருத்து.அவர் செய்த தவறின் அளவு அவருக்கு அக்காலகட்டத்தில் தெரியவில்லை.எப்படியாவது இயேசுதான் "மேசியா" என்று நிரூபித்தாக வேண்டும் என்ற ஆர்வத்தின் மிகுதியால் வந்த விளைவுதான் இரண்டாவது தவறு.

நசரேயன் என்பவர் "கடவுளுக்கு தன்னை அர்ப்பணித்து கொண்டவர்".குறிப்பிட்ட சட்டதிட்டங்களை கடைப்பிடித்து வாழவேண்டியவர்.பிணங்களை தொடக்கூடாது.இயேசு இறந்து போன லாசருவை சென்று பார்த்திருக்கிறார்.இங்கு என்னதான் தவறு நிகழ்ந்துள்ளது?

"நாசரேத்து" ஏன்னும் ஊரில் வாழ்ந்த காரணத்தினால் "நசரேயன்" என்று அழைக்கப்படுவார்,என்பதாக மத்தேயு நமக்கு எழுதியுள்ளார்.இதுதான் தவறு.உதாரணமாக,அமெரிக்கா(America) என்னும் நாட்டில் வாழ்பவர்களை "அமெரிக்கன்(American)" என்று கூறுவார்கள்.அதுபோன்று நம் நாட்டில் வாழ்பவர்களை "Indian" என்று எழுதுவார்கள்.அதுபோன்றுதான் "நாசரேத்(Nazareth)" என்னும் ஊரில் வாழ்பவர்களை "நசரேயன்" என்று தமிழிலும்,"Nazrene" என்று ஆங்கிலத்திலும் கூறுவார்கள்.ஆனால் இந்த "நசரேயன்(Nazrene)" ஆனவர் கடவுளுக்கு தன்னை அர்பணித்துக்கொண்ட "நசரேயன்" அல்ல.

நாசரேத்து என்னும் ஊரில் வாழ்ந்த காரணத்தினாலேயே ஒருவர் "கடவுளுக்கு தன்னை அர்ப்பணித்து கொண்ட நசரேயன்" ஆகி முடியாது.எண்ணாகமம் 6-ம் அதிகாரத்தில் கொடுக்கப்பட்டுள்ளது போன்று வாழ்பவர்தான் உண்மையான "நசரேயன்".இயேசுவின் வாழ்க்கை வரலாற்றை நான்கு நற்செய்தியாளர்களும் நமக்கு தந்துள்ளபடி நாம் படித்தோமானால்,அவர் அவ்வாறு வாழ்ந்தாரா என்பது சந்தேகமே!

ஆர்வமிகுதியின் காரணமாகவோ அல்லது வேறு ஏதாவது காரணமாகவோ மத்தேயு மற்றுமொரு தவறான தகவலை நமக்கு தந்திருக்கிறார்.எனவே மத் 2:23-ல் மேற்கோள் காட்டப்பட்ட இறைவாக்கு உண்மையில் இருக்கிறது என்று நாம் எடுத்துக்கொண்டாலும் இவ்வசனத்தின் அடுத்த தவறு மத்தேயுவின் நோக்கத்தை நமக்கு வெளிப்படுத்தி விடுகிறது.உண்மையில் நசரேயன் என்பவர் யார் என்பது மத்தேயுவுக்கு தெரிந்திருக்கவில்லை என்பது அவர் நமக்கு தந்துள்ள வாக்கியம் மூலமாகவே உணர்த்திவிடுகிறார்.

திருமறையில் உண்மையான நசரேயென்கள் சிம்சோன் மற்றும் சாமுவேல் ஆவர்.

முடிவு:

இதன் மூலம் மத்தேயு  தனக்கென்று ஒரு நோக்கத்தை கொண்டிருந்தார் என்பது திண்ணமாகிறது.இயேசுதான் "மேசியா" என்று நிரூபிப்பதுவே  அந்த நோக்கம் என்று கருத வேண்டியுள்ளது.இயேசுதான் "மேசியா" என்றால் அதை ஒருவர் நிரூபிக்க வேண்டிய அவசிமே இல்லை.அவரின் செயல்களே அவரை நிரூபித்து விடும்.

ஏசாயா 11-ம் அதிகாரம் முழுவதையும் ஒருமுறை கூர்ந்து வாசித்துப்பார்த்தால் ஈசாயின் மகன்,அதாவது தாவீதின் வம்சத்தில் வரும் ஒருவர்,செய்யும் செயல்கள் விளக்கப்பட்டிருக்கும். அவைகள் இப்பொழுது நிறைவேறி இருக்கிறதா? நிறைவேறி இருந்தால் இயேசுதான் "மேசியா".இல்லை என்றால் அவர் இனிதான் வருவார்.அவர் செய்யப்போகும் செயல்களில் ஒன்றை மட்டும் கீழே தந்துள்ளேன்.மீதியை நீங்கள் படித்துப்பாருங்கள். இதைப்படிப்பவர்கள் இந்த வசனம் கூறும் கருத்தை மனதில் ஆசை போட்டு பாருங்கள்.அது எவ்வளவு அழகான காலம் என்பதை உணர முயற்சி செய்யுங்கள்.அப்படிப்பட்ட அழகான காலத்தை கடவுளின் பெயரால் மெசியாவானவர் நமக்கு தருவார் என ஏசாயா கூறுகிறார்.

6 அந்நாளில், ஒநாய் செம்மறியாட்டுக் குட்டியோடு தங்கியிருக்கும்; அக்குட்டியோடு சிறுத்தைப்புலி படுத்துக்கொள்ளும். கன்றும், சிங்கக்குட்டியும், கொழுத்த காளையும் கூடி வாழும்; பச்சிளம் குழந்தை அவற்றை நடத்திச் செல்லும்.[எசா 11:6]

6. அப்பொழுது ஓநாய் ஆட்டுக்குட்டியோடே தங்கும், புலி வெள்ளாட்டுக்குட்டியோடே படுத்துக்கொள்ளும்; கன்றுக்குட்டியும், பாலசிங்கமும், காளையும், ஒருமித்திருக்கும்; ஒரு சிறு பையன் அவைகளை நடத்துவான்.[ஏசா 11:6]

மேற்கூறிய வாக்கியம் கூறுவது என்ன?ஒரு குழந்தை இப்படிப்பட்ட காரியம் செய்கிறது என்றால் அப்படிப்பட்ட சூழ்நிலை அங்கு நிலவும்? இவ்வாறான அமைதியான,ரம்மியமான,ஆரோக்கியமான சூழ்நிலையா இங்கு நிலவுகிறது?இயேசுவால் இக்காரியங்கள் நடைபெறவில்லை.எனவே இயேசு "மேசியா" அல்ல.

இரா.இருதயராஜ்.

இக்கட்டுரையை பதிவிறக்கம் செய்ய:
https://drive.google.com/file/d/1V20d9RrOB79KjMcYmRDJYge8Jmc-Tzcb/view?usp=sharing

இயேசு இயற்கைக்கு அப்பாற்பட்ட முறையில் பிறந்தார் என்று மரியாளும்,யோசேப்பும் கூறினார்களா?

இயேசு இயற்கைக்கு அப்பாற்பட்ட முறையில் பிறந்தார் என்று மரியாளும்,யோசேப்பும் கூறினார்களா?

இயேசுவின் இயற்கைக்கு அப்பாற்பட்ட பிறப்பை யோசேப்பையும், மரியாளையும்  தவிர வேறு யார் நன்றாக நினைவில் கொண்டிருக்க வேண்டும்?கன்னிப்பெண்ணாக இருக்கும் ஒருவள் தான்  கர்ப்பம் தரிக்கும் பொழுதை மறக்க மாட்டாள்,எப்பொழுதும் நினைவில் கொள்ளுவாள் என்று எவரும் எதிர்பார்ப்பார்கள்.அதுபோன்று, ஒருவன் தனக்கு நிச்சயிக்கப்பட்ட கன்னிப்பெண் ஒருவள், தன்னுடைய செயல் எதுவும் இன்றி இயற்க்கைக்கு அப்பாற்பட்ட முறையில் கர்ப்பம் தரிப்பதை சுலபமாக மறக்க மாட்டான்.ஆனால், இயேசுவின் இயற்கைக்கு அப்பாற்ப்பட்ட பிறப்பை அவருடைய பெற்றோர் மறந்து விட்டதைப்போன்று  நற்செய்தியாளர்கள் பலர் கதைகளை விவரிக்கின்றார்.

லூக்காவின் புத்தகத்தில்,கடவுளின் கோவிலில் அங்கிருந்த கற்றுத்தேர்ந்த பெரியவர்களுக்கு இயேசு கற்ப்பிப்பதாக கூறியிருப்பார்.லூக்கா 2-ம் அதிகாரம் 42 முதல் 50-ம் வசனங்கள் வரை படித்துப்பாருங்கள்.இயேசுவின் தாயார் பேசியதற்கு இயேசுவின் பதிலைப்பாருங்கள். 

48 அவருடைய பெற்றோரும் அவரைக் கண்டு வியப்பில் ஆழ்ந்தனர். அப்பொழுது அவருடைய தாய் அவரை நோக்கி, “மகனே, ஏன் இப்படிச் செய்தாய்? இதோ பார், உன் தந்தையும் நானும் உன்னை மிகுந்த கவலையோடு தேடிக்கொண்டிருந்தோமே” என்றார்.

49 அவர் அவர்களிடம் “நீங்கள் ஏன் என்னைத் தேடினீர்கள்? நான் என் தந்தையின் அலுவல்களில் ஈடுபட்டிருக்க வேண்டும் என்பது உங்களுக்குத் தெரியாதா?” என்றார்.

50 அவர் சொன்னதை அவர்கள் புரிந்து கொள்ளவில்லை.[லூக் 2:48,49,50]

48. தாய் தகப்பன்மாரும் அவரைக்கண்டு ஆச்சரியப்பட்டார்கள். அப்பொழுது அவருடைய தாயார் அவரை நோக்கி: மகனே! ஏன் எங்களுக்கு இப்படிச்செய்தாய்? இதோ, உன் தகப்பனும் நானும் விசாரத்தோடே உன்னைத் தேடினோமே என்றாள்.

49. அதற்கு அவர்: நீங்கள் ஏன் என்னைத் தேடினீர்கள்? என் பிதாவுக்கடுத்தவைகளில் நான் இருக்கவேண்டியதென்று நீங்கள் அறியீர்களா என்றார்.

50. தங்களுக்கு அவர் சொன்ன வார்த்தையை அவர்கள் உணர்ந்து கொள்ளவில்லை. [லூக் 2:48,49,50]

இயேசு பேசியதை யோசேப்பும் புரிந்து கொள்ளவில்லை,மரியாளும் புரிந்து கொள்ளவில்லை.இயேசு பிறப்பதைக் குறித்து இறைத்தூதன் ஒருவன் அவர்கள் இருவரையும் சந்தித்து இருந்தானேயானால் இருவரும் பண்ணீரெண்டு ஆண்டுகளுக்குப் பின் அவற்றை மறந்து எப்படி?48-வது வசனத்தின்படி அவர்கள் இருவரும் ஆச்சரியப்பட்டது எப்படி? இந்த உலகத்தில் இதற்கு முன்னர் எந்த உயிரினமும் சந்தித்திராத,இயற்கைக்கு அப்பாற்ப்பட்ட வகையில் இயேசுவை தான் கர்ப்பம் தரித்ததை மறந்தது எப்படி?

எலிசபெத்,மரியாவிடம் கீழ்வருமாறு கூறியதை அவள் மறந்துவிட்டால் என்பதை நம்ப முடியவில்லை.

42 அப்போது அவர் உரத்த குரலில், “பெண்களுக்குள் நீர் ஆசி பெற்றவர்; உம் வயிற்றில் வளரும் குழந்தையும் ஆசி பெற்றதே!

43 என் ஆண்டவரின் தாய் என்னிடம் வர நான் யார்?[லூக் 1:42,43]

42. உரத்தசத்தமாய்: ஸ்திரீகளுக்குள்ளே நீ ஆசீர்வதிக்கப்பட்டவள், உன் கர்ப்பத்தின் கனியும் ஆசீர்வதிக்கப்பட்டது.

43. என் ஆண்டவருடைய தாயார் என்னிடத்தில் வந்தது எனக்கு எதினால் கிடைத்தது, [லூக் 1:42,43]

மேலும் மரியாளே தன்னுடைய வாயினாலே கூறுவதையும் கவனியுங்கள்.

46 அதைக் கேட்ட மரியா பின்வருமாறு கூறினார்;

47 “ஆண்டவரை எனது உள்ளம் போற்றிப் பெருமைப் படுத்துகின்றது. என் மீட்பராம் கடவுளை நினைத்து எனது மனம் பேருவகை கொள்கின்றது.

48 ஏனெனில் அவர் தம் அடிமையின் தாழ்நிலையைக் கண்ணோக்கினார். இதுமுதல் எல்லாத் தலைமுறையினரும் என்னைப் பேறுபெற்றவர் என்பர்.

49 ஏனெனில் வல்லவராம் கடவுள் எனக்கு அரும்பெரும் செயல்கள் செய்துள்ளார். தூயவர் என்பதே அவரது பெயர்.[லூக் 1:46-49]

46. அப்பொழுது மரியாள்: என் ஆத்துமா கர்த்தரை மகிமைப்படுத்துகிறது,

47. என் ஆவி என் இரட்சகராகிய தேவனில் களிகூருகிறது.

48. அவர் தம்முடைய அடிமையின் தாழ்மையை நோக்கிப்பார்த்தார்; இதோ, இதுமுதல் எல்லாச் சந்ததிகளும் என்னைப் பாக்கியவதி என்பார்கள்.

49. வல்லமையுடையவர் மகிமையானவைகளை எனக்குச் செய்தார்; அவருடைய நாமம் பரிசுத்தமுள்ளது.[லூக் 1:46-49]

இவ்வளவுக்கு பிறகும், "தான் தனது தந்தையினுடைய அலுவல்களில்  ஈடுபட்டுக் கொண்டிருக்க வேண்டும்" என்று இயேசு கூறியதை மரியாள் உணரவில்லை.

கிழக்கிலிருந்து வந்த ஞானிகள் [இவர்கள் சௌராஷ்டிரா (Zorastrian) என்னும் இனத்தில் சோதிடம், கனவுகளுக்கு பொருள் கூறுதல்,மந்திர வித்தைகள் செய்தல் போன்ற செயல்களில் ஈடுபடும் ஒரு பிரிவினர்] குழந்தை இயேசுவை வணங்கி,அவருக்கு பொன்னும் சாம்பிராணியும் வெள்ளைப் போளமும் பரிசாக அளித்ததை மரியாளும் யோசேப்பும் மறந்துவிட்டனர்.

11 வீட்டிற்குள் அவர்கள் போய்க் குழந்தையை அதன் தாய் மரியா வைத்திருப்பதைக் கண்டார்கள்; நெடுஞ்சாண்கிடையாய் விழுந்து குழந்தையை வணங்கினார்கள்; தங்கள் பேழைகளைத் திறந்து பொன்னும் சாம்பிராணியும் வெள்ளைப் போளமும் காணிக்கையாகக் கொடுத்தார்கள்.[மத் 2:11]

11. அவர்கள் அந்த வீட்டுக்குள் பிரவேசித்து, பிள்ளையையும் அதின் தாயாகிய மரியாளையும் கண்டு, சாஷ்டாங்கமாய் விழுந்து அதைப் பணிந்துகொண்டு, தங்கள் பொக்கிஷங்களைத் திறந்து, பொன்னையும் தூபவர்க்கத்தையும் வெள்ளைப்போளத்தையும் அதற்குக் காணிக்கையாக வைத்தார்கள்.[மத் 2:11]

ஒரு இறைத்தூதன் யோசேப்பினிடத்தில் தோன்றி,மரியாளை இயேசுவையும் அழைத்துக்கொண்டு எகிப்துக்கு சென்று விடுமாறு கூறியதையும்,ஏரோது இரண்டு வயதுக்குட்பட்ட குழந்தைகள் அனைவரையும் கொன்றதையும் கூட அவர்கள் இருவரும் மறந்துவிட்டனர்.

13 அவர்கள் திரும்பிச் சென்றபின் ஆண்டவருடைய தூதர் யோசேப்புக்குக் கனவில் தோன்றி, நீர் எழுந்து குழந்தையையும் அதன் தாயையும் கூட்டிக் கொண்டு எகிப்துக்குத் தப்பி ஓடிச் செல்லும். நான் உமக்குச் சொல்லும்வரை அங்கேயே இரும். ஏனெனில், குழந்தையை ஏரோது கொல்வதற்காகத் தேடப்போகிறான் என்றார்.[மத் 2:13]

13. அவர்கள் போனபின்பு, கர்த்தருடைய தூதன் சொப்பனத்தில் யோசேப்புக்குக் காணப்பட்டு: ஏரோது பிள்ளையைக் கொலைசெய்யத் தேடுவான்; ஆதலால் நீ எழுந்து, பிள்ளையையும் அதின் தாயையும் கூட்டிக்கொண்டு எகிப்துக்கு ஓடிப்போய், நான் உனக்குச் சொல்லும் வரைக்கும் அங்கேயே இரு என்றான்.[மத் 2:13]

 16 ஞானிகள் தன்னை ஏமாற்றியதை ஏரோது கண்டு மிகுந்த சீற்றங் கொண்டான். அவன் அவர்களிடம் கருத்தாய்க் கேட்டறிந்ததற்கேற்பக் காலத்தைக் கணக்கிட்டுப் பெத்லகேமிலும் அதன் சுற்றுப்புறமெங்கும் ஆள்களை அனுப்பி இரண்டு வயதும் அதற்கு உட்பட்டவையுமான எல்லா ஆண் குழந்தைகளையும் கொன்றான்.

16. அப்பொழுது ஏரோது தான் சாஸ்திரிகளால் வஞ்சிக்கப்பட்டதைக் கண்டு, மிகுந்த கோபமடைந்து, ஆட்களை அனுப்பி, தான் சாஸ்திரிகளிடத்தில் திட்டமாய் விசாரித்த காலத்தின்படியே, பெத்லகேமிலும் அதின் சகல எல்லைகளிலுமிருந்த இரண்டு வயதுக்குட்பட்ட எல்லா ஆண்பிள்ளைகளையும் கொலைசெய்தான்.[மத் 2:16]

எல்லாவற்றிற்கும் மேலாக "எகிப்துக்கு ஓடிச் சென்ற" நிகழ்வு தீர்க்கதரிசனம்  ஒன்று நிறைவேறிய நிகழ்வாக இருக்கிறது.அது "ஓசியா" புத்தகத்தில் உள்ளது.(தீர்க்கதரிசனம் நிறைவேறிய நிகழ்வு என்பது சாதாரண நிகழ்வு அல்ல-மொ-ர்)

1 இஸ்ரயேல் குழந்தையாய் இருந்தபோது அவன்மேல் அன்பு கூர்ந்தேன்; எகிப்திலிருந்து என் மகனை அழைத்து வந்தேன்.[ஓசேயா 11:1]

1. இஸ்ரவேல் இளைஞனாயிருந்தபோது நான் அவனை நேசித்தேன்; எகிப்திலிருந்து என்னுடைய குமாரனை வரவழைத்தேன்.[ஓசியா 11:1]

ஏன் அவர்கள் எகிப்துக்கு ஓடிச் செல்ல வேண்டும்?:

லூக்கா புத்தகத்தின் படி,ஏரோது மன்னன் பெத்லகேமில் உள்ள இரண்டு வயதுக்குட்பட்ட அனைத்து ஆண் குழந்தைகளையும் கொல்லும் பொழுது ஆபத்தான பெத்லகேமுக்கு அருகில் கூட இல்லை.காரணம் அவர்கள் நாசரேத்துக்கு சென்று விட்டனர்.

39 ஆண்டவருடைய திருச்சட்டப்படி எல்லாவற்றையும் செய்துமுடித்த பின்பு அவர்கள் கலிலேயாவிலுள்ள தங்கள் ஊராகிய நாசரேத்துக்குத் திரும்பிச் சென்றார்கள்.[லூக் 2:39]

39. கர்த்தருடைய நியாயப்பிரமாணத்தின்படி சகலத்தையும் அவர்கள் செய்து முடித்தபின்பு, கலிலேயா நாட்டிலுள்ள தங்கள் ஊராகிய நாசரேத்துக்குத் திரும்பிப்போனார்கள்.[லூக் 2:39]

வசனம் ஒன்று நிறைவேறுகிறது என்று காட்டுவதற்காகவே, பிறந்த உடனேயே குழந்தையை அழைத்துக்கொண்டு எகிப்துக்கு சென்று விட்டதாக மத்தேயு கூறுகிறார்.உடனே அழைத்து சென்ற நிகழ்வு,"தீர்க்கதரிசனம் ஒன்று  நிறைவேறுகிறது" என்று இயேசுவின் பெற்றோர்களுக்கும் நினைவில் கொள்ளுவதற்கு சுலபமாக இருக்கும்.குறைந்தபட்சம் இந்த "எகிப்துக்கு சென்ற நிகழ்வையாவது" இயேசுவின் பெற்றோர் நினைத்துப்பார்த்திருக்க வேண்டும்.

ஆனால்,லூக்கா வேறுவிதமாக கூறுகிறார்.எப்படியென்றால், குழந்தை பிறந்தவுடன் நாற்பது நாட்கள் எருசலேமில் இருக்கும்படி செய்து விடுகிறார்.(காரணம் லேவியராகமம் 12:1-8-ன் படி விருத்தசேதனம் செய்வதற்காக).இதன்பிறகே அவர்கள் லூக் 2:39-ன் படி நாசரேத் திரும்பும்படி செய்கிறார்.

22 மோசேயின் சட்டப்படி தூய்மைச் சடங்கை நிறைவேற்றவேண்டிய நாள் வந்தபோது குழந்தையை ஆண்டவருக்கு அர்ப்பணிக்க அவர்கள் எருசலேமுக்குக் கொண்டு சென்றார்கள்.[லூக் 2:22]

22. மோசேயின் நியாயப்பிரமாணத்தின்படியே அவர்களுடைய சுத்திகரிப்பின் நாட்கள் நிறைவேறினபோது,
23. முதற்பேறான எந்த ஆண்பிள்ளையும் கர்த்தருக்குப் பரிசுத்தமானதென்னப்படும் என்று கர்த்தருடைய நியாயப்பிரமாணத்தில் எழுதியிருக்கிறபடி அவரைக் கர்த்தருக்கென்று ஒப்புக்கொடுக்கவும்,
24. கர்த்தருடைய நியாயப்பிரமாணத்தில் சொல்லியிருக்கிறபடி, ஒரு ஜோடு காட்டுப்புறாவையாவது இரண்டு புறாக்குஞ்சுகளையாவது பலியாகச் செலுத்தவும், அவரை எருசலேமுக்குக் கொண்டுபோனார்கள்.[லூக் 2:22-24]

(மேற்கூறியவைகளில் இருந்து புரிந்து கொள்ளவேண்டியது என்னவென்றால்,லூக்காவின் எழுத்துப்படி குழந்தை பிறந்து 40 நாட்கள் அவர்கள் எருசலேமில் இருந்துவிட்டு பின்னர் நாசரேத் சென்று விட்டனர்.மத்தேயுவின் எழுத்துப்படி அவர்கள் குழந்தை பிறந்த உடனே எகிப்துக்கு சென்று விட்டனர்.இப்பொழுது இதில் உள்ள முரண்பாட்டை புறந்தள்ளிவிட்டு நாம் கவனித்தோமானால்,நமக்கு தெரிவது மத்தேயுவின் "தீர்க்கதரிசனம் நிறைவேறும் நிகழ்வு" ஆகும்.கோவிலில்,இயேசுவின் தாயார் இயேசுவைத் திட்டுவதற்கு முன்னர் இந்த குறிப்பிட்ட நிகழ்வையாவது அவர் நினைத்துப்பார்த்திருக்க வேண்டும்.ஏன்? ஏனென்றால், இயேசு தீர்க்கதரிசனம் ஒன்றை நிறைவேற்றி இருக்கிறார்,அதனால் அவர் தெய்வ குழந்தை,அவரை நாம் திட்டக்கூடாது என்று மரியாள் நினைத்துப்பார்த்திருக்க வேண்டும் - மொழிபெயர்ப்பாளர்)

எல்லாவற்றிற்கும் மேலாக, இயேசுவின் பெற்றோரிடம் மேய்ப்பர்கள்(இடையர்கள்) கூறியதை அவர்கள் மறந்தே போய்விட்டனர்.

8 அப்பொழுது அப்பகுதியில் உள்ள வயல்வெளியில் இடையர்கள் தங்கி இரவெல்லாம் தங்கள் கிடையைக் காவல் காத்துக்கொண்டிருந்தார்கள்.

9 திடீரென்று ஆண்டவருடைய தூதர் அவர்கள்முன் வந்து நின்றபோது ஆண்டவரின் மாட்சி அவர்களைச் சுற்றி ஒளிர்ந்தது; மிகுந்த அச்சம் அவர்களை ஆட்கொண்டது.

10 வானதூதர் அவர்களிடம், “அஞ்சாதீர்கள், இதோ, எல்லா மக்களுக்கும் பெரும் மகிழ்ச்சியூட்டும் நற்செய்தியை உங்களுக்கு அறிவிக்கிறேன்.

11 இன்று ஆண்டவராகிய மெசியா என்னும் மீட்பர் உங்களுக்காகத் தாவீதின் ஊரில் பிறந்திருக்கிறார்.

12 குழந்தையைத் துணிகளில் சுற்றித் தீவனத் தொட்டியில் கிடத்தியிருப்பதைக் காண்பீர்கள்; இதுவே உங்களுக்கு அடையாளம்” என்றார்.

13 உடனே விண்ணகத் தூதர் பேரணி அந்தத் தூதருடன் சேர்ந்து, “உன்னதத்தில் கடவுளுக்கு மாட்சி உரித்தாகுக!

14 உலகில் அவருக்கு உகந்தோருக்கு அமைதி உண்டாகுக!” என்று கடவுளைப் புகழ்ந்தது.

15 வானதூதர் அவர்களைவிட்டு விண்ணகம் சென்றபின்பு, இடையர்கள் ஒருவரையொருவர்நோக்கி, “வாருங்கள், நாம் பெத்லகேமுக்குப் போய் ஆண்டவர் நமக்கு அறிவித்திருக்கின்ற இந்த நிகழ்ச்சியைப் பார்ப்போம்;” என்று சொல்லிக்கொண்டு,

16 விரைந்து சென்று மரியாவையும் யோசேப்பையும் தீவனத் தொட்டியில் கிடத்தியிருந்த குழந்தையையும்; கண்டார்கள்.

17 பின்பு அந்தக் குழந்தையைப் பற்றித் தங்களுக்குச் சொல்லப்பட்ட செய்தியைத் தெரிவித்தார்கள்.

18 அதைக் கேட்ட யாவரும், இடையர்கள் தங்களுக்குச் சொன்னவற்றைக் குறித்து வியப்படைந்தனர்.

19 ஆனால் மரியா இந்நிகழ்ச்சிகளையெல்லாம் தம் உள்ளத்தில் இருத்திச் சிந்தித்துக் கொண்டிருந்தார்.[லூக் 2:8-19]

11. இன்று கர்த்தராகிய கிறிஸ்து என்னும் இரட்சகர் உங்களுக்குத் தாவீதின் ஊரிலே பிறந்திருக்கிறார்.

12. பிள்ளையைத் துணிகளில் சுற்றி, முன்னணையிலே கிடத்தியிருக்கக்காண்பீர்கள்; இதுவே உங்களுக்கு அடையாளம் என்றான்.

13. அந்தக்ஷணமே பரமசேனையின் திரள் அந்தத் தூதனுடனே தோன்றி:

14. உன்னதத்திலிருக்கிற தேவனுக்கு மகிமையும், பூமியிலே சமாதானமும், மனுஷர்மேல் பிரியமும் உண்டாவதாக என்று சொல்லி, தேவனைத் துதித்தார்கள்.

15. தேவதூதர்கள் அவர்களை விட்டுப் பரலோகத்துக்குப் போனபின்பு, மேய்ப்பர்கள் ஒருவரையொருவர் நோக்கி: நாம் பெத்லகேம் ஊருக்குப் போய், நடந்ததாகக் கர்த்தரால் நமக்கு அறிவிக்கப்பட்ட இந்தக் காரியத்தைப் பார்ப்போம் வாருங்கள் என்று சொல்லி,

16. தீவிரமாய் வந்து, மரியாளையும், யோசேப்பையும், முன்னணையிலே கிடத்தியிருக்கிற பிள்ளையையும் கண்டார்கள்.

17. கண்டு, அந்தப் பிள்ளையைக் குறித்துத் தங்களுக்குச் சொல்லப்பட்ட சங்கதியைப் பிரசித்தம்பண்ணினார்கள்.

18. மேய்ப்பராலே தங்களுக்குச் சொல்லப்பட்டதைக் கேட்ட யாவரும் அவைகளைக்குறித்து ஆச்சரியப்பட்டார்கள்.[லூக் 2:11-18]

மரியாளிடமும் யோசேப்பிடமும் இறைத்தூதர்கள் தோன்றிய  போது தாங்கள் எவ்வாறு ஆச்சரியப்பட்டோம் என்பதை பத்து மாதங்கள் கழிந்த பின்னர்  மறந்துவிட்டனர்.குழந்தை பிறந்து ஒரு மதம் ஆனபோது நடந்த சில நிகழ்வுகள் அதை நமக்கு உணர்த்துகிறது.குறிப்பாக,இயேசு இன்னும் ஒரு மாத குழந்தையாக இருக்கும் பொழுதே,சிமியோன் என்பவனும் பானுவேலின் மகளாகிய அன்னாளும் குழந்தையாகிய இயேசுவின் வருங்காலத்தைக் குறித்து பேசியதை அவர்கள் மறந்தே போய்விட்டனர்.

25 அப்போது எருசலேமில் சிமியோன் என்பவர் இருந்தார். அவர் நேர்மையானவர்; இறைப்பற்றுக் கொண்டவர்; இஸ்ரயேலுக்கு வாக்களிக்கப்பட்ட ஆறுதலை எதிர்பார்த்திருந்தவர்; தூய ஆவியை அவர் பெற்றிருந்தார்.

26 “;ஆண்டவருடைய மெசியாவைக் காணுமுன் அவர் சாகப்போவதில்லை” என்று தூய ஆவியால் உணர்த்தப்பட்டிருந்தார்.

27 அந்த ஆவியின் தூண்டுதலால் அவர் கோவிலுக்கு வந்திருந்தார். திருச்சட்ட வழக்கத்திற்கு ஏற்பச் செய்ய வேண்டியதைக் குழந்தை இயேசுவுக்குச் செய்து முடிக்கப் பெற்றோர் அதனை உள்ளே கொண்டுவந்தபோது.

28 சிமியோன் குழந்தையைக் கையில் ஏந்திக் கடவுளைப் போற்றி,

29 “ஆண்டவரே, உமது சொற்படி உம் அடியான் என்னை இப்போது அமைதியுடன் போகச் செய்கிறீர்.

30 ஏனெனில் மக்கள் அனைவரும் காணுமாறு,

31 நீர் ஏற்பாடு செய்துள்ள உமது மீட்பை என் கண்கள் கண்டுகொண்டன.

32 இம்மீட்பே பிற இனத்தாருக்கு வெளிப்பாடு அருளும் ஒளி; இதுவெ உம் மக்களாகிய இஸ்ரயேலுக்குப் பெருமை” என்றார்.

33 குழந்தையைக் குறித்துக் கூறியவை பற்றி அதன் தாயும் தந்தையும் வியப்புற்றனர்.

34 சிமியோன் அவர்களுக்கு ஆசிகூறி, அதன் தாயாகிய மரியாவை நோக்கி, “இதோ, இக்குழந்தை இஸ்ரயேல் மக்களுள் பலரின் வீழ்ச்சிக்கும் எழுச்சிக்கும் காரணமாக இருக்கும்; எதிர்க்கப்படும் அடையாளமாகவும் இருக்கும்.

35 இவ்வாறு பலருடைய மறைவான எண்ணங்கள் வெளிப்படும். உமது உள்ளத்தையும் ஒரு வாள் ஊடுருவிப் பாயும்” என்றார்.

36 ஆசேர் குலத்தைச் சேர்ந்த பானுவேலின் மகளாகிய அன்னா என்னும் இறைவாக்கினர் ஒருவர் இருந்தார். அவர் வயது முதிர்ந்தவர்; மணமாகி ஏழு ஆண்டுகள் கணவரோடு வாழ்ந்தபின் கைம்பெண் ஆனவர்;

37 அவருக்கு வயது எண்பத்து நான்கு. அவர் கோவிலைவிட்டு நீங்காமல் நோன்பிருந்து மன்றாடி அல்லும் பகலும் திருப்பணி செய்துவந்தார்.

38 அவரும் அந்நேரத்தில் அங்கு வந்து கடவுளைப் புகழ்ந்து எருசலேமின் மீட்புக்காகக் காத்திருந்த எல்லாரிடமும் அக்குழந்தையைப்பற்றிப் பேசினார்.[லூக் 2:25-38]

25. அப்பொழுது சிமியோன் என்னும் பேர்கொண்ட ஒரு மனுஷன் எருசலேமில் இருந்தான்; அவன் நீதியும் தேவபக்தியும் உள்ளவனாயும், இஸ்ரவேலின் ஆறுதல் வரக்காத்திருக்கிறவனாயும் இருந்தான்; அவன் மேல் பரிசுத்த ஆவி இருந்தார்.

26. கர்த்தருடைய கிறிஸ்துவை நீ காணுமுன்னே மரணமடையமாட்டாய் என்று பரிசுத்த ஆவியினாலே அவனுக்கு அறிவிக்கப்பட்டுமிருந்தது.

27. அவன் ஆவியின் ஏவுதலினால் தேவாலயத்திலே வந்திருந்தான். இயேசு என்னும் பிள்ளைக்காக நியாயப்பிரமாணமுறைமையின்படி செய்வதற்குத் தாய் தகப்பன்மார் அவரை உள்ளே கொண்டுவருகையில்,

28. அவன் அவரைத் தன் கைகளில் ஏந்திக்கொண்டு தேவனை ஸ்தோத்திரித்து:

29. ஆண்டவரே, உமது வார்த்தையின்படி உமது அடியேனை இப்பொழுது சமாதானத்தோடே போகவிடுகிறீர்;

30. புறஜாதிகளுக்குப் பிரகாசிக்கிற ஒளியாகவும், உம்முடைய ஜனமாகிய இஸ்ரவேலுக்கு மகிமையாகவும்,

31. தேவரீர் சகல ஜனங்களுக்கும் முன்பாக ஆயத்தம்பண்ணின

32. உம்முடைய இரட்சணியத்தை என் கண்கள் கண்டது என்றான்.

33. அவரைக்குறித்துச் சொல்லப்பட்டவைகளுக்காக யோசேப்பும் அவருடைய தாயாரும் ஆச்சரியப்பட்டார்கள்.

34. பின்னும் சிமியோன் அவர்களை ஆசீர்வதித்து, அவருடைய தாயாகிய மரியாளை நோக்கி: இதோ, அநேகருடைய இருதய சிந்தனைகள் வெளிப்படத்தக்கதாக, இஸ்ரவேலில் அநேகர் விழுகிறதற்கும் எழுந்திருக்கிறதற்கும், விரோதமாகப் பேசப்படும் அடையாளமாவதற்கும், இவர் நியமிக்கப்பட்டிருக்கிறார்.

35. உன் ஆத்துமாவையும் ஒரு பட்டயம் உருவிப்போகும் என்றான்.

36. ஆசேருடைய கோத்திரத்தாளும், பானுவேலின் குமாரத்தியுமாகிய அன்னாள் என்னும் ஒரு தீர்க்கதரிசி இருந்தாள்; அவள் கன்னிப்பிராயத்தில் விவாகமானதுமுதல் ஏழுவருஷம் புருஷனுடனே வாழ்ந்தவளும், அதிக வயதுசென்றவளுமாயிருந்தாள்.

37. ஏறக்குறைய எண்பத்துநாலு வயதுள்ள அந்த விதவை தேவாலயத்தை விட்டு நீங்காமல், இரவும் பகலும் உபவாசித்து, ஜெபம்பண்ணி, ஆராதனை செய்துகொண்டிருந்தாள்.

38. அவளும் அந்நேரத்திலே வந்து நின்று, கர்த்தரைப் புகழ்ந்து, எருசலேமிலே மீட்புண்டாக காத்திருந்த யாவருக்கும் அவரைக்குறித்துப் பேசினாள்.[லூக் 2:25-38]

மேற்கூறியவைகள் அனைத்தும் உண்மையான வரலாற்று நிகழ்வுகளாக இருக்குமாயின்,இயேசுவின் அதிசயமான பிறப்பைக்குறித்து  அவருடைய ஊழிய காலங்களிலும் அவருடைய கடைசி காலங்களிலும் ஒருவர் கூட,அவருடைய சொந்தபந்தங்களில் இருந்தும் கூட, ஏன் பேச வில்லை?

54 தமது சொந்த ஊருக்கு வந்து அங்குள்ள தொழுகைக் கூடத்தில் அவர்களுக்குக் கற்பித்தார். அதைக் கேட்டவர்கள் வியப்பில் ஆழ்ந்தார்கள். அவர்கள், “எங்கிருந்து இந்த ஞானம் இவருக்கு வந்தது? எப்படி இந்த வல்ல செயல்களைச் செய்கிறார்?

55 இவர் தச்சருடைய மகன் அல்லவா? இவருடைய தாய் மரியா என்பவர்தானே? யாக்கோப்பு, யோசேப்பு, சீமோன், யூதா ஆகியோர் இவருடைய சகோதரர் அல்லவா?[மத்  13:54,55]

54. தாம் வளர்ந்த ஊரிலே வந்து, அவர்களுடைய ஜெப ஆலயத்திலே உபதேசம்பண்ணினார். அவர்கள் ஆச்சரியப்பட்டு: இவனுக்கு இந்த ஞானமும் பலத்த செய்கைகளும் எப்படி வந்தது?
55. இவன் தச்சனுடைய குமாரன் அல்லவா? இவன் தாய் மரியாள் என்பவள் அல்லவா? யாக்கோபு யோசே சீமோன் யூதா என்பவர்கள் இவனுக்குச் சகோதரர் அல்லவா?[மத் 13:54,55]

உண்மையிலேயே தான் கன்னியாக இருக்கும்பொழுதே இயேசு தன்னிடத்தில் உற்பத்தியாகி இருந்தால்,இயேசு யார் என்பதைக் குறித்து மரியாளுக்கு ஒரு சிறு கேள்வியேனும்  வந்திருக்க வேண்டும்.தன குடும்பத்தில் நெருங்கியவர்களிடமாவது இதைப்பற்றி அவள் கூறியிருக்கமாட்டாளா?ஆனாலும் இயேசுவின் உறவினர்கள் அவரைப்பிடிக்க வரும்பொழுது கூட,மரியாள் அவர்களிடம்(பிடிக்க வருபவர்களுடன் மரியாளும் பின்னர் சேர்ந்து வருகிறாள்),இயேசு அவர்கள் நினைப்பது போல் மதிமயங்கியவர் அல்ல என்று கூறவில்லை?

21 அவருடைய உறவினர் இதைக் கேள்விப்பட்டு, அவரைப் பிடித்துக்கொண்டுவரச் சென்றார்கள். ஏனெனில் அவர் மதிமயங்கி இருக்கிறார் என்று மக்கள் பேசிக் கொண்டனர்.[மாற் 3:21]

21. அவருடைய இனத்தார் இதைக்கேட்டபோது, அவர் மதிமயங்கியிருக்கிறார் என்று சொல்லி அவரைப் பிடித்துக்கொள்ளும்படி வந்தார்கள்.[மாற் 3:21]

31 அப்பொழுது அவருடைய தாயும் சகோதரர்களும் வந்து வெளியே நின்று கொண்டு அவரை வரச் சொல்லி ஆள் அனுப்பினார்கள்.[மாற் 3:31]

31. அப்பொழுது அவருடைய சகோதரரும், தாயாரும் வந்து, வெளியே நின்று, அவரை அழைக்கும்படி அவரிடத்தில் ஆள் அனுப்பினார்கள்.[மாற் 3:31]

இயேசுவின் சகோதரர்கள் கூட அவரை நம்ப வில்லை என்று யோவானின் நற்செய்தி புத்தகம்  வெளிப்படையாக கூறுகிறது.

5 ஏனெனில் அவருடைய சகோதரர்கள்கூட அவரிடம் நம்பிக்கை கொள்ளவில்லை.[யோ 7:5]

5. அவருடைய சகோதரரும் அவரை விசுவாசியாதபடியால் இப்படிச் சொன்னார்கள்.[யோ 7:5]

இயேசுவின் தெய்வீக தன்மையைக் குறித்து அவருடைய  சகோதரர்களிடம் கூட மரியாள்  கூறியிருக்க மாட்டாரா? இயேசுதான் "மேசியா",அவரை நீங்கள் நம்ப வேண்டும்,அவ்வாறு செய்வதன் மூலம் இரட்சிப்பை பெற வேண்டும் என்று மரியாள் அவருடைய மற்ற குழந்தைகளுக்குக் கூட  கூறியிருக்க மாட்டார் என்பது நம்பும்படியாக இருக்கிறதா?

இயேசுவைப்பற்றி மரியாளுடைய கருத்துதான் என்ன?:

நற்செய்தி புத்தகங்களில் மரியாள் பற்றி வரும் இடங்களில்,தான் கன்னியாய் இருக்கும் பொழுதே இயேசுவை கர்ப்பந்தரித்ததன் காரணமாக,அவர் ஒரு "கடவுளின் குழந்தை" என்று பொருள்படும்படி எப்பொழுதாவது கூறியிருக்கிறாரா என்றால்,அதற்கான அறிகுறியே இல்லை எனலாம்.

3 திருமண விழாவில் திராட்சை இரசம் தீர்ந்து போகவே இயேசுவின் தாய் அவரை நோக்கி, “திராட்சை இரசம் தீர்ந்துவிட்டது” என்றார்.

4 இயேசு அவரிடம், “அம்மா, அதைப் பற்றி நாம்                 என்ன  செய்யமுடியும்? எனது நேரம் இன்னும் வரவில்லையே” என்றார்.[யோ 2:3,4]

3. திராட்சரசம் குறைவுபட்டபோது, இயேசுவின் தாய் அவரை நோக்கி: அவர்களுக்குத் திராட்சரசம் இல்லை என்றாள்.

4. அதற்கு இயேசு: ஸ்திரீயே, எனக்கும் உனக்கும் என்ன, என் வேளை இன்னும் வரவில்லை என்றார்.[யோ 2:3,4]

31 அப்பொழுது அவருடைய தாயும் சகோதரர்களும் வந்து வெளியே நின்று கொண்டு அவரை வரச் சொல்லி ஆள் அனுப்பினார்கள்.

32 அவரைச் சூழ்ந்து மக்கள் கூட்டம் அமர்ந்திருந்தது. “அதோ, உம் தாயும் சகோதரர்களும் சகோதரிகளும் வெளியே நின்று கொண்டு உம்மைத் தேடுகிறார்கள்” என்று அவரிடம் சொன்னார்கள்.

33 அவர் அவர்களைப் பார்த்து, “என்தாயும் என் சகோதரர்களும் யார்? என்று கேட்டு,

34 தம்மைச் சூழ்ந்து அமர்ந்திருந்தவர்களைச் சுற்றிலும் பார்த்து, “இதோ! என் தாயும் என் சகோதரர்களும் இவர்களே.

35 கடவுளின் திருவுளத்தை நிறைவேற்றுபவரே என் சகோதரரும் சகோதரியும் தாயும் ஆவார்” என்றார்.[மாற் 3:31-35]

 31. அப்பொழுது அவருடைய சகோதரரும், தாயாரும் வந்து, வெளியே நின்று, அவரை அழைக்கும்படி அவரிடத்தில் ஆள் அனுப்பினார்கள்.

32. அவரைச் சுற்றிலும் உட்கார்ந்திருந்த ஜனங்கள் அவரை நோக்கி: இதோ, உம்முடைய தாயாரும் உம்முடைய சகோதரரும் வெளியே நின்று உம்மைத் தேடுகிறார்கள் என்றார்கள்.

33. அவர்களுக்கு அவர் பிரதியுத்தரமாக: என் தாயார் யார்? என் சகோதரர் யார்? என்று சொல்லி,

34. தம்மைச்சூழ உட்கார்ந்திருந்தவர்களைச் சுற்றிப் பார்த்து: இதோ, என் தாயும் என் சகோதரரும் இவர்களே!

35. தேவனுடைய சித்தத்தின்படி செய்கிறவன் எவனோ அவனே எனக்குச் சகோதரனும், எனக்குச் சகோதரியும், எனக்குத் தாயுமாய் இருக்கிறான் என்றார்.[மாற் 3:31-35]

இயேசு ஒரு தெய்வீக தன்மை கொண்டவர் என்று பொருள் படும்படி மரியாள் ஒரு போதும் இயேசுவின் சீடர்களிடம் பேசவில்லை என்பது தெளிவாகிறது. 

உண்மையில்,இயேசு தன்னுடைய உயிர்த்தெழுதலின் மூலமாக மட்டுமே "கடவுளின் குழந்தையாக" மாறினாரே அன்றி "கன்னிப் பிறப்பின் மூலம் அவர் "கடவுளின் மகனாக" மாறினார் என்று இயேசுவின் ஆரம்ப கால சீடர்கள் கூறியிருக்கின்றனர்.

மரித்தோரிலிருந்து உயிர்தெழுந்ததன் மூலமே இயேசு "கடவுளின் மகனாக" மாறினார் பவுல் அறிவிக்கிறார்.

4 தூய ஆவியால் ஆட்கொள்ளப்பட்ட நிலையில் வல்லமையுள்ள இறைமகன். இவர் இறந்து உயிர்த்தெழுந்ததால் இந்த உண்மை நிலைநாட்டப்பட்டது. இவரே நம் ஆண்டவர் இயேசு கிறிஸ்து.[உரோ 1:4]

5. மாம்சத்தின்படி தாவீதின் சந்ததியில் பிறந்தவரும், பரிசுத்தமுள்ள ஆவியின்படி தேவனுடைய சுதனென்று மரித்தோரிலிருந்து உயிர்த்தெழுந்ததினாலே பலமாய் ரூபிக்கப்பட்ட தேவகுமாரனுமாயிருக்கிறார்.[ரோ 1:4]

32 இயேசுவைக் கடவுள் உயிர்த்தெழச் செய்ததன் வழியாக மூதாதையருக்கு அளித்த வாக்குறுதியை அவர்கள் பிள்ளைகளாகிய நமக்கென நிறைவேற்றினார். இதுவே நாங்கள் உங்களுக்கு அறிவிக்கும்  நற்செய்தி. 

33 இதுபற்றி இரண்டாம் திருப்பாடலில், “நீரே என் மகன், இன்று நான் உம்மை ஈன்றெடுத்தேன்” என்று எழுதப்பட்டுள்ளது.[தி.ப.13:32,33]

32. நீர் என்னுடைய குமாரன், இன்று நான் உம்மை ஜநிப்பித்தேன் என்று இரண்டாம் சங்கீதத்தில் எழுதியிருக்கிறபடியே,

33. இயேசுவை எழுப்பினதினாலே தேவன் நம்முடைய பிதாக்களுக்கு அருளிச்செய்த வாக்குத்தத்தத்தை அவர்களுடைய பிள்ளைகளாகிய நமக்கு நிறைவேற்றினார் என்று நாங்களும் உங்களுக்குச் சுவிசேஷமாய் அறிவிக்கிறோம்.[அப் 13:32,33]

முதல் நூற்றாண்டின் மூன்றாம் பகுதிக்கு முன்னர் வரை ,"கன்னி பிறப்பு" என்ற தத்துவம்  கிறித்தவ  எழுத்துக்களில் ஒரு பாதிப்பையும் ஏற்படுத்தவில்லை.கிறித்தவ எழுத்துக்களின் அடிப்படையில்,இயேசுவின் குடும்பத்தினரோ, முதல் கிறித்தவர்களோ, ஏன், மரியாளோ கூட "கன்னிப்பிறப்பை அறிந்திருந்தனர் என்பது சந்தேகமே.

அவர் அவர்களிடம் “நீங்கள் ஏன் என்னைத் தேடினீர்கள்? நான் என் தந்தையின் அலுவல்களில் ஈடுபட்டிருக்க வேண்டும் என்பது உங்களுக்குத் தெரியாதா?” என்றார்.

ஆம்!அவர்களுக்கு தெரியாது.தங்கள் மகனுடைய ஆச்சரியமான "கருத்தரிப்பைக்" குறித்து தாங்கள் ஒருபோதும் கேள்விப்படாத காரணத்தினால் அவர்களுக்கு தெரியவில்லை.

இக்கதையில் வரும் முக்கியமான பாத்திரங்கள் அனைத்தும் இறந்த பிறகே இந்த "கன்னிப் பிறப்பு" கதை புழக்கத்திற்கு வந்திருக்க வேண்டும் என்பதில் சந்தேகமே இல்லை.

© Gerald Sigal

"Jews for Judaism.com" என்ற பக்கத்திலிருந்து தமிழில் மொழிபெயர்த்தவர்: இரா.இருதயராஜ்.

இக்கட்டுரையை பதிவிறக்கம் செய்ய:
https://drive.google.com/file/d/1aRnMF405NJzvKSb0Wh3bTjob539AjQFZ/view?usp=sharing