மீகா 2:3-ஒரு விளக்கம்

மீகா 2:3-ஒரு விளக்கம் 

மொழிபெயர்ப்பு என்பது மிகவும் சிக்கலான வேலை ஆகும்.ஒரு மொழியில் எழுதப்பட்டவற்றை மற்றொரு மொழிக்கு மாற்றம் செய்யும் பொழுது மூல மொழியில் சொல்லப்பட்டுள்ள கருத்துக்கள் சிறிதும் மாற்றம் செய்யப்படாமல் செய்வது என்பது சவால் நிறைந்த செயல் ஆகும்.

மொழிபெயர்ப்பவர் தம்மை அறியாமலையே தன்னுடைய கருத்துக்களை திணிப்பதற்கு வாய்ப்புக்கள் அதிகம் உள்ளது.மொழிபெயர்ப்பவர் தான் சரியாகவே செய்துள்ளதாக நினைப்பார்.ஆனால் மூல மொழியில் புலமைபெற்றோர் எவரையாவது கொண்டு சோதனை செய்யும் பொழுது அத்தவறுகள் வெளிப்படும்.

மொழி என்பது இருதயத்தின் உள்ளே பொதிந்துள்ளவைகளை பேச்சாகவும் எழுத்தாகவும் மாற்றக்கூடிய ஒரு கருவி ஆகும்.மனிதர்களின் இருதயம் ஒருவருக்கொருவர் மாறுபடக்கூடியது.விருப்பு,வெறுப்பு போன்ற எவையும் இல்லாமல் மொழிபெயர்க்கும் பொழுது கூட அறியாமல் தவறு நடந்து விட வாய்ப்பு உள்ளது.

அவ்வாறு ஒரு தவறு மீகா தீர்க்கதரிசியின் புத்தகத்தினுடைய தமிழாக்கத்தில் ஒரு குறிப்பிட்ட வசனத்தில் இருப்பதாக நான் நினைக்கிறேன்.அந்த வசனத்தை நாம் முதலில் காணலாம்.

ஆகையால் கர்த்தர்: நான் இந்த வம்சத்தாருக்கு விரோதமாய்த் தீமையை வருவிக்க நினைக்கிறேன்; அதினின்று நீங்கள் கழுத்தை நீக்கமாட்டீர்கள்; நீங்கள் மேட்டிமையாய் நடப்பதில்லை; அது தீமையான காலம்.[மீகா 2:3]

மீகா ஒரு சிறிய தீர்க்கதரிசி ஆவார்.இவர் எசேக்கியா அரசன் அரசாண்ட காலகட்டத்தில் வாழ்ந்தவர் ஆவார்.யூத,இஸ்ரயேல் மக்களுடைய தீமையான செயல்களினிமித்தம் கடவுள் அவர்களுக்கு தீங்கு செய்ய நினைக்கிறார்.இதுதான் மேற்கூறிய வசனத்தின் பொருள்.மேற்கூறிய வசனத்தில் என்னதான் மொழிபெயர்ப்பு தவறு உள்ளது? அதை நாம் தெரிந்து கொள்வதற்கு இந்த வசனத்தின் பல மொழிபெயர்ப்புகளை நாம் காணலாம்.

முதலில் NIV மொழிபெயர்ப்பை பார்ப்போம்.

Therefore, the Lord says:

“I am planning disaster against this people,

    from which you cannot save yourselves.

You will no longer walk proudly,

    for it will be a time of calamity.

இதனுடைய தமிழாக்கம்:"இந்த மக்களுக்கு எதிராக அழிவை நான் நினைத்திருக்கிறேன்.அதிலிருந்து நீங்கள் உங்களை தப்புவிக்க முடியாது.அது ஒரு அழிவு காலமாக இருப்பதினால்,நீங்கள் இனிமேல் கர்வமாக நடக்கமாட்டீர்கள்".

அடுத்ததாக CJB மொழிபெயர்ப்பை காணலாம்.

Therefore this is what Adonaisays:

“Against this family I am planning an evil
from which you will not withdraw your necks;
nor will you walk with your heads held high,
for it will be an evil time.”

இதனுடைய தமிழாக்கம்: "எனவே ஆண்டவர் கூறுகிறார்,இந்த குடும்பத்திற்கு எதிராக நான் தீங்கை நினைத்திருக்கிறேன்.அதிலிருந்து நீங்கள் உங்கள் கழுத்துக்களை நீக்க முடியாது.நீங்கள் தலைநிமிர்ந்து நடக்கவும் மாட்டீர்கள்.ஏனென்றால் அது மிகவும் தீங்கான காலம்." 

அடுத்து KJV மொழிபெயர்ப்பை காணலாம்.

Therefore thus saith the Lord; Behold, against this family do I devise an evil, from which ye shall not remove your necks; neither shall ye go haughtily: for this time is evil.

இதனுடைய தமிழாக்கம்:"எனவே கர்த்தர் கூறுகிறார்;இந்த குடும்பத்திற்கு எதிராக ஒரு தீங்கை நான் நினைத்திருக்கிறேன்,அதிலிருந்து உங்கள் கழுத்துக்களை உங்களால் நீக்க முடியாது.பெருமையாய் நடக்கவும் மாட்டீர்கள் காரணம் அது தீங்கான காலம்.

இந்த மூன்று மொழிபெயர்ப்புகளில் இருந்தும் நமக்கு தெரிய வருவது என்னவென்றால் ஒரே ஒரு வார்த்தை மட்டும் வேறுபடுகிறது மற்ற அனைத்து வார்த்தைகளும் சமமான பொருளையே தருகிறது.கர்வம்,தலைநிமிர்ந்து,பெருமை ஆகிய மூன்று வார்த்தைகள்தான்.

உண்மையில் இந்த மூன்று வார்த்தைகளும் ஒரு ஹீப்ரு வார்த்தையின் மொழிபெயர்ப்புகள்தான்.அந்த ஹீப்ரு வார்த்தை "רוֹמָ֔ה" ஆகும்.இதற்குரிய எண் s7317 ஆகும்.இதன் பொருளில்தான் இத்தனை வேறுபாடுகள்.பல்வேறு அகராதிகளில் ஒவ்வொரு விதமாக கொடுத்துள்ளனர்.நான் ஸ்ட்ராங்க்(STRONG) அகராதியை எடுத்துள்ளேன்.

இந்த வார்த்தை 7317-ன் வேர்ச்சொல் 7311-ல் உள்ளது.இவ்வார்த்தையின் மொழிபெயர்ப்பு மிகவும் சிக்கல்தான்.இந்த குறிப்பிட்ட வசனம் கூறும் சூழ்நிலையை கருத்தில் கொண்டு நாம் மொழிபெயர்த்தால் சிக்கல் சிறிது குறைய வாய்ப்பு உள்ளது.7317-ன் பொருளை நாம் பார்ப்போம்.

இதன் உச்சரிப்பு :  rowm; 
இதன் பொருள்    :elation,i.e. (adverbially) proudly -- haughtily.
தமிழில்                :பெரும் மகிழ்ச்சி,மகிழ்வான 

வேர்ச்சொல்லின் உச்சரிப்பு       : room
இதன் பொருள்                            : to be high or exalted, rise
தமிழில்   : உயர்வான நிலையில் இரு,உயர்த்தப்பட்டிரு,உயர்ந்திரு.

"elation" என்ற ஆங்கில வார்த்தையின் பொருள் "மகிழ்வான மனநிலையை" குறிக்கும் ஒன்றாகும்.கர்வம்,மேட்டிமை போன்ற சொற்களை நாம் "மகிழ்வான" சூழ்நிலையை குறிக்க பயன்படுத்த மாட்டோம்.தமிழில் அவைகள் பயன்படுத்தப்படவேண்டிய இடத்தை நாம் அறிவோம்.

இங்கு எந்த சூழ்நிலையை வசனம் விளக்குகிறது என்றால்.ஒரு தீங்கான,ஆபத்து நிலைமையை விவரிக்கின்றது.கடவுள் அந்த ஆபத்தை வருவிக்கப்போகிறார்.ஆபத்துகள் இல்லாத நிலையில் நாம் எப்படி இருப்போம்?மகிழ்வாக இருப்போம் அவ்வளவுதான்.

அதாவது கடவுள் வருவிக்கப்போகும் அந்த ஆபத்தான சூழ்நிலையில் மக்கள் தங்கள் தலைகளை தொங்க விட்டு,கவலையுடன் இருப்பார்கள்.இதுதான் அந்த வசனம் கூறும் பொருள்.ஆபத்தின் காரணமாக தலைநிமிர்ந்து நடக்க இயலாது.எனவே CJB மொழிபெயர்ப்பு சரியாக இருக்கும் என நான் நினைக்கிறேன்.

இந்த வசனத்தில் வரக்கூடிய "நீங்கள் மேட்டிமையாய் நடக்க மாட்டீர்கள்"என்ற வார்த்தை,அக்குறிப்பிட்ட வசனம் கூறக்கூடிய சூழ்நிலைக்கு பொருந்தவில்லை என்று நான் நினைக்கின்றேன்.ஆபத்து வருவதற்கு முன்னாள் மக்கள் தலைநிமிர்ந்து நடப்பார்கள்.அதாவது அவர்கள் யாருக்கும் அடிமைகளாகாமல் சுய மரியாதையோடு இருப்பார்கள்.ஆபத்து வந்த பின்னர் தங்கள் சுயமரியாதையை இழப்பார்கள். அதாவது தலைகுனிவார்கள்,வெட்கமடைவார்கள், மரியாதைக்குறைவிற்கு உட்படுவார்கள்.இப்படிப்பட்ட நிலைக்கு கடவுள் அவர்களை தாழ்த்தபோகிறார்.இதைத்தான் அந்த வசனம் குறிப்பிடுகிறது.

ஒரு மகிழ்வான சூழ்நிலை இனி இருக்காது என்பதைத்தான் அவ்வசனம் குறிக்கிறது."தலைநிமிர்ந்து" என்ற வார்த்தை பயன்படுத்தப்பட்டிருந்தால் மிக நன்றாக இருந்திருக்கும்.

இரா.இருதயராஜ்.

இக்கட்டுரையை பதிவிறக்கம் செய்ய:
https://drive.google.com/file/d/1qRDEFIKC93NqOeMbTYeZmcJTulcl_TaM/view?usp=sharing

ஏசாயா என்னும் மாபெரும் தீர்க்கதரிசி

ஏசாயா என்னும் மாபெரும் தீர்க்கதரிசி 

பெரும் தீர்க்க தரிசிகளில் முதலாவதாக வருபவர் ஏசாயா ஆவார்.இவர் உசியா,யோதாம்,ஆகாஸ்,எசேக்கியா போன்ற யூத அரசர்கள் அரசாண்ட காலகட்டங்களில் வாழ்ந்தவர்.இவருடைய புத்தகங்கள் மீண்டும் மீண்டும் நம்மை படிக்க தூண்டும் அளவில் மிக அருமையாக எழுதியிருப்பார்.இப்புத்தகத்தில் உவமைகள் நிரம்பி கிடக்கும்.நம்மால் கற்பனை செய்ய முடியாத அளவுக்கு உவமைகள் பயன்படுத்தப்பட்டிருக்கும்.

கடவுளாகிய கர்த்தர் இத்தீர்க்கதரிசியைக் கொண்டு சொல்லிய வார்த்தைகள் ஈட்டி போல் நம் இருதயத்தில் இறங்கும்.அப்படிப்பட்ட ஒரு வசனம் மட்டும் பார்த்து விட்டு இக்கட்டுரையின் நோக்கத்திற்கு நாம் செல்லலாம்.

அவன் தனக்குக் கேதுருக்களை வெட்டுகிறான்; ஒரு மருதமரத்தையாவது கர்வாலிமரத்தையாவது, தெரிந்துகொண்டு, காட்டுமரங்களிலே பெலத்த மரத்தைத் தன் காரியத்துக்காக வளர்க்கிறான்; அல்லது அசோகமரத்தை நடுகிறான், மழை அதை வளரச்செய்யும்.

மனுஷனுக்கு அவைகள் அடுப்புக்காகும்போது, அவன் அவைகளில் எடுத்துக் குளிர்காய்கிறான்; நெருப்பைமூட்டி அப்பமும் சுடுகிறான்; அதினால் ஒரு தெய்வத்தையும் உண்டுபண்ணி, அதைப் பணிந்துகொள்ளுகிறான்; ஒரு விக்கிரகத்தையும் அதினால் செய்து, அதை வணங்குகிறான்.

அதில் ஒரு துண்டை அடுப்பில் எரிக்கிறான்; ஒரு துண்டினால் இறைச்சியைச் சமைத்துப் புசித்து, பொரியலைப்பொரித்து திருப்தியாகி, குளிருங்காய்ந்து: ஆஆ, அனலானேன்; நெருப்பைக் கண்டேன் என்று சொல்லி;

அதில் மீதியான துண்டைத் தனக்கு விக்கிரகதெய்வமாகச் செய்து, அதற்குமுன் விழுந்து, அதை வணங்கி; நீ என் தெய்வம், என்னை இரட்சிக்க வேண்டும் என்று அதை நோக்கி மன்றாடுகிறான்.

அறியாமலும் உணராமலுமிருக்கிறார்கள்; காணாதபடிக்கு அவர்கள் கண்களும், உணராதபடிக்கு அவர்கள் இருதயமும் அடைக்கப்பட்டிருக்கிறது.

அதில் பாதியை அடுப்பில் எரித்தேன்; அதின் தழலின்மேல் அப்பத்தையும் சுட்டு, இறைச்சியையும் பொரித்துப் புசித்தேன்; அதில் மீதியான துண்டை நான் அருவருப்பான விக்கிரகமாக்கலாமா? ஒரு மரக்கட்டையை வணங்கலாமா என்று சொல்ல, தன் மனதில் அவனுக்குத் தோன்றவில்லை; அம்மாத்திரம் அறிவும் சொரணையும் இல்லை.[ஏசா 44:14-19]

மேற்கூறிய வார்த்தைகளை என்னவென்று சொல்வது? ஒரு மனிதன் மனவருத்தத்தோடு பேசுவது போன்று எல்லாம் வல்ல இறைவன் தீர்க்கதரிசி மூலமாக பேசுகிறார்.எண்ணற்ற தீர்க்கதரிசனங்களை கொண்டுள்ள இப்புத்தகத்தில் வியக்கத்தக்க தீர்க்க தரிசனம் ஒன்று உள்ளது.

ஒரு அரசன் இன்னும் பிறக்க வில்லை.பேரரசு ஒன்றை அவன் ஆளப்போகிறான் என்று சுமார் 200 வருடங்களுக்கு முன்பே கூறியிருக்கிறார்.அதிலும் வியப்புக்குரிய செய்தி என்னவென்றால்,அந்த அரசனுடைய பெயர் மட்டுமல்ல,அவனை தான்தான் திருமுழுக்கு செய்து உள்ளேன் என்றும் கூறுகிறார்.யார் அவன்? அவன் கோரேஸ் என்ற அரசன்.

தொடர்ந்து இந்த கோரேஸ்  பற்றிய தீர்க்க தரிசனத்தை நாம் பார்ப்போம்.அதற்க்கு முன்னால் ஏசாயா தீர்க்க தரிசி எசேக்கியா அரசன் காலத்தில் முழுமையாக வாழ்கிறார்.இந்த அரசனுடைய காலத்தில் அக்குறிப்பிட்ட தீர்க்கதரிசனத்தை அவர் கூறுகிறார்.

கோரேசைக் குறித்து: அவன் என் மேய்ப்பன்; அவன் எருசலேமை நோக்கி: நீ கட்டப்படு என்றும்; தேவாலயத்தை நோக்கி: நீ அஸ்திபாரப்படு என்றும் சொல்லி, எனக்குப் பிரியமானதையெல்லாம் நிறைவேற்றுவான் என்று சொல்லுகிறவர் நான்.[ஏசா 44:28]

எசேக்கியா அரசன் காலத்தில் யூத மக்கள் இன்னும் பாபிலோனுக்கு சிறைப்பட்டு செல்ல வில்லை என்பதை நாம் மனதில் கொள்ள வேண்டும்.எசேக்கியா அரசன் ஏறத்தாழ ஒரு நல்ல ஆட்சியை கொடுத்தவன் ஆவான்.மேற்கூறிய வசனம் சொல்லப்பட்டிருக்கும் பொழுது தீர்க்கதரிசி எதனைப்பற்றி பேசுகிறார் என்று கூட தெரிந்திருக்காது.ஏனென்றால் கோரேஸ் இன்னும் பிறக்கவே இல்லை.

எருசலேம் நகரம் அந்த பொழுதில் நன்றாகவே இருக்கிறது,எனவே "கட்டப்பட்டு" என்று ஏன் கூறுகிறார்? என்று குழம்பியிருக்கக் கூடும்.அழிக்கப்பட்டிருந்தால்தானே கட்டப்படுவதற்கு.பின்னர் தேவாலயத்தைப் பற்றி கூறுகிறார்.தேவாலயம் ஏன் அஸ்திபாரப்பட வேண்டும்? அதுதான் நன்றாகவே இருக்கிறதே?சாலமோன் கட்டிய கோவில் மிக நன்றாகவே உள்ளது.பின் ஏன் இப்படி கூறினார்?இவ்வாறு மக்கள் குழம்பியிருக்கக்கூடும்.

எசேக்கியா காலத்தில் இத்தீர்க்கதரிசனத்தை மிகவும் விசித்திரமாக மக்கள் கருத்தியிருக்கக்கூடும்.எசேக்கியா ஓரளவுக்கு நன்றாகவே ஆட்சி செய்து கொண்டிருந்தான்.

எசேக்கியாவுக்கு மிகுதியான ஐசுவரியமும் கனமும் உண்டாயிருந்தது; வெள்ளியும் பொன்னும் இரத்தினங்களும் கந்தவர்க்கங்களும் கேடகங்களும் விநோதமான ஆபரணங்களும் வைக்கும்படியான பொக்கிஷசாலைகளையும்,

தனக்கு வந்துகொண்டிருந்த தானியமும் திராட்சரசமும் எண்ணெயும் வைக்கும்படியான பண்டகசாலைகளையும், சகலவகையுள்ள மிருகஜீவன்களுக்குக் கொட்டாரங்களையும், மந்தைகளுக்குத் தொழுவங்களையும் உண்டாக்கினான்.

அவன் தனக்குப் பட்டணங்களைக் கட்டுவித்து ஏராளமான ஆடுமாடுகளை வைத்திருந்தான்; தேவன் அவனுக்கு மகாதிரளான ஆஸ்தியைக் கொடுத்தார்.

இந்த எசேக்கியா கீயோன் என்னும் ஆற்றிலே அணைகட்டி, அதின் தண்ணீரை மேற்கேயிருந்து தாழத் தாவீதின் நகரத்திற்கு நேராகத் திருப்பினான்; எசேக்கியா செய்ததெல்லாம் வாய்த்தது.[2 நாளா 32:27-30]

ஓரளவுக்கு நல்ல ஆட்சியை கொடுத்திருந்ததற்கு மேற்கூறிய வசனங்கள் சாட்சி.எனவே யூத நாட்டு மக்கள் தங்கள் நாட்டில் இந்த அரசனின் ஆட்சி காலத்தில் ஓரளவிற்கு அமைதியாகவே வாழ்ந்து வந்தனர்.இந்த சூழ்நிலையில்தான் மேற்கூறப்பட்ட தீர்க்க தரிசனம் வருகிறது.இதற்க்கு முன்பாகவே யூத மக்கள் பாபிலோனுக்கு சிறைப்பட்டு போவார்கள் என்று கடவுள் அறிவித்திருப்பார்.

இதோ, நாட்கள் வரும்; அப்பொழுது உன் வீட்டில் உள்ளதிலும், உன் பிதாக்கள் இந்நாள்வரைக்கும் சேர்த்ததிலும் ஒன்றும் மீதியாய் வைக்கப்படாமல் எல்லாம் பாபிலோனுக்குக் கொண்டுபோகப்படும்.[ஏசா 39:6]

மேற்கூறப்பட்ட வசனங்கள் மூலமாக நாம் தெரிந்து கொள்ள வேண்டியது என்னவென்றால்,

• எசேக்கியா அரசன் காலத்தில் மக்கள் நன்றாகவே இருந்தனர்.
• இன்னும் பாபிலோனுக்கு சிறைப்பட்டு செல்ல வில்லை.
• ஆனால் பாபிலோனுக்கு சிறைபிடித்து கொண்டு போகப்படுவார்கள் என்று தீர்க்க தரிசனம் உரைக்கப்பட்டு விட்டது.
• 39-ம் அதிகாரத்தில் பாபிலோனுக்கு சிறைபிடிக்கப்பட்டு கொண்டுபோகப்படுவார்கள் என்று கூறிய தீர்க்கதரிசி,44-ம் அதிகாரத்தில் அவர்கள் கோரேஸ்  என்ற மன்னனால் விடுவிக்கப்படுதலைப்பற்றி பேசுகிறார்.
• இவை அனைத்தும் ஏறத்தாழ 200 வருடங்களுக்கு பின்னர் நடைபெறப்போகும் நிகழ்வுகளாகும்.

எப்படி 200 வருடங்களுக்கு பின்னர் நடைபெறப்போகும் நிகழ்வு என்று கூறுகிறோம்? கோரேஸ் என்ற மன்னன் இன்னும் பிறக்க வில்லை.அவன் பெயர் முதற்கொண்டு கூறப்பட்டாயிற்று.எப்படி என்று பார்ப்போம்.எசேக்கியா அரசனுக்கு பின்னர்,

• மனாசே   -  55 வருடங்கள் 
• ஆமோன் -   2 வருடங்கள் 
• யோசியா -  31 வருடங்கள் 
• யோவகாஸ் -3 மாதங்கள் 
• யோயாக்கீம் - 11 வருடங்கள் 
• யோயாக்கீன் - 3 மாதங்கள் 
• சிதேக்கியா    - 11 வருடங்கள் 
• ஆக மொத்தம் சுமார் 166 வருடங்கள்.

ஏசா 39:6 வசனம் சுமார் 166 வருடங்கள் கழித்து நிறைவேறுகிறது.சிதேக்கியா அரசனுடைய காலத்தில் பாபிலோன் மன்னன் யூதாவை சிறைப்படுத்துகிறான்.என்ன ஒரு தீர்க்கதரிசனம் பாருங்கள்!

கடவுள் தன்னுடைய ஊழியக்காரர்களை எப்படி பயன்படுத்துகிறார் என்று பாருங்கள்.166 வருடங்கள் கழித்து ஒரு தீர்க்கதரிசனம் நிறைவேறும் பொழுது,இடைப்பட்ட காலத்தில் அப்படி அந்த தீர்க்கதரிசனம் நிறைவேற வாய்ப்பில்லை என்றே பெரும்பாலும் நினைக்க தோன்றும்.ஆனால் மிக துல்லியமாக நிறைவேறி உள்ளது.

அடுத்துதான் மிகப்பெரும் ஆச்சரியம் காத்திருக்கிறது.யூதா இப்பொழுது பாபிலோனுக்கு சிறைப்பட்டு சென்று விட்டது.அவர்கள் சில காலம் அங்கெ தங்கி இருக்க வேண்டும் என்றும் பின்னர் அவர்கள் விடுவிக்க படுவார்கள் என்றும் கூட தீர்க்க தரிசனம் கூறப்படுகிறது.யாரால் அவர்கள் விடுவிக்கப்படுவார்கள் என்றும் கூறப்படுகிறது.

இந்த சூழ்நிலையில்தான் ஏசாயாவுக்கு தன்னுடைய மக்கள் சிறைபிடிக்கப்பட்டு போவதையும்,எருசலேம் அளிப்பட்டு போவதையும் குறித்து நிறைய தீர்க்க தரிசனங்களை உரைக்கிறார்.பாபிலோன் நாடு கடவுளுடைய மக்களையும் கடவுளுடைய பெயர் தெரிந்து கொள்ளப்பட்ட நகரமான எருசலேமையும் துன்பப்படுத்தியதைக் குறித்து வருத்தப்பட்டு அது தொடர்பாக எண்ணற்ற தீர்க்கதரிசனங்களை கூறுகிறார்.பாபிலோனை சாடுகிறார்.ஏசா 47-ம் அதிகாரம் முழுவதும் இதைப்பற்றித்தான் உள்ளது. 48:20-ல் கீழ்கண்டவாறு கூறுகிறார்,

பாபிலோனிலிருந்து புறப்படுங்கள்; கல்தேயரைவிட்டு ஓடிவாருங்கள்; கர்த்தர் தம்முடைய தாசனாகிய யாக்கோபை மீட்டுக்கொண்டாரென்று சொல்லுங்கள்; இதைக் கெம்பீரசத்தமாய்க் கூறிப் பிரசித்தப்படுத்துங்கள் பூமியின் கடையாந்தரமட்டும் வெளிப்படுத்துங்கள் என்கிறார்[ஏசா 48:20]

யூத மக்கள் பாபிலோனில் 70 வருடங்கள் இருக்க வேண்டும் என்றும் அதற்க்கு பின்னர் அவர்கள் விடுவிக்க படுவார்கள் என்றும் எரேமியா தீர்க்கதரிசியும் கூறியிருப்பார்.ஏசாயா தீர்க்கதரிசி 70 வருடங்கள் என்று கூறாவிட்டாலும்,பாபிலோனில் இருந்து விடுவிக்கப்படுவார்கள் என்பதை தெளிவு படுத்தி இருப்பார். 

பாபிலோனிலே எழுபதுவருஷம் நிறைவேறினபின்பு நான் உங்களைச் சந்தித்து, உங்களை இவ்விடத்துக்குத் திரும்பிவரப்பண்ணும்படிக்கு உங்கள்மேல் என் நல்வார்த்தையை நிறைவேறப்பண்ணுவேன் என்று கர்த்தர் சொல்லுகிறார்[எரே 29:10]

ஆகவே ஏற்கனவே 166 வருடங்கள் பின்னர் பாபிலோனில் 70 வருடங்கள்,மொத்தம் 236 வருடங்கள் கழித்து நடக்க போகும் ஒரு நிகழ்வை 39:6-ல் ஏசாயா கூறுகிறார்.ஆச்சரியம் என்னவென்றால் இவை அனைத்தும் ஒரு அமைதியான காலகட்டத்தில் கூறப்படுகின்றன. 

யாரைக்கொண்டு இந்நிகழ்வை நடத்துவேன் என்றும் கடவுள் ஏசாயா மூலமாகவே கூறுகிறார் பாருங்கள்.

கோரேசைக் குறித்து: அவன் என் மேய்ப்பன்; அவன் எருசலேமை நோக்கி: நீ கட்டப்படு என்றும்; தேவாலயத்தை நோக்கி: நீ அஸ்திபாரப்படு என்றும் சொல்லி, எனக்குப் பிரியமானதையெல்லாம் நிறைவேற்றுவான் என்று சொல்லுகிறவர் நான்.

தொடர்ந்து இந்த கோரேஸ்  என்ற மன்னனை குறித்து கடவுள் கூறுகிறார்.இந்த கோரேஸ் மன்னன் 200 வருடங்கள் கழித்துதான் பிறக்கவே போகிறான் என்பதை நினைவில் கொள்ளுங்கள்.எங்கோ ஒரு நாட்டில் சுமார் 200 வருடங்கள் கழித்து பிறக்க போகும் ஒருவனுடைய பெயரையும் கூட கடவுள் ஏசாயா மூலமாக கூறிவிட்டார்.ஏறத்தாழ 45-ம் அதிகாரம் முழுமையும் அவனைப்பற்றிய உள்ளது.

கர்த்தராகிய நான் அபிஷேகம்பண்ணின கோரேசுக்கு முன்பாக ஜாதிகளைக் கீழ்ப்படுத்தி, ராஜாக்களின் இடைக்கட்டுகளை அவிழ்க்கும்படிக்கும், அவனுக்கு முன்பாக வாசல்கள் பூட்டப்படாதிருக்க, கதவுகளைத் திறந்துவைக்கும்படிக்கும், அவனைப்பார்த்து, அவன் வலதுகையைப் பிடித்துக்கொண்டு, அவனுக்குச் சொல்லுகிறதாவது:

நான் உனக்கு முன்னே போய், கோணலானவைகளைச் செவ்வையாக்குவேன்.

உன்னைப் பெயர்சொல்லி அழைக்கிற இஸ்ரவேலின் தேவனாகிய கர்த்தர் நானே என்று நீ அறியும்படிக்கு,

வெண்கலக் கதவுகளை உடைத்து, இருப்புத் தாழ்ப்பாள்களை முறித்து, அந்தகாரத்தில் இருக்கிற பொக்கிஷங்களையும், ஒளிப்பிடத்தில் இருக்கிற புதையல்களையும் உனக்குக் கொடுப்பேன்; நான் என் தாசனாகிய யாக்கோபினிமித்தமும், நான் தெரிந்துகொண்ட இஸ்ரவேலினிமித்தமும், நான் உன்னைப் பெயர்சொல்லி அழைத்து, நீ என்னை அறியாதிருந்தும் உனக்கு நாமம் தரித்தேன்.[ஏசா 45:1-4]

நான் நீதியின்படி அவனை எழுப்பினேன்; அவன் வழிகளையெல்லாம் செவ்வைப்படுத்துவேன்; அவன் என் நகரத்தைக் கட்டி, சிறைப்பட்டுப்போன என்னுடையவர்களைக் கிரயமில்லாமலும் பரிதானமில்லாமலும் விடுதலையாக்குவான் என்று சேனைகளின் கர்த்தர் சொல்லுகிறார்.[ஏசா 45:13]

கர்த்தரே கடவுள் என்பதற்கு இதற்க்கு மேலும் என்ன நிரூபம் வேண்டும்? ஏசாயா எந்த கடவுளின் பெயரால் தீர்க்கதரிசனம் உரைத்தாரோ அந்த கடவுளே மெய்யான கடவுள் என்பதற்கு இதைவிட வேறு என்ன சாட்சி வேண்டும்? சுமார் 200 வருடங்கள் கழித்து எங்கோ பிறக்க போகும் ஒருவனுடைய பெயரை சொல்லி அவன் என்ன செய்வான் என்பதையும் கூறின இஸ்ரேலின் கடவுளே மெய்யான கடவுளன்றி வேறு யார்?

சரி இத்தீர்க்க தரிசனம் நிறைவேறியதை எஸ்ரா புத்தகத்தில் நாம் பார்க்கலாம்.

எரேமியாவின் வாயினாலே கர்த்தர் சொன்ன வார்த்தை நிறைவேறும்படி, பெர்சியாவின் ராஜாவாகிய கோரேசுடைய முதலாம் வருஷத்திலே, கர்த்தர் பெர்சியாவின் ராஜாவாகிய கோரேசின் ஆவியை ஏவினதினாலே அவன்:

பரலோகத்தின் தேவனாகிய கர்த்தர் பூமியின் ராஜ்யங்களையெல்லாம் எனக்குத் தந்தருளி, யூதாவிலுள்ள எருசலேமிலே தமக்கு ஆலயத்தைக்கட்டும்படி எனக்குக் கட்டளையிட்டிருக்கிறார்.

அவருடைய ஜனங்கள் எல்லாரிலும் எவன் உங்களுக்குள் இருக்கிறானோ, அவனோடே அவனுடைய தேவன் இருப்பாராக; அவன் யூதாவிலுள்ள எருசலேமுக்குப்போய், இஸ்ரவேலின் தேவனாகிய கர்த்தருடைய ஆலயத்தைக் கட்டக்கடவன், எருசலேமில் வாசம்பண்ணுகிற தேவனே தேவன்.

அந்த ஜனங்களில் மீதியாயிருக்கிறவன் எவ்விடத்தில் தங்கியிருக்கிறானோ, அவ்விடத்து ஜனங்கள் எருசலேமிலுள்ள தேவனுடைய ஆலயத்துக்கென்று அவனிடத்தில் உற்சாகமாய்க் காணிக்கை கொடுத்து அனுப்புகிறதுமன்றி, அவனுக்குப் பொன் வெள்ளி முதலிய திரவியங்களையும், மிருகஜீவன்களையும் கொடுத்து, உதவிசெய்யவேண்டும் என்று பெர்சியாவின் ராஜாவாகிய கோரேஸ் அறிவிக்கிறார் என்று தன் ராஜ்யமெங்கும் எழுதியனுப்பி விளம்பரம்பண்ணுவித்தான்[எஸ்ரா 1:1-4]

சரி எப்படி இது நிறைவேறியது என்பதை நாம் காணலாம்.முதலில் யார் இந்த கோரேஸ்  அரசன்?தானி 10:1-ஐ பார்க்கலாம்.

பெர்சியாவின் ராஜாவாகிய கோரேஸ் அரசாண்ட மூன்றாம் வருஷத்திலே பெல்தெஷாத்சார் என்று பெயரிடப்பட்ட தானியேலுக்கு ஒரு காரியம் வெளியாக்கப்பட்டது; அந்தக் காரியம் சத்தியமும் நீடிய யுத்தத்துக்கு அடுத்ததுமாயிருக்கிறது; அந்தக் காரியத்தை அவன் கவனித்து, தரிசனத்தின் பொருளை அறிந்துகொண்டான்.[தானி 10:1]

எனவே இந்த கோரேஸ்  என்பவன் பெர்சியா அரசனாவான்.இவன் ஒரு பேரரசன்.இவன் எப்படி பாபிலோனை கைப்பற்றினான் என்று நிறைய வரலாற்று புத்தகங்கள் உள்ளன.இவனை "கோரேஸ் தி கிரேட்" என்று வரலாற்று ஆய்வாளர்கள் அழைக்கின்றனர்.

பாபிலோன் ஒரு பேரரசு என்பது நமக்கு ஏற்கனவே தெரியும்.கைப்பற்றவே முடியாத ஒரு வலிமையான தேசம்.இத்தேசத்தின் கோட்டை சுவர்கள் மிகவும் வலிமையானவை.அவ்வளவு எளிதில் உடைக்க முடியாது.பக்கத்தில் உள்ள படத்தை பாருங்கள்.பழங்கால பாபிலோன் இப்படித்தான் இருந்திருக்கும் என்பது தொல்லியல் ஆய்வாளர்களின் கற்பனை.தன் கோட்டை சுவர்களை மூன்றடுக்குகளாக பாபிலோன் கட்டியிருந்தது.

இப்படி நுழையவே முடியாத அளவுக்கு வலிமையாக இருந்த இந்த பாபிலோன் எப்படி வீழும் என்பதையும் ஏசாயா தீர்க்கதரிசி 13-ம் அதிகாரத்தில் குறிப்பிடுகிறார்.

இதோ, நான் அவர்களுக்கு விரோதமாய் மேதியரை எழுப்புவேன்; அவர்கள் வெள்ளியை மதியாமலும், பொன்னின்மேல் பிரியப்படாமலும்,

வில்லுகளால் இளைஞரைச் சிதைத்துவிடுவார்கள்; கர்ப்பக்கனியின்மேல் அவர்கள் இரங்குவதில்லை; அவர்கள் கண் பிள்ளைகளைத் தப்பவிடுவதுமில்லை.

ராஜ்யங்களுக்குள் அலங்காரமும் கல்தேயருடைய பிரதான மகிமையுமாகிய பாபிலோனானது தேவனால் சோதோமும் கொமோராவும் கவிழ்க்கப்பட்டதுபோல கவிழ்க்கப்படும்.[ஏசா 13:17-19]

இந்த 13-ம் அதிகாரம் முழுவதும் பாபிலோனின் அழிவைப்பற்றியே பேசுகிறது.என்ன ஒரு தீர்க்கதரிசனம்!200 வருடங்களுக்கு பின்னர் நடக்க இருக்கும் ஒரு பெரும் வரலாற்று நிகழ்வு கடவுளால் ஏசாயா மூலமாக கூறப்படுகிறது.

பாபிலோன் கைப்பற்றப்பட்ட விதமும் ஆச்சரியமிக்க ஒரு நிகழ்வாகும்.ஏற்கனவே கூறிப்படி பாபிலோன் வலிமையான கோட்டைசுவர்களை கொண்டிருந்தது.யாராலும் உள்ளே நுழையமுடியாத அளவுக்கு கட்டப்பட்டிருந்தது.அதனால் தன்னை ஒருவராலும் வீழ்த்த முடியாது என்ற அகங்காரத்தையும் கொண்டிருந்தது இந்த பாபிலோன்.எதைப்பற்றியும் ஏசாயா,எரேமியா போன்ற தீர்க்க தரிசிகள் விளக்கியிருக்கின்றனர்.

இந்த பாபிலோன் நகரத்தின் வழியே யூப்ரடீஸ் என்ற ஒரு ஆறு ஓடி கொண்டிருந்தது.தண்ணீர் இதில் எப்பொழுதும் கரைபுரண்டு ஓடிக்கொண்டிருக்கும்.எனவே இந்த ஆறு இந்நகரத்திற்கு ஒரு இயற்கையான அரணாக இருந்தது.கோட்டை சுவர்களை உடைக்க முடியாது.ஆற்றை கடக்க முடியாது.கோரேஸ்  மன்னன் செய்த செயல் என்ன தெரியுமா?ஆறு நகரத்திற்குள் நுழையும் இடத்திற்கு சிறிது தொலைவுக்கு முன்னாள் தன்னுடைய பெரும் படையைக்கொண்டு ஆற்றின் போக்கை திருப்பி விட்டான்.பின்னர் வற்றிப்போன ஆற்றின் வழியாக நகரத்திற்குள் நுழைந்து அதை கைப்பற்றினான்.

தன்னை யாராலும் வீழ்த்த முடியாது என்ற நம்பிக்கையில் கோட்டைக்கதவுகளை அப்போதைய பாபிலோனின் மன்னன் திறந்தே வைத்திருந்ததாக சில கதைகளும் உள்ளன.ஒரே இரவில் உள்ளே நுழைந்து பாபிலோனிய மன்னனை கொன்று அந்நகரை கோரேஸ் கைப்பற்றினான்.

முடிவுரை:

கடவுளாகிய கர்த்தர் ஒருவரே இறைவன்,அவரை தவிர வேறு கடவுள் கிடையாது என்று அனைவரும் உணரும் படியாக மேற்கூறிய தீர்க்கதரிசனங்கள் உள்ளன.

நானே கர்த்தர், வேறொருவரில்லை; என்னைத்தவிர தேவன் இல்லை.

என்னைத்தவிர ஒருவரும் இல்லையென்று சூரியன் உதிக்கிற திசையிலும், அது அஸ்தமிக்கிற திசையிலும் அறியப்படும்படிக்கு நீ என்னை அறியாதிருந்தும், நான் உனக்கு இடைக்கட்டு கட்டினேன்; நானே கர்த்தர், வேறொருவர் இல்லை.[ஏசா 45:5,6]

பூமியின் எல்லையெங்குமுள்ளவர்களே, என்னை நோக்கிப்பாருங்கள்; அப்பொழுது இரட்சிக்கப்படுவீர்கள்; நானே தேவன், வேறொருவரும் இல்லை[ஏசா 45:22]

ஏசாயா தீர்க்க தரிசியின் மூலமாக பேசும் இவர் யார்? கடவுளாகிய கர்த்தர்.இந்த ஏசாயாவுக்கு "இயேசு" தெரியுமா? தெரியாது.மேற்கூறிய வசனங்களில் "கர்த்தர்" என்ற வார்த்தை உண்மையில் கடவுளுடைய பெயராகும்.அவருடைய பெயரை கணம் செய்ய வேண்டும்,தவறுதலாக உச்சரிக்க கூடாது என்பதினால் வணக்கத்திற்குரிய அப்பெயருக்கு பதிலாக ஆங்கிலத்தில் "LORD" என்று மொழிபெயர்த்து விட்டனர்.தமிழில் "கர்த்தர்"  என்று மொழிபெயர்த்துள்ளனர்.இப்பெயர் கொண்டுள்ள ஹீப்ரு எழுத்துக்கள் י,ה,ו,ה(வலமிருந்து இடமாக படிக்கவும்) ஆகும்.இந்த எழுத்துக்களை சேர்த்து உச்சரித்தால் கிடைப்பது "இயேசு" அல்ல.பின் எப்படி இயேசுவை நாம் வணங்கினோம்? மாபெரும் சதி இதற்க்கு பின்னால் உள்ளது.

ஏசாயா மூலமாக பேசிய கடவுள் வேறு யாருமல்ல அவர் ஆபிரகாமிடம் பேசிய கடவுளே.அவரையே அனைவரும் பணிந்து கொள்ள வேண்டும்.

இரா.இருதயராஜ்.

இக்கட்டுரையை பதிவிறக்கம் செய்ய:
https://drive.google.com/file/d/1grHOcck1dfC5n0qNHS9AdU-4o6_07oo5/view?usp=sharing

ஏப்ரல்-14(சித்திரை 1) தமிழ் புத்தாண்டு என்று பைபிள் கூறுகிறதா?

ஏப்ரல்-14(சித்திரை 1) தமிழ் புத்தாண்டு என்று பைபிள் கூறுகிறதா?

           ஒவ்வொரு மொழி இனத்தவரும் அவர்களுக்குரிய புத்தாண்டை கொண்டுள்ளனர்.ஆனால் மூத்த இனங்களுள் ஒன்றான தமிழ் இனம் எந்த நாளை புத்தாண்டு என்று கொண்டாடுகிறது என்பதில் தற்போது குழப்பம் நிலவி வருகிறது.சிலர் தை முதல் நாள்தான் தமிழ் புத்தாண்டு என்கின்றனர்.வேறு சிலர் சித்திரை முதல் நாளே தமிழ் புத்தாண்டு என்கின்றனர்.எது உண்மை என்று நமக்கு தெரிய வில்லை.எது சரி என்று தமிழ் இலக்கியங்கள் கூறுகின்றனவா என்றும் நமக்கு தெரிய வில்லை.கற்றறிந்த சான்றோர்கள்தான் அதை தெளிவு படுத்த வேண்டும்.

இந்த சூழ்நிலையில் திருமறையான பைபிள் நமக்கு சில தெளிவான தகவல்களை தருகின்றது.அது என்னவென்று நாம் பார்ப்பதற்கு முன்னால்,ஆண்டொன்றை எவ்வாறு கணக்கிடுகிறார்கள் என்று நாம் தெரிந்து கொள்ள வேண்டும்.

ஒரு "ஆண்டு" என்பது நமது பூமியானது சூரியனை முழுமையாக ஒரு முறை சுற்றி வர எடுத்து கொள்ளும் நாட்கள் என்பது நமக்கு தெரிந்த தகவல்.அனைத்து மனித இனக்குழுக்களும் இம்முறையினைத்தான் பின்பற்றி தங்களுக்குரிய ஆண்டினை கணக்கிட்டுக் கொண்டனர்.அதாவது சூரியனை மையமாகக் கொண்டே வருடம் கணக்கிடப்படுகிறது.பூமியானது சூரியனை வட்டப்பாதையில் சுற்றி வருகிறது என்பது பக்கத்தில் உள்ள படத்தின் மூலம் தெரிந்து கொள்ள முடிகிறது.

வட்ட வடிவில் சுற்றும் பாதை இருப்பதினால்,எந்த புள்ளியில் ஆரம்பிப்பது என்பதுதான் புத்தாண்டை நிர்ணயிக்கிறது.வட்டத்தில் எந்த புள்ளி முதல் புள்ளி அல்லது ஆரம்பப்புள்ளி? இக்கேள்விக்கான பதிலில் வருடத்தின் முதல் நாள் எது என்பது உள்ளது.இந்த ஆரம்பப்புள்ளியை ஒவ்வொரு இனக்குழுவும் வெவ்வேறு விதமாக கைக்கொண்டு வந்துள்ளன.தமிழர்களாகிய நாம் வட்டத்தின் எந்த புள்ளியில் ஆரம்பித்தோம்? இதற்கான பதிலை நாம் பார்ப்பதற்கு முன்னர்,இந்த வட்ட பாதையின் வழியே பூமி பயணிக்கும் பொழுது என்ன நடக்கிறது என்பதை நாம் முதலில் தெரிந்து கொள்ளுவோம்.

கடவுளின் படைப்புகளில் எதை எடுப்பது எதை விடுவது?அவரின் அறிவைப்பற்றி நாம் பேச முடியுமா? தன்  தன் காலங்களில் மழை பொழிகிறது, பனி பொழிகிறது, காற்று வீசுகிறது. இவை அனைத்திற்கும் காரணம் "தானாகவே நடக்கும் பருவ நிலை மாற்றங்கள்" ஆகும்.இந்த பருவ நிலை மாற்றங்களுக்கு அடிப்படையே "சூரியனை சுற்றும் பூமி" ஆகும்.ஒரு முழு சுற்றுக்குள் இப்பருவ நிலை மாற்றங்கள் நடந்து முடிந்து விடுகின்றன.

தமிழில் கோடை காலம்,வசந்த காலம்,இலையுதிர் காலம்,மழைக்காலம் என நான்கு வகைகளாக பிரிக்கின்றனர்.சிலர் ஆறு வகை என்கின்றனர்.அவைகளுக்கிடையே சிறு வேறுபாடுகள்தான் உள்ளன.எனவே நாம் தற்போது நான்கு காலங்கள் என்றே கொள்வோம்.பெரும்பாலான இனக்குழுக்கள் காலங்களை நான்கு வகைகளாகவே பிரித்து வைத்துள்ளனர்.நாம் தற்போது புரிந்து கொள்ள வேண்டியது என்னவென்றால்,"காலங்கள் மாறுகின்றன" என்பதைத்தான்.இந்த கால நிலை மாற்றம் நடக்க வில்லை என்றால் என்னென்ன விளைவுகள் ஏற்படும் என்பதையும் நம்மால் புரிந்து கொள்ள முடியும்.அனைத்து உயிரினங்களும் இதைத்தான் நம்பியுள்ளன .கடவுளின் "அளவற்ற அறிவை" இதில் நம்மால் உணர முடியும்.

கடவுளின் "அளவற்ற அறிவை" அறிந்து கொள்ள ஒரு சில வசனங்களை நாம் பார்க்க வேண்டும்.

வெளிச்சம் பரவப்படுகிறதற்கும், கீழ்காற்று பூமியின்மேல் வீசுகிறதற்குமான வழி எங்கே?

பாழும் அந்தரவெளியுமான தரையைத் திருப்தியாக்கி, இளம்பூண்டுகளின் முளைகளை முளைக்கப்பண்ணும்படி,

பூமியெங்கும் மனுஷர் குடியில்லாத இடத்திலும், மனுஷசஞ்சாரமில்லாத வனாந்தரத்திலும் மழையை வருஷிக்கப்பண்ணி,

வெள்ளத்துக்கு நீர்க்கால்களையும், இடிமுழக்கங்களோடு வரும் மின்னலுக்கு வழிகளையும் பகுத்தவர் யார்?

மழைக்கு ஒரு தகப்பனுண்டோ? பனித்துளிகளை ஜநிப்பித்தவர் யார்?

உறைந்த தண்ணீர் யாருடைய வயிற்றிலிருந்து புறப்படுகிறது? ஆகாயத்தினுடைய உறைந்த பனியைப் பெற்றவர் யார்?[யோபு 38:24-29]

மேற்கூறிய வசனங்கள் கடவுளின் "எண்ணி பார்க்க முடியாத அறிவை" நமக்கு தெரிய படுத்துகின்றன.இந்த வார்த்தைகளை "யோபு" என்ற மனிதனிடம் கடவுள் பேசுகிறார்.இந்த வார்த்தைகளின் மூலம்  இவைகள் அனைத்தையும் படைத்தவர் "யோபுவிடம் பேசிய அந்த கடவுளே" ஆவார்.தான் ஒருவரே அனைத்தையும் படைத்ததாக அவர் கூறுகிறார்.38-ம் அதிகாரத்திலிருந்து கடைசி அதிகாரம் வரைக்கும் நாம் படித்தோமானால் இவ்வுலகத்திலுள்ள அனைத்தையும் பற்றி அவர் விவரிப்பதை நம்மால் புரிந்து கொள்ள முடியும்.

இராசிகளை அதினதின் காலத்திலே வரப்பண்ணுவாயோ? துருவச்சக்கர நட்சத்திரத்தையும் அதைச் சேர்ந்த நட்சத்திரங்களையும் வழிநடத்துவாயோ?

வானத்தின் நியமங்களை நீ அறிவாயோ? அது பூமியையாளும் ஆளுகையை நீ திட்டம்பண்ணுவாயோ?[யோபு 38:32,33]

வேறு எந்த ஒரு இலக்கியத்திலும் அல்லது மதங்களுக்குரிய புத்தகங்களிலியோ "படைப்பைப் பற்றி இவ்வளவு விரிவாக கூறியிருப்பதாக நான் நினைக்க வில்லை.மற்ற மதங்களுடைய புத்தகங்கள் அனைத்தையும் நாம் படிக்க வில்லையாயினும் "வேறு எந்த ஒரு கடவுளும் தான்தான் அனைத்தையும் படைத்தேன்" என்று இவ்வளவு விரிவாக கூற வில்லை என்று  என்னுடைய கேள்வி அறிவின் படி நான் கூறுகிறேன்.ஒவ்வொருவரும் யோபுவின் புத்தகத்தை எவ்வித விருப்பு வெறுப்பின்றி ஒருமுறை படிக்க வேண்டும்."யோபுவின் கடவுள்" என்னதான் கூறுகிறார் என்று தெரிந்து கொள்வதற்காயினும் இப்புத்தகத்தை ஒவ்வொருவரும் படிக்க வேண்டும்.

இப்பொழுது நாம் தமிழ் புத்தாண்டுக்கு வருவோம்.பூமியானது சூரியனை சுற்றி வரும் நிகழ்வுதான் "வருடம்" என்று அழைக்கப்படுகிறது.இந்த "வருடத்தின்" முதல் நாள் எது என்பதுதான் இப்பொழுது குழப்பம்.பழங்காலத்தில் வாழ்ந்த மக்கள் தங்கள் விருப்பப்படி அதை கணக்கிட்டு கொண்டனர்.தமிழர்களாகிய நமக்குத்தான் இப்பொழுது குழப்பம்.

பூமியானது சூரியனை சுற்றி வரும் வட்டப்பாதையில் முதல் புள்ளி எது என்று கடவுள் சொன்னால் நாம் நம்பித்தான் ஆக வேண்டும்.மனிதர்கள் எதிர் கருத்து கூறலாம் கடவுள் கூறினால் மறுக்க முடியாது.ஒரு வட்டத்தின் எந்த புள்ளியை வேண்டுமானாலும் முதல் புள்ளி என்று கற்பனை செய்ய மனிதர்களுக்கு அதிகாரம் உண்டு.ஆனால் குழப்பம்தான் மிஞ்சும்.கடவுள் கூறினால் அதற்க்கு அனைவரும் உடன்பட வேண்டும்.சரி,கடவுள் எங்கு அவ்வாறு கூறியிருக்கிறார்?

குழப்பங்களை தவிர்க்க நாம் இப்பொழுது "கிரிகோரியன்" நாள்காட்டியை பயன்படுத்துகிறோமே அதுபோலத்தான் பல வழிமுறைகள் இருக்கும் பொழுது அனைவராலும் ஏற்றுக்கொள்ளப்பட்ட ஒரு குறிப்பிட்ட வழிமுறையை மட்டும் நாம் பயன்படுத்துகிறோம்.நாம் இப்பொழுது ஆங்கில நாட்காட்டியை பயன்படுத்தி வருகிறோம்.எனவே மாதங்கள் அனைத்தையும் அதற்க்கு ஒப்பிட்டு பேசினால் உங்களுக்கு புரிவதற்கு சுலபமாக இருக்கும்.ஒரு சில செய்திகளை முதலில் நீங்கள் தெரிந்து கொள்ள வேண்டும்.

• திருமறையானது(பைபிள்) இஸ்ரயேல் மக்களுக்கே கொடுக்கப்பட்டது.
• அவர்களின் மொழி எபிரேயம்(ஹீப்ரு).
• அவர்களுடைய மாதங்கள் "சந்திரனைக்" கொண்டு கணக்கிடப்படுகிறது.
• அவர்களுடைய வருடத்தின் முதல் மாதம் "நிசான்" என்று அழைக்கப்படுகிறது."ஆபீப்" என்றும் அதனை அழைக்கின்றனர்.
• வருடத்தின் முதல் நாள் எப்படி கணக்கிடப்பட வேண்டும் என்று கடவுள் அவர்களுக்கு கூறியிருக்கிறார்.
• அவர்களுக்கு "கடவுளால்" கொடுக்கப்பட்ட ஒன்று நமக்கு,அதாவது தமிழர்களாகிய நமக்கு,எப்படி பொருந்துகிறது என்று நாம் காண இருக்கிறோம்.

வருடத்தின் முதல் நாள் இதுதான் என்று எங்கு கடவுள் இப்படி கூறியிருக்கிறார்?

       கர்த்தர் எகிப்து தேசத்தில் மோசேயையும் ஆரோனையும் நோக்கி:

"இந்த மாதம் உங்களுக்குப் பிரதான மாதம்; இது உங்களுக்கு வருஷத்தின் முதலாம் மாதமாய் இருப்பதாக[யாத் 12:1,2]"

ஆபிப் மாதத்தின் இந்த நாளிலே நீங்கள் புறப்பட்டீர்கள்.[யாத் 13:4]

 ஆபிப் மாதத்தைக் கவனித்திருந்து, அதில் உன் தேவனாகிய கர்த்தருக்குப் பஸ்காவை ஆசரிக்கக்கடவாய்; ஆபிப் மாதத்திலே இராக்காலத்தில் உன் தேவனாகிய கர்த்தர் உன்னை எகிப்திலிருந்து புறப்படப்பண்ணினாரே[உபா :16:1].

நன்றாக கவனித்து பாருங்கள்.வருடத்தின் முதல் நாள் எது என்று கடவுள் மோசேயிடம் கூறுகிறார்.அந்த மோசே மற்றும் ஆரோன் அதை எழுதி தங்கள் கூட்டத்தினருக்கு கொடுக்கின்றனர்.அதுதான் இன்று நம் கையில் உள்ள பைபிள்.சரி இன்று எப்படி இந்த ஆபீப் அல்லது நிசான் மதத்தை கண்டுபிடிப்பது? அதற்க்கு பதில்,எந்த நிலையில் இந்த கட்டளை கொடுக்கப்பட்டது என்று நாம் தெரிந்து கொள்ள வேண்டும்.

அப்பொழுது வாற்கோதுமை கதிர்ப்பயிரும் சணல் தாள்ப்பயிருமாயிருந்தது; அதினால் சணலும் வாற்கோதுமையும் அழிக்கப்பட்டுப்போயிற்று.

கோதுமையும் கம்பும் கதிர்விடாதிருந்ததால், அவைகள் அழிக்கப்படவில்லை.[யாத் 9:31,32]

அதாவது இஸ்ரேல் மக்கள் எகிப்து நாட்டிலிருந்து புறப்படும் பொழுது நடக்கும் நிகழ்வு இது.அந்த சூழ்நிலையில் "கோதுமையும்,கம்பும்" கதிர் விடாமல் நிற்கின்றன.மற்ற பயிர்களையெல்லாம் கடவுள் அழித்து போட்டு விட்டார்.இதை நினைவில் கொள்ளுங்கள்.எனவே இஸ்ரயேல் மக்கள் இந்த கோதுமை கதிரைப் பார்த்து ஆபீப் அல்லது நிசான் மாதத்தின் முதல் நாளை கண்டு பிடிக்கின்றனர்.மேலும் தலைமுறை தலைமுறையாக இந்த குறிப்பிட்ட நாள் கடைபிடிக்கப்பட்டு வருகிறது.அதாவது மோசேயின் நாட்களிலிருந்து இந்நாள் வரை தொடர்ச்சியாக ஆபீப் மாதத்தின் முதல் நாள் யூதர்களால் சரியாக கணக்கிடப்பட்டு வருகிறது.

ஆயிரக்கணக்கான வருடங்களாக இம்முறையினை அவர்கள்(யூதர்கள்) பின்பற்றி வருகின்றனர்.ஆங்கில நாட்காட்டியில் இந்த நிசான்(ஆபீப்) மாதம் "மார்ச்-ஏப்ரல்" மாதங்களில் வருகிறது.இந்த மாதங்கள் வசந்த காலத்தில் வருகிறது என்பதை நாம்  நினைவில் கொள்ள வேண்டும்.வசந்த காலம் என்பது மரங்கள் பூத்து குலுங்கும் காலமாகும்.குளிர் காலம் முடிந்து,ஒரு ரம்மியமான சூழ்நிலையினை இந்த வசந்த காலம் நமக்கு தரும்.கடும் குளிரின் நெடுநாட்களாக வீட்டிற்குள் அடங்கி கிடந்து தற்போது பூமியின் சுழற்சியின் காரணமாக மென்மையான வெயில் கிடைக்க ஆரம்பித்து விட்டது.எனவே திருமறையின் அடிப்படையில் வசந்த காலத்தில் வருடம் ஆரம்பிக்கிறது.

இப்பொழுது உறுதியாகி விட்டது:

தமிழ் புத்தாண்டு என்பதை நாம் ஏப்ரல் மாதத்தில்தான் கொண்டாடிக்கொண்டு வந்தோம்.இந்த மார்ச்-ஏப்ரல் மாதத்தினைத்தான் யூதர்களும் தங்களுடைய புத்தாண்டாக கொண்டுள்ளனர்.அதனை அவர்களுக்கு கொடுத்தது கடவுள் ஆவார்.என்ன ஒரு ஒற்றுமை பாருங்கள்.வசந்த காலத்தில்தான் நாமும் வருடப்பிறப்பைக் கொண்டுள்ளோம்.நம்முடைய முன்னோர்களும் சரியாகத்தான் கணக்கிட்டுள்ளனர்.தேதி மாறுபட்டாலும் காலம் ஒன்றாக உள்ளது.எனவே ஏப்ரல் மாதத்தில்தான் தமிழ் வருடப்பிறப்பு இருக்க வேண்டும்.ஏன் தை மாதம் என்று மாற்றினார்கள் என்று எனக்கு தெரிய வில்லை.

திருமறையின் அடிப்படையில் தை மாதம் என்பது நமக்கு புத்தாண்டு அல்ல.மேலும் தை மாதம் என்பது புத்தாண்டாக இருக்க வாய்ப்பில்லை என்பதற்கு சில காரணங்கள்..

• தை  மாதம் குளிர் காலத்தில் வருகிறது.
• பூமியின் வட பகுதிகளில் இந்த குளிர் காலம் என்பது மிக கடுமையாக இருக்கும்.
• இந்த கடுமையான குளிர் காலங்களில் பயிர்கள் செழித்து வளராது.
• நாம் பூமத்திய கோட்டுக்கு பக்கத்தில் இருப்பதினால் இந்த கடுங்குளிரில் தாக்கம் நமக்கு தெரியாது.
• பொதுவாக இந்த கடுங்குளிர் காலத்தில் அனைவரும் வீட்டுக்குள் முடங்கியே கிடப்பர்.
• எனவே தை மாதம் என்பது புத்தாண்டாக இருக்க வாய்ப்பில்லை.
• இல்லை,தை மாதம்தான் புத்தாண்டு என்று நாம் நினைத்தால்,கடவுள் வேறு விதமாக கூறியிருக்கிறார்.

புத்தாண்டை வசந்த காலத்தில் வைக்கும் படி கடவுளே கூறியிருக்கும் பொழுது நாம் அதனை மாற்ற இயலாது.நமது மனித அறிவின் படி பார்த்தாலும்,வீட்டுக்குள் முடங்கி கிடக்கும் ஒரு சோம்பேறித்தனமான காலத்தினை புத்தாண்டு என்று கடைபிடிக்க இயலாது.

எனவே தமிழ் புத்தாண்டு என்பது ஏப்ரல் மாதத்தில்தான் வருகிறது.மிகச்சரியாக எந்த தேதியில் வருகிறது என்பது சற்று மாறுபடும். அதற்கும் பல காரணங்கள் உள்ளன.சித்திரை மாதமே தமிழர்களின் புது வருட பிறப்பு என்று திருமறை கூறுகிறது என்று இப்பொழுது கூறலாம்.இந்த மாதத்தில்தான் பூமி தன்னுடைய ஒரு சுழற்சியை முடித்து அடுத்த சுழற்சிக்கு தயாராகிறது.இந்த அடுத்த சுழற்சியின் விளைவுகளாவன, புதிய இலைகள் முளைக்க ஆரம்பித்தல்,மொட்டுக்கள் மலர்தல்,பூக்கள் மலர்தல்,நீண்ட நேரம் சூரிய ஒளி கிடைத்தல் போன்றவைகளாகும்.

முடிவாக யோபு,ஆபிரகாம்,ஈசாக்கு,யாக்கோபு என்ற மனிதர்களிடம் பேசிய கடவுளே மெய்யான கடவுள் என்று திருமறை(பைபிள்) கூறுகிறது.கிறித்தவத்தை தழுவியவர்கள் இப்படித்தான் நம்பிக்கை கொள்ள வேண்டும்.இதைத்தான் திருமறை வலியுறுத்துகிறது.சூரியன் மற்றும் பூமியை படைத்தவர் இந்த கடவுள்தான்.அதனால் இவர் கூறுவதுதான் கடைசி தீர்ப்பு.வசந்த காலத்தில்தான் வருடம் ஆரம்பிக்கப்பட வேண்டும் என்று அவர் கூறுகிறார்.அந்த வகையில் தமிழ் வருடப்பிறப்பு ஏப்ரல் மாதத்தில்தான் இருக்க வேண்டும்,தை  அல்ல.

இரா.இருதயராஜ்.

இக்கட்டுரையினை பதிவிறக்கம் செய்ய:
https://drive.google.com/file/d/1e-r9HIFH4RFAlg_r0BjxcHVe5YdEsM9t/view?usp=sharing

நித்திய மீட்பும் இயேசுவின் பலியும்

நித்திய மீட்பும் இயேசுவின் பலியும்  

    எபிரேயர் புத்தகம் 9-ம் அதிகாரம் நித்திய மீட்பை குறித்து விளக்குகிறது.அதாவது நிரந்தர மீட்பை குறித்து விளக்குகிறது.முதலில் ஒரு தவறான கருத்தை நாம் புரிந்து கொள்ள வேண்டும்.என்னவென்றால் "இரத்தம் சிந்துதல் இல்லாமல் பாவ மன்னிப்பு இல்லை" என்ற கருத்தாகும்.

அறியாமல் செய்த பாவங்களுக்காக மன்னிப்பை பெறுவதற்கு கடவுள் சில வழிமுறைகளை லேவியராகமம் புத்தகத்தில் கொடுத்துள்ளார்.ஆடு,மாடு,புறா போன்றவைகளை கொண்டு நாம் மன்னிப்பு பெற இயலும்.இவைகளை கொண்டு வர திராணி இல்லாத ஏழைகளுக்காக ஒரு வழியையும் கடவுள் கொடுத்துள்ளார்.ஒரு சிறிதளவு "மாவு" போதுமானது.

இதிலிருந்து நாம் தெரிந்து கொள்ள வேண்டியது என்னவென்றால்,ஆடு,மாடு,புறா போன்றவைகளின் இரத்தம் இல்லாமல் வெறும் "மாவை" கொண்டு கடவுள் பாவ மன்னிப்புக்கு இடம் அளித்துள்ளார்.இந்நிலையில் "இரத்தம் சிந்துதல் இல்லாமல் பாவ மன்னிப்பு இல்லை" என்ற பவுலின் கருத்து எப்படி சரியாகும்?

பவுல் என்ன கூற வருகிறார் என்று நாம் காணலாம்.எபிரேயர் புத்தகத்தை படித்து பார்க்கலாம்.

வெள்ளாட்டுக்கடா, இளங்காளை இவைகளுடைய இரத்தத்தினாலே அல்ல, தம்முடைய சொந்த இரத்தத்தினாலும் ஒரேதரம் மகா பரிசுத்த ஸ்தலத்திலே பிரவேசித்து, நித்திய மீட்பை உண்டுபண்ணினார்.

அதெப்படியெனில், காளை வெள்ளாட்டுக்கடா இவைகளின் இரத்தமும், தீட்டுப்பட்டவர்கள்மேல் தெளிக்கப்பட்ட கடாரியின் சாம்பலும், சரீரசுத்தியுண்டாகும்படி பரிசுத்தப்படுத்துமானால், 

நித்திய ஆவியினாலே தம்மைத்தாமே பழுதற்ற பலியாக தேவனுக்கு ஒப்புக்கொடுத்த கிறிஸ்துவினுடைய இரத்தம் ஜீவனுள்ள தேவனுக்கு ஊழியஞ்செய்வதற்கு உங்கள் மனச்சாட்சியைச் செத்தக்கிரியைகளறச் சுத்திகரிப்பது எவ்வளவு நிச்சயம்![எபி 9:12-14].

மேற்கூறிய வசனங்களில் இருந்து பவுல் என்ன கூற வருகிறார் என்றால்,இயேசுவின் இரத்தம் சுத்திகரிப்பதற்கு போதுமானது.நாம் ஏற்கனவே "இரத்தம் மிக அவசியமாக தேவை இல்லை,மாவு போதுமானது" என்று பார்த்திருக்கின்றோம்.இப்படி இருக்க இயேசுவின் இரத்தம் அவசியம் என்ற பவுலின் கருத்து எப்படி சரியாகும்?

இப்படி சொன்ன பவுல் தானே தேவாலயத்திற்கு சென்று பாலி கொடுத்திருக்கின்றாரே அது எப்படி?தான் எழுதியது ஒன்று செய்தது ஒன்று.

அப்பொழுது பவுல் அந்த மனுஷரைச் சேர்த்துக்கொண்டு, மறுநாளிலே அவர்களுடனேகூடத் தானும் சுத்திகரிப்பு செய்துகொண்டு, தேவாலயத்தில் பிரவேசித்து, அவர்களில் ஒவ்வொருவனுக்காக வேண்டிய பலிசெலுத்தித் தீருமளவும் சுத்திகரிப்பு நாட்களை நிறைவேற்றுவேனென்று அறிவித்தான்.[அப் 21:26]

பவுல் ஏன் பலி செலுத்தினார்? அவர்தான் இயேசுவின் இரத்தத்தாலே மீட்க பட்டு விட்டாரே! ஏன்?

இஸ்ரயேல் மக்கள் பாபிலோனில் சிதறடிக்கப்பட்டனர் என்பது உங்களுக்கு தெரியும்.அவர்களுக்கு தற்போது கோவில் இல்லை.இந்நிலையில் எப்படி அவர்கள் கடவுளிடம் பாவ மன்னிப்பு பெறுவார்கள்?

அவர்கள் சிறைப்பட்டுப் போயிருக்கிற தேசத்திலே தங்களில் உணர்வடைந்து, மனந்திரும்பி: நாங்கள் பாவஞ்செய்து, அக்கிரமம்பண்ணி, துன்மார்க்கமாய் நடந்தோம் என்று தங்கள் சிறையிருப்பான தேசத்திலே உம்மை நோக்கி வேண்டுதல் செய்து,

தங்களைச் சிறைபிடித்துக் கொண்ட தங்கள் சத்துருக்களின் தேசத்திலே தங்கள் முழு இருதயத்தோடும் தங்கள் முழு ஆத்துமாவோடும் உம்மிடத்தில் திரும்பி, தேவரீர் தங்கள் பிதாக்களுக்குக் கொடுத்த தங்கள் தேசத்திற்கும், தேவரீர் தெரிந்துகொண்ட இந்த நகரத்திற்கும், உம்முடைய நாமத்திற்கு நான் கட்டின இந்த ஆலயத்திற்கும் நேராக உம்மை நோக்கி விண்ணப்பம்பண்ணும்போது,

உமது வாசஸ்தலமாகிய பரலோகத்தில் இருக்கிற தேவரீர் அவர்கள் விண்ணப்பத்தையும் வேண்டுதலையும் கேட்டு, அவர்கள் நியாயத்தை விசாரித்து,

உம்முடைய ஜனங்கள் உமக்கு விரோதமாய்ச் செய்த பாவத்தையும், அவர்கள் உம்முடைய கட்டளையை மீறிய அவர்கள் துரோகங்களையும் எல்லாம் மன்னித்து, அவர்களைச் சிறைபிடித்துக் கொண்டுபோகிறவர்கள் அவர்களுக்கு இரங்கத்தக்கதான இரக்கத்தை அவர்களுக்கு கிடைக்கப்பண்ணுவீராக.[1இராஜா 8:47-50]

என் நாமம் தரிக்கப்பட்ட என் ஜனங்கள் தங்களைத் தாழ்த்தி, ஜெபம்பண்ணி, என் முகத்தைத் தேடி, தங்கள் பொல்லாத வழிகளைவிட்டுத் திரும்பினால், அப்பொழுது பரலோகத்திலிருக்கிற நான் கேட்டு, அவர்கள் பாவத்தை மன்னித்து, அவர்கள் தேசத்துக்கு க்ஷேமத்தைக் கொடுப்பேன்.[2நாளா 7:14]

மேற்கூறிய வசனங்கள் இரத்தம் இல்லாமல் பாவ மன்னிப்பு பெறுதலை குறித்து கூறுகிறது.எனவே நாம் நம்மை தாழ்த்தி அவரை நோக்கி விண்ணப்பம் செய்யும் பொழுது அவர் மன்னிப்பார்.எசேக்கியேல் புத்தகமும் இதைப்பற்றி விளக்கமாக கூறுகிறது.

சரி அதனால் என்ன குழப்பம்? என்ன குழப்பம் என்றால் இயேசுவின் இரத்தம் மட்டுமே பாவ மன்னிப்பிற்கு வழி என்று கூறுவதுதான்.அதோடு நின்று விட்டால் கூட பரவாயில்லை,இயேசுதான் கடவுள் என்று கூறுவதுதான் குழப்பத்திற்கு அடிப்படை.

எனவே தேவாலயம் இப்பொழுது இல்லாவிட்டாலும் கூட இஸ்ரயேல்  மக்கள் முழு மனதுடன் மனம் திரும்பி கடவுளிடம் விண்ணப்பம் செய்தால் பாவ மன்னிப்பு பெறலாம்.

இதன் மூலம் கிறித்தவர்கள் தற்போது கூறும் கருத்துக்கள் என்னவென்றால் தேவாலயம் இனிமேல் தேவை இல்லை என்பதுதான்.இங்குதான் மிகப்பெரும் குழப்பம் உண்டாகிறது.

• தேவாலயத்திற்கு பதில் சபைகள்.
• இயேசுவே தேவாலயம்.

மேற்கூறிய கருத்துக்கள் தற்போது உள்ளன.ஆனால் இதற்க்கு முரண்பாடாக எசேக்கியேல் புத்தகம் உள்ளது.இரண்டு வசனங்களை தருகிறேன்.இரண்டும் ஒன்றுக்கொன்று எப்படி முரண்படுகிறது என்பதை பாருங்கள்.

அதிலே தேவாலயத்தை நான் காணவில்லை; சர்வவல்லமையுள்ள தேவனாகிய கர்த்தரும் ஆட்டுக்குட்டியானவருமே அதற்கு ஆலயம்.[வெளி 21:22]

பின்பு அவர் என்னை தேவாலயத்திற்கு அழைத்துக்கொண்டுபோய், தூணாதாரங்களை இந்தப்புறத்தில் ஆறுமுழ அகலமும் அந்தப்புறத்தில் ஆறுமுழ அகலமுமாய் அளந்தார்; அது வாசஸ்தலத்தின் அகல அளவாம்.[எசே 41:1]

முதல் வசனம் வெளிப்படுத்துதல் புத்தகத்திலிருந்து எடுக்கப்பட்டது.வரப்போகும் புதிய எருசலேம் நகரத்தில் தேவாலயம் இருக்காது என்கிறது.பதிலாக எசேக்கியேல் தீர்க்கதரிசி மூலமாக கடவுள் கூறுவது என்னவென்றால்,இஸ்ரயேல்  மக்கள் தங்கள் சிறையிருப்பில் இருந்து திரும்பி வந்து சுகமாக தங்கியிருக்கும் கடைசி காலங்களில் தேவாலயம் இருக்கும் என்கிறார்.என்ன ஒரு முரண்பாடு?

எசேக்கியேல் தீர்க்கதரிசி கடவுளுடைய நாமத்தில் தீர்க்க தரிசனம் உரைத்தவர்.அதில் பல நிறைவேறி உள்ளது.வெளிப்படுத்தல் அப்படி அல்ல.மேலும் அக்காலத்தில் புதிய தேவாலயத்தில் பழைய ஏற்பாட்டு பலியிடும் முறைமைகள் அனைத்தும் இருக்கும் என்றும் தீர்க்கதரிசி மூலமாக கூறுகிறார்.

எனவே,இயேசுதான் நித்திய மீட்பை உண்டு பண்ணினார் என்றால்,

• தேவாலயம் எதற்கு?
• அன்றாட பலிகள் எதற்கு?
• எசேக்கியேல் தீர்க்கதரிசி மூலமாக கடவுள் கூறியது தவறா?
• இல்லை பவுலும் வெளிப்படுத்துதல் புத்தகமும் தவறா?
• முதலில்,"நிரந்தர மீட்பு" என்ற கருத்தின் விளக்கம் என்ன?
• இந்த "நிரந்தர மீட்பு" பற்றி பழைய ஏற்பாட்டில் எங்காவது கூறப்பட்டுள்ளதா?

இதை படிக்கும் நீங்கள் நன்றாக ஆராய்ந்து முடிவுக்கு வாருங்கள்.ஒருவர் கடவுளின் போற்றத்தக்க பெயரில் தீர்க்க தரிசனம் கூறுகிறார்.மற்றொருவர் தனக்கு ஏற்பட்ட தரிசனத்தை கூறுகிறார்,ஆனால் கடவுளின் பெயரில் அல்ல.யாரை நம்புவது என்று நீங்கள் முடிவு செய்யுங்கள்.

இரா.இருதயராஜ்.

இக்கட்டுரையை பதிவிறக்கம் செய்ய:
https://drive.google.com/file/d/1_wzU_HSvTi4-3VnO7Z4EWDdaO3_HSbRY/view?usp=sharing