உவமைகளின் பேரழகு - ஓசியா இரண்டாம் அதிகாரம்

உவமைகளின் பேரழகு - ஓசியா இரண்டாம் அதிகாரம் 

உவமை என்பது தமிழில் அடிக்கடி கவிஞர்களால் பயன்படுத்தும் ஒரு கருவி ஆகும். கருத்துக்களை பசுமரத்தாணி போல் பதிய செய்யும் தகுதி உவமைகளுக்கு உண்டு. திருமறையிலும்  இவ்வாறான உவமைகளை நாம் காணலாம். திருமறையில் உவமைகளை அதிகம் பயன்படுத்திய இருவர் ஏசாயா மற்றும் ஓசியா  ஆவர்.இதில் ஓசியா மூலம் தான் கூற வரும் கருத்தை கர்த்தர் கூறும் விதமானது,ஒருவருடைய இருதயத்தை சுத்தியலைக் கொண்டு அடிப்பதைப்போல் இருக்கும்.இன்றைய திரைக்கதைகள் தோற்றுப்போகும் அளவுக்கு இப்புத்தகம் எழுதப்பட்டிருக்கும்.இஸ்ரயேல் நாடானது இரண்டு நாடுகளாக பிரிந்து சென்ற பிறகு வடக்கு பகுதி இஸ்ரயேல்  என்றும் தெற்கு பகுதி யூதா என்றும் அழைக்கப்பட்டது.வடநாடான இஸ்ரயேல் கர்த்தரை விட்டு வழிவிலகி சென்று விட்டது.அதை சுட்டி காட்ட முதல் இரு அதிகாரங்களை ஓசியா பயன்படுத்தியுள்ளார்.

ஒரு விபச்சாரியை மனம் செய்து கொள்ளுமாறு ஓசியாவை கர்த்தர் கூறுகிறார்.வடக்கு நாடான இஸ்ரயேலின் செயலை இது குறிக்கிறது.அவள் ஓசியாவுக்கு குழந்தைகளை பெற்றெடுக்கிறாள்.நாடு விபசாரம் செய்கிறது.கர்த்தரைவிட்டு அந்நிய கடவுள்களை தொழுதுகொள்கிறது.இதன் பின்னர் வரும் இரண்டாம் அதிகாரத்தின் ஆரம்பத்தில் ஓசியா பேசுவது போல் வார்த்தைகள் இருக்கும்.இங்குதான் உவமை ஆரம்பிக்கிறது.

1 அம்மீ என உங்கள் சகோதரர்களிடம் கூறுங்கள். “ருகாமா” என உங்கள் சகோதரிகளிடம் கூறுங்கள்.

2 “வழக்காடுங்கள், உங்கள் அன்னையோடு வழக்காடுங்கள்; அவள் எனக்கு மனைவியுமல்ல; நான் அவளுக்குக் கணவனுமல்ல; அவள் வேசித்தனத்தின் குறிகளைத் தன் முகத்தினின்றும், விபசார குறிகளைத் தன் மார்பினின்றும் அகற்றட்டும்.[ஓசையா 2:1,2]

1. உங்கள் சகோதரரைப்பார்த்து அம்மீ என்றும், உங்கள் சகோதரிகளைப் பார்த்து ருகாமா என்றும் சொல்லுங்கள்.

2. உங்கள் தாயோடே வழக்காடுங்கள்; அவள் எனக்கு மனைவியுமல்ல, நான் அவளுக்குப் புருஷனுமல்ல; அவள் தன் வேசித்தனங்களைத் தன் முகத்தினின்றும் தன் வியாபாரங்களைத் தன் ஸ்தனங்களின் நடுவினின்றும் விலக்கிப்போடக்கடவள்.[ஓசி 2:1,2]

அம்மீ என்றால் "என் மக்களே" என்றும் "ருகாமா" என்றால் "இரக்கம் பெற்றவள்" என்றும் பொருளாகும்.ஓசியா தன் குழந்தைகளை பார்த்து மேற்கண்டவாறு கூற சொல்கிறார்.விபசாரியான தன் மனைவியை குறித்து மனம் வருந்தி கீழ்வருமாறு கூறுகிறார்.

2 “வழக்காடுங்கள், உங்கள் அன்னையோடு வழக்காடுங்கள்; அவள் எனக்கு மனைவியுமல்ல; நான் அவளுக்குக் கணவனுமல்ல; அவள் வேசித்தனத்தின் குறிகளைத் தன் முகத்தினின்றும், விபசார குறிகளைத் தன் மார்பினின்றும் அகற்றட்டும்.

இஸ்ரயேலை வெறுத்து அவர்களுக்கு இனி தான் கடவுள் அல்ல என்று  கர்த்தர் கூறுவது போன்று இது உள்ளது.அடுத்தடுத்த  வசனங்கள் நேரடியாகவே கர்த்தர் பேசுவது போன்று மாறிவிட்டது.இந்நிலையில் ஓசியாவின் விபசார மனைவி தன் விபசாரத்தை தொடர்ந்ததால் மேற்கண்ட வசனத்தை கூறினார்.தொடர்ந்து ஓசியா கூறுகிறார்,

5 அவர்களின் தாய் வேசியாய் வாழ்ந்தாள்; அவர்களைக் கருத்தாங்கியவள் ஒழுக்கம் கெட்டு நடந்தாள்; “எனக்கு உணவும் தண்ணீரும், ஆட்டு மயிரும் சணலும், எண்ணெயும் பானமும் தருகின்ற என் காதலரைப் பின் செல்வேன்” என்றாள்.

6 ஆதலால், நான் அவள் வழியை முள்ளால் அடைப்பேன்; அவள் எதிரில் சுவர் ஒன்றை எழுப்புவேன்; அவளால் வழி கண்டுபிடித்துப் போக இயலாது.

7 அவள் தன் காதலர்களைப் பின்தொடர்ந்து ஓடுவாள்; ஆனால்; அவர்களிடம் போய்ச் சேரமாட்டாள். அவர்களைத் தேடித் திரிவாள்; ஆனால் அவர்களைக் காணமாட்டாள். அப்போது அவள், “என் முதல் கணவனிடமே நான் திரும்பிப் போவேன்; இப்போது இருப்பதைவிட, அப்போது எனக்கு நன்றாயிருந்தது” என்பாள்.

8 கோதுமையும் திராட்சை இரசமும் எண்ணெயும் அவளுக்குக் கொடுத்தது நானே என்பதை அவள் அறியவில்லை. நான் வாரி வழங்கிய பொன், வெள்ளியைக் கொண்டே பாகாலுக்குச் சிலை செய்தார்கள்.

எட்டாவது வாக்கியத்தை திரும்ப வாசித்துப் பார்த்தால் கர்த்தர் கூறுவது போன்றே இருப்பதை உணர முடியும்.ஓசியா பேசுவது போன்று கர்த்தர் இஸ்ரயேல் மக்களை பார்த்து பேசுகிறார்.9-13 வாக்கியங்கள் ஓசியா தன் மனைவிக்கு கொடுக்கும் தண்டனையை குறித்து கூறுகிறார்.இது உவமை.உண்மையில் கர்த்தர் இஸ்ரயேல் மக்களுக்கு செய்யும் செயல்களைக் குறித்து அவ்வாக்கியங்கள் பேசுகின்றன.

இவ்வளவுக்கும் பிறகு ஓசியா  தன மனைவியை நேசிக்கிறார்.அவளை அழைத்து சேர்த்துக் கொள்வதை பற்றி கூறுகிறார்.இதை கர்த்தர் இஸ்ரயேல் மக்களை பார்த்து கூறுகிறார் என்பதை 15-வைத்து வாக்கியத்தின் மூலம் அறியலாம்.

14 “ஆதலால் நான் அவளை நயமாகக் கவர்ந்திழுப்பேன்; பாலைநிலத்துக்கு அவளைக் கூட்டிப்போவேன்; நெஞ்சுருக அவளுடன் பேசுவேன்.

15 அவளுடைய திராட்சைத் தோட்டங்களை அவளுக்குத் திரும்பக் கொடுப்பேன்; ஆகோர் பள்ளத்தாக்கை நம்பிக்கையின் வாயிலாக மாற்றுவேன்; அப்போது அவள் அங்கே தன் இளமையின் நாள்களிலும், எகிப்து நாட்டினின்று வெளியேறிய காலத்திலும் பாடியதுபோல் பாடுவாள்.

16 அந்நாளில், ‘என் கணவன்’ என என்னை அவள் அழைப்பாள்; ‘என் பாகாலே’ என இனிமேல் என்னிடம் சொல்லமாட்டாள்” என்கிறார் ஆண்டவர்.

14. ஆயினும், இதோ, நான் அவளுக்கு நயங்காட்டி, அவளை வனாந்தரத்தில் அழைத்துக்கொண்டுபோய், அவளோடே பட்சமாய்ப் பேசி,

15. அவ்விடத்திலிருந்து அவளுக்கு அவளுடைய திராட்சத்தோட்டங்களையும், நம்பிக்கையின் வாசலாக ஆகோரின் பள்ளத்தாக்கையும் கொடுப்பேன்; அப்பொழுது அவள் அங்கே, தன் இளவயதின் நாட்களிலும் தான் எகிப்துதேசத்திலிருந்து வந்த நாளிலும் பாடினதுபோல் பாடுவாள்.

16. அக்காலத்தில் நீ என்னை இனி பாகாலி என்று சொல்லாமல், ஈஷி என்று சொல்லுவாய் என்று கர்த்தர் உரைக்கிறார். 

கடைசி வாக்கியம் "கர்த்தர் கூறுகிறார்" என்றே உள்ளது.சொல்ல வரும் கருத்தை மற்றவர் மூலமாக கர்த்தர் கூறுகிறார்.ஓசியா தன் மனைவியிடம் பேசுவது போலவும் உள்ளது அதே நேரத்தில் கர்த்தர் தன் மக்களிடம் பேசுவது போன்றும் உள்ளது.இவ்வாறான உவமை மிக அரிது.

இரா.இருதயராஜ்.

இக்கட்டுரையை பதிவிறக்கம் செய்ய:
HERE!!

திரித்துவத்தின்(Trinity) சுருக்கமான வரலாறு - பாகம் 7(இறுதி)

திரித்துவத்தின்(Trinity) சுருக்கமான வரலாறு - பாகம் 7(இறுதி)

திரித்துவம் என்றால் என்ன என்பது பற்றிய சர்ச்சை ஒருவழியாக முடிவுக்கு வந்து விட்டது.மிக சரியாக கூறுவது என்றால் முடிவுக்கு கொன்டு வரப்பட்டது.ஆனால் கேள்விகளும் குழப்பங்களும் இன்னும் மிச்சம் இருக்கத்தான் செய்கிறது.நைசீன் முடிவுகள்(Creed of Nicene) உரோம அரசின் முடிவாக இருந்த காரணத்தினால் அரசை எதிர்த்து செயல்பட முடியாமல் அதிருப்தியாளர்கள் ஒதுங்கி விட்டனர்.உரோம அரசின் ஆதரவோடு கிறித்தவம் தன்னை மாற்றிக் கொண்டது.அரசிற்கு நெருக்கமானவர்கள் யார்,அவர்கள் மூலமாக அதிகாரத்தை மேலும் பெருக்கிக் கொள்வது எப்படி என்ற எண்ணங்கள் மேலோங்கி இருந்தன.காலத்தின் போக்கில் தன்னை தனியான அதிகார மையமாக வளர்த்துக் கொண்டது.கிறித்தவத்தின் வளர்ச்சியில் "திரித்துவம் பற்றிய சர்ச்சை" நீண்ட கால போர் ஒன்றை போலவே பார்க்கப் படுகிறது.               போரிடும்                    குழுக்களிடையே நிலவுகின்ற  "வெற்றி பெரும் வேட்கை", உண்மையான போர்களில் இருப்பதை போன்றே இருந்ததை வரலாறுகளின் மூலம் உணர முடிகிறது.கருத்துக்களை தங்கி நிற்கும் குழுக்கள் தங்களுடைய ஆதரவாளர்களை திரட்டுவதிலும்,தங்களுக்கு எதிர்ப்பாளர்களை எப்படி கவிழ்ப்பது,அதற்காக அரசின் ஆதரவை எப்படி பெறுவது,ஆதரவைப் பெறுவதற்காக என்ன செய்வது போன்ற செயல்கள் கிறித்தவத்தின் அடிப்படை தத்துவங்களை நகைக்க செய்துவிடும் அளவிற்கு இருக்கின்றன.இந்த திரித்துவ போரை தற்பொழுது காண வேண்டும் என்றால் தற்போதைய CSI மற்றும் RC சபைகளில் தலைவர்களை தேர்ந்தெடுக்கும் முறைகளை பார்த்தால் போதுமானது.

ஆதரவுகள் எப்படி திரட்டப் படுகின்றன, எதிர்ப்பாளர்கள் எவ்வாறு கையாளப் படுகின்றனர்,ஆட்சியாளர்களுடன் எப்படி தொடர்பை ஏற்படுத்து கின்றனர், ஆட்சியாளர்களுக்கு இவர்கள் தயவு ஏன் தேவைப் படுகிறது.  ஆட்சியாளர்களும் இவர்களும் எப்படி        ஒருங்கிணைந்து  செயல் படுகின்றனர், கிறித்தவத்தின் அடிப்படை கருத்துக்கள் எப்படி காலில் போட்டு மிதிக்கப்படுகின்றன போன்ற செயல்கள் இன்றைய CSI மற்றும் RC சபைகளில் கண்கூடாக தெரியும் நிகழ்வுகள் ஆகும்.இது போன்றுதான் அன்றைய உரோம அரசில் "திரித்துவப் போர்" நடைபெற்றது.

திரித்துவத்தின் அடிவேர் எங்குள்ளது? ஏன் திரித்துவம் என்ற ஒன்று தோன்றியது?இக்கேள்விகளுக்கு பதில் வேண்டுமானால் அக்காலகட்டத்தில் நிலவிய சில எண்ணங்கள் பற்றி அறிந்துகொள்ள வேண்டியுள்ளது.எவ்வகையான எண்ணங்கள் திரித்துவம் பற்றிய கேள்விகளுக்கு இட்டுச் சென்றது என்று ஆராய வேண்டும்.அக்காலத்தில்,குறிப்பாக கிரேக்கர்களில் அரிஸ்ட்டாட்டில்,பிளாட்டோ போன்றோர் கொண்டிருந்த எண்ணங்கள் பற்றி நாம் அறிந்தோமானால் அன்றைய காலகட்டத்தில் கிரேக்கர்கள் மற்றும் அவர்கள் எங்கெல்லாம் வாந்தனரோ அங்கெல்லாம் இவ்வெண்ணங்கள் பரவியிருக்க வேண்டும்.மனுக்குலம் இவ்வளவு வேதனைகள் பட காரணம் என்ன,இவ்வளவு கெட்ட எண்ணங்களுக்கு காரணம் என்ன,கடவுள்தான் இவ்வுலகை படைத்தார் எனில் ஏன் இவ்வளவு அநியாயங்கள்,தவறு செய்தோர் தண்டிக்கப்பட மாட்டார்களா,போன்ற எண்ணங்களே அவைகள்.

மேற்கூறிய எண்ணங்கள் கிரேக்கர்களிடையே மட்டும் இல்லை,அனைத்து இனங்களிலும் சிந்தனை செய்வோர் இடையே இவ்வெண்ணங்கள் இருந்திருக்க வேண்டும்.கிரேக்கர்கள் மத்திய தரைக்கடல் மற்றும் ஆசியாவை வென்று அப்பகுதி முழுவதும் பரவிய பின்னர் அவர்களுடைய எண்ணங்களும் பரவின.ஆனால் இவ்வெண்ணங்களுக்கு கிரேக்கர்கள் மட்டும் காரணம் அல்ல என்பதையும் நாம் மனதில் கொள்ள வேண்டும்.யூதர்கள் கூட இவ்வெண்ணங்களை கொண்டிருந்தனர் என்பதை பரிசேயர்கள் மற்றும் சதுசேயர்கள் என்ற இரு பிரிவினர் வழியாக நாம் அறியலாம்.

பாவம் என்றால் என்ன என்று ஒவ்வொரு இனமும் வெவ்வேறு வகையான கருத்துக்களை கொண்டிருந்தன.யூதர்கள் தங்களுடைய எழுத்துக்கள் மூலமாக,அதாவது பழைய ஏற்பாடு மூலமாக, இதற்கான விளக்கத்தை கொண்டிருந்தனர்.தங்களை அடிமைத்தனத்திலிருந்து விடுவிக்க ஒருவர் வருவார் என்று யூதர்கள் நம்பிக்கொண்டிருந்தனர்.தங்கள் வழிபாடும் கடவுளே அவரை அனுப்பி வைப்பார் என்று அவர்களுடைய பழைய ஏற்பாடு கூறுகிறது.அவர்களில் பலபேர் "தான்தான் அவர்" என்று கூறி இறந்துபோயிருக்கின்றனர்.அதாவது அவ்வப்போது இத்தகைய மனிதர்கள் சிலர் தோன்றிக்கொண்டிருந்தனர்.கிரேக்கர்களும் யூதர்களும் சேர்ந்து வாழும் சூழ்நிலை உருவானபொழுது இரண்டு பேருடைய எழுத்துக்களும் இரண்டு பேருக்கும் தெரிய வந்தன.

மனுக்குலமானது தன்னுடைய "பாடுகளில்" இருந்து விடுபட என்ன வழி என்று கிரேக்கம் சிந்தித்தது.யூதர்கள் தங்களை  "தங்களுடைய அடிமைத்தனத்தில்" இருந்து விடுவிக்க "மேசியா வருவார் என்று நம்பிக்கொண்டிருந்தனர்.பாவம் என்றால் என்ன என்பது பற்றி யூதர்களுடைய புத்தகம் தெளிவாக விளக்கங்களை கொண்டிருக்கிறது என்பதை நாம் அறிவோம்.இப்புத்தகத்தை அறிந்து கொண்ட கிரேக்கர்கள் மற்றும் கிரேக்கர்களுடைய கருத்துக்களை அறிந்து கொண்ட யூதர்கள் என்று ஒரு புதிய "சிந்தனையாளர்கள் கூட்டம்" உருவாகி வளர்ந்து வர ஆரம்பித்தது.யூதர்களை விடுவிக்க வரப்போகும் "மேசியா",இப்பொழுது சிறிது மாற்றம் கொண்டு மனுக்குலத்தை விடுவிக்க வருகிறார் என்ற புதிய எண்ணங்கள் இந்த சிந்தனையாளர்கள் மத்தியில் உருவாகியது என்று நாம் முடிவு செய்ய வேண்டியிருக்கிறது.இந்த எண்ணத்தை யூதர்கள் அனைவருமோ அல்லது கிரேக்கர்கள் அனைவருமோ கொண்டிருக்க வில்லை இரு குழுக்களிலும் ஒரு சிறிய கூட்டம் மட்டுமே இக்கருத்தை கொண்டிருக்க வேண்டும்.இந்த இரு குழுக்களிலும் இவ்வகையான எண்ணம் கொண்டோர் மத்தியில் இயேசு வாழ்ந்திருக்க வேண்டும்.இவ்வகையான எண்ணங்கள் அப்பொழுது நிலவின என்பதற்கு எண்ணற்ற தரவுகள் உள்ளன.

கிரேக்கர்கள் தங்கள் வெற்றி கொண்ட பகுதிகளில் குடியிருப்புகளை ஏற்படுத்தினர்.அவ்வாறு அவர்கள் ஏற்படுத்திய குடியிருப்பு பகுதி எகிப்தில் உள்ள "அலெக்சாண்டிரியா(Alexandria)" நகரம் ஆகும்.கி.மு.100-களில் இருந்து இந்நகரம் பெரும் வணிக நகரமாக நிலவியது.பல்வேறு மக்கள் இங்கு வந்து குடியேறினர்,குறிப்பாக யூதர்கள்.இந்நகரம் பெரும் நூலகம் ஒன்றைக் கொண்டிருந்தது என்றால் எவ்வகையான மக்கள் அங்கு வாழ்ந்திருந்தனர்,சிந்தனைகளுக்கு எவ்வாறு முக்கியத்துவம் அளித்தனர் என்பதை நாம் புரிந்து கொள்ளலாம்.இந்நகரத்தின் பக்கத்தில் குகைகள் நிறைந்த பகுதி ஒன்றும் உள்ளது."அறிவே முக்கியம்(Knowledge)"  என்ற எண்ணம் கொண்ட ஒரு குழு ஒன்று இக்குகைகளில் தங்களுடைய எழுத்துக்களை(எண்ணங்களை) தோல்  சுருள்களில் பதிவு செய்து அவைகளை இக்குகைகளில் பத்திரப்படுத்தி இருக்கின்றனர்.இவர்களை "Knosis" என்று அழைக்கின்றனர்."அறிவே உங்களை விடுதலையாக்கும்" என்ற கருத்து இவர்களுடையது.இவர்களுடைய எழுத்துக்களை 1947-ல் பிரெஞ்சு ஆய்வாளர் ஒருவர் கண்டுபிடித்து வெளிக்கொண்டு வந்தார். இவைகள் இன்று புத்தகமாக நமக்கு கிடைக்கிறது.

எனவே பாவங்களில் இருந்து விடுவிக்க மேசியா வருகிறார் என்று புதிய கருத்து இந்த "இணைந்த குழு" உருவாக்கியது.இதைத்தான் இயேசு வலியுறுத்துகிறார்."மனதிரும்புங்கள்,பாவம் செய்யாதீர்கள்,ஒரு புதிய உலகம் வரப்போகிறது போன்ற கருத்துக்களை இயேசு போதித்தார்.இக்கருத்துக்களை அவருடைய சீடர்களும் பரப்பினர்."யூத விடுதலை" என்பதிலிருந்து "பாவ விடுதலை" என்பதாக மாறிவிட்டது.ஏறத்தாழ மனிதர்கள் அனைவரும் "நல்ல மனிதனாக இருப்பது எப்படி" என்று சிந்திப்பர்.இயற்கையாக மனிதர்களில் இருக்கும் இவ்வெண்ணங்களுக்கு இவர்களுடைய போதனைகள் கைகொடுத்தது.இப்பொழுது இயேசு மேசியா ஆகி விட்டார்.அவர் நம்மை பாவங்களில் இருந்து விடுவிப்பார் என்ற கருத்து பரப்பப் பட்டது.மனிதர்களில் எவரெல்லாம்,ஏன் உலகில் இவ்வளவு பாடுகள் என்று சிந்திக்கிறார்களோ" அவர்கள் அனைவருக்கும் "விடுவிக்கும் ஒருவர்" தேவைப்படுகிறார்.யூதர்களின் மேசியா இப்பொழுது அனைத்து மக்களின் மேசியா ஆகி விட்டார்.இதே வழியில் சிந்திப்பவர்கள் பெரும்பாலும் மேசியாவை ஆதரிக்கும் நிலைக்கு செல்வதை தவிர வேறு வழியில்லை.ஒருவழியாக,"இவ்வுலகின் பாடுகளில் இருந்து விடுபட வழி ஒன்று கிடைத்து விட்டது",இனிமேல் இக்கருத்தை பரப்ப வேண்டியதுதான் வேலை.இதை செய்தவர்களே கிறித்தவர்கள்.

மேசியா கிடைத்தாகி விட்டது.அவர் இனிமேல் யூதர்களுக்கு மட்டும் சொந்தம் கிடையாது,அனைத்து மக்களின் "விடுவிப்பாளர்"அவர்.யூதர்கள் அல்லாத சிந்தனையாளர்கள் மத்தியில் ஒரு புது குழப்பம் ஏற்பட்டது.இந்த "மேசியாவிற்கும் கடவுளுக்கும் என்ன தொடர்பு?",இதுவே புது குழப்பம்.அவர் யார் கடவுளின் "சொந்த மகன்" என்றால் எப்படி?இதுதான் அடுத்த சிந்தனை,திரித்துவத்தின் வேர் இங்குதான் உள்ளது."தங்களுடைய மேசியா" ஒரு சாதாரணமான ஆளாக இருப்பதில் யூதர் அல்லாத கிறித்தவர்களுக்கு விருப்பம் இல்லை.காரணம் யூதர் அல்லாத கிறித்தவர்கள் யூதர்களை வெறுத்தனர்.யூதர்களுடைய "தனிவழி" அவர்களை கோபப்படுத்தியது.தங்களை யூதர்களை விட தாழ்வானவர்களாக இவர்கள் கருதியத்தின் விளைவு அல்லது யூதர்களுடைய "தனிவழி" மீதான வெறுப்பு அல்லது யூதர்கள் கொண்டிருந்த செல்வாக்கு மீதான வெறுப்பு போன்ற காரணங்களால் "தங்களுடைய மேசியா"வை யூதர்களின் கடவுளுக்கு தாழ்வாக இருப்பதை வெறுக்க செய்தது.எப்படியாவது யூதர்களின் கடவுளுக்கு மேலாக அவரை கொண்டு செல்ல வேண்டும் அல்லது அவருக்கு இணையாக வேண்டும்,இதுவே தங்களுடன் இனைந்து  வாழ மறுக்கும் யூதர்களை பழிவாங்கும் செயல்,இவ்வகையான எண்ணங்களின் அடிப்படையில் பிறந்த கருத்துதான் மேசியா யார்,கடவுளுக்கு அவருக்கும் இடையேயான தொடர்பு என்ன? என்ற கேள்விகள்.

இக்கேள்விகள் இட்டு சென்ற பாதைதான் "திரித்துவ போர்".நீண்ட நெடிய கருத்து போர்.யூதர்களின் கடவுளுக்கு ஒருவழியாக தங்களுடைய மேசியாவை இனையாக்கி விட்டாயிற்று.கடவுளின் சொந்த மகன்,இரட்சகர்,வரப்போகும் உலகம்,என்று பலவித கருத்துக்கள் உருவாகின.எகிப்தில் உள்ள கும்ரான் (Qumran) குகைகளில் கண்டுபிடிக்கப்பட்ட "நாசிஸ்(Knosis)" எழுத்துக்களை ஒருவர் படித்தாரெனில் இவற்றை தெளிவாக விளங்கிக் கொள்ள முடியும்.

தற்பொழுது நைசீன் முடிவுகள் அல்லது நைசீன் நம்பிக்கைகள் (Nicene Creed) என்ன கூறுகிறது என்று தமிழில் பார்க்கலாம்.அவற்றை யூதர்களின் பழைய ஏற்பாட்டுடன் ஒப்பிட்டும் பார்க்கலாம். 

வ.எண்	நைசீன் முடிவுகள் - ஆங்கிலம்	நைசீன் முடிவுகள் - தமிழாக்கம்	விளக்கம்
1	We believe in one God, the Father almighty,       maker of heaven and earth,       of all things visible and invisible.	கண்ணுக்கு தெரிந்த மற்றும் தெரியாத அனைத்தையும்,வானத்தையும் மன்னுலகையும் படைத்த தந்தையாகிய ஒரே கடவுளிடத்தில் நாங்கள் நம்பிக்கை கொண்டிருக்கிறோம்.	யூதர்களின் கருத்துக்களுக்கு இது முரன்படவில்லை
2	And in one Lord Jesus Christ,       the only Son of God,       begotten from the Father before all ages,            God from God,            Light from Light,            true God from true God,       begotten, not made;       of the same essence as the Father.	தந்தை எவற்றால் ஆக்கப்பட்டிருக்கிறாரோ அவற்றைக் கொண்டே, உருவாக்கப்படாமல் பிறப்பிக்கப்பட்ட;உண்மையான கடவுளிடம் இருந்து உண்மையான கடவுளாகவும்,ஒளியிடமிருந்து ஒளியாகவும்,கடவுளிடம் இருந்து கடவுளாகவும்,அனைத்து காலங்களுக்கும் முன்னர் தந்தையிடம் இருந்து பிறப்பிக்கப்பட்ட கடவுளின் ஒரே மகனாகிய ஒரே ஆண்டவர் இயேசு கிறிஸ்துவிடமும் நாங்கள் நம்பிக்கை கொண்டிருக்கிறோம்.	இது மிகவும் குழப்பம் தரக்கூடிய பகுதி.ஆனால் இயேசுவும் கடவுள் என்று இப்பகுதி மிகத்தெளிவாக கூருகிறது.சாதாரனமாக கடவுள் அல்ல தந்தை எப்படி உள்ளாரோ அப்படியே எள்ளலவும் குறையாமல் இவரும் கடவுள்.அதாவது தந்தையும் இவரும் இனையானவர்கள்.
3	Through him all things were made.	இவரின் வழியாகவே அனைத்தும் உருவாக்கப்பட்டன	யூதர்களின் பழைய ஏற்பாடு இவ்வாறு கூறவில்லை
4	For us and for our salvation            he came down from heaven;            he became incarnate by the Holy Spirit and the virgin Mary,            and was made human.	எங்களுக்காகவும் எங்களுடைய விடுதலைக்காகவும் இவர் வானத்திலிருந்து இறங்கி வந்தார்;தூய ஆவியின் வழியாகவும் கன்னியாகிய மரியாளின் வழியாகவும் இவர் மனித வடிவம் பெற்றார்.மேலும் ஒரு மனிதனாக ஆக்கப்பட்டார்.	கன்னிபெண் ஒருவள் குழந்தை பெருவது என்பது யூதர்களின் கருத்துக்கு எதிரானது.ஆனால் கிரேக்கம்,உரோம்,எகிப்து போன்ற நாடுகளில் இக்கதைகள் உள்ளன.மேலும் கடவுள் மனித வடிவம் பெருதல் என்பது இந்துக்களின் “அவதாரம்” என்பதுடன் தொடர்புடையது.
5	He was crucified for us under Pontius Pilate;            he suffered and was buried.	பொந்தியுஸ் பிலாத்து என்பவரின் கீழ் இவர் எங்களுக்காக சிலுவையில் அறையப்பட்டார்.அவர் பாடுகள் பட்டார் கடைசியில் புதைக்கப்பட்டார்.	பொந்தியுஸ் பிலாத்து இயேசுவை சிலுவையில் அறைந்து கொன்றதை “தங்களுக்காகவே” செய்யப்பட்டது போன்று கூறப்பட்டுள்ளது.அதாவது பொந்தியுஸ் பிலாத்து இயேசுவை சிலுவையில் அறைந்ததன் மூலம் நன்மையையே செய்துள்ளான் என்பதாக கூறப்பட்டுள்ளது.
6	The third day he rose again, according to the Scriptures.            He ascended to heaven            and is seated at the right hand of the Father.	எழுதியுள்ளவற்றின்படி அவர் மூன்றாம் நாளில் உயிரோடு எழுந்தார்.அவர் வானத்துக்கு ஏறி தந்தையின் வலது பக்கத்தில் உட்கார்ந்து இருக்கிறார்	மூன்றாம் நாளில் அவர் உயிரோடு எழும்ப வேண்டும் என்று எங்கும் எழுதப்படவில்லை.எங்கிருந்து இக்கருத்து வந்தது என்று தெரியவில்லை.
7	He will come again with glory            to judge the living and the dead.	உயிரோடு இருப்பவர்களையும் இறந்து போனவர்களையும் நியாயம் செய்வதற்காக அவர் மறுபடியும் தன் மகிமையுடன் திரும்ப வருவார்.	இக்கருத்தும் யூதர்களின் கருத்துக்கு முரனானது
8	His kingdom will never end.	அவருடைய ஆட்சி முடிவில்லாதது
9	And we believe in the Holy Spirit,       the Lord, the giver of life.	வாழ்வைக் கொடுப்பவரான ஆண்டவராகிய தூய ஆவியின் மேலும் நாங்கள் நம்பிக்கைக் கொண்டிருக்கிறோம்.	இக்கருத்தும் யூதர்களின் கருத்துக்கு முரனானது.
10	He proceeds from the Father and the Son,       and with the Father and the Son is worshiped and glorified.	இவர்(தூய ஆவி) தந்தை மற்றும் மகனிடம் இருந்தே வருகிறார்.தந்தை மற்றும் மகனுடன் சேர்ந்து இவரும்(தூய ஆவி) மகிமைப்படுத்தப்பட்டு வணங்கப்படுகிறார்.	இக்கருத்தும் யூதர்களின் கருத்துக்கு முரனானது.
11	He spoke through the prophets.       We believe in one holy catholic and apostolic church.	இவர்(தூய ஆவி) இறைவாக்கினர் மூலமாக பேசினார்.நாங்கள் ஒரே புனித கத்தோலிக்க மற்றும் அப்போஸ்தல சபையின் மீது நம்பிக்கை கொள்கிறோம்.	கத்தோலிக்க சபை என்பது “அனைவருக்குமான சபை” அல்லது Universal Church என்று பொருள்.அப்போஸ்தலர்கள் இறந்த பிறகு ஏற்பட்ட குழப்பத்தின் விளைவாக பல்வேறு கிளை சபைகள் தோன்றின.அவைகளை ஒன்றினைத்து உருவாகியதுதான் கத்தோலிக்க சபை.கத்தோலிக்(Catholic) என்றால் “Universal-அனைத்து” என்று பொருள்
12	We affirm one baptism for the forgiveness of sins.	பாவங்களின் மன்னிப்பிற்காக ஒரே திருமுழுக்கை நாங்கள் அங்கீகரிக்கிறோம்.
13	We look forward to the resurrection of the dead,  and to life in the world to come. Amen.	இறந்தவர்கள் உயிரோடு எழும்பி வரப்போகும் உலகில் வாழ்வடைவதை எதிர்பார்த்துக் கொண்டிருக்கிறோம்.ஆமென்.

முடிவுரை:

திரித்துவம் என்பது பழைய ஏற்பாட்டில் எங்கும் இல்லாத ஒரு கருத்தாகும்.யூதர்கள் இதனை முற்றிலும் நிராகரிக்கின்றனர்.ஒரே கடவுள் கொள்கைக்கு இது முற்றிலும் முரணாக உள்ளது.மனிதர்கள் ஒன்று கூடி ஒரு கருத்தை ஏற்படுத்தி அதனை பல போராட்டங்களுக்கு இடையே சாத்தியப்படுத்திக் காட்டியுள்ளனர்.

இந்த சுருக்கமான வரலாறு "A HISTORY OF CHRISTIANITY - DIARMAID MACCULLOCH " என்ற புத்தகத்தினை  தழுவி எழுதப்பட்டது.

இரா.இருதயராஜ்.

இக்கட்டுரையை பதிவிறக்கம் செய்ய:
https://drive.google.com/file/d/1FBvKsBfslmYFPbE47sZurrn81RyL5m3a/view?usp=sharing

திரித்துவத்தின்(Trinity) சுருக்கமான வரலாறு - பாகம் 6

திரித்துவத்தின்(Trinity) சுருக்கமான வரலாறு - பாகம் 6

பேரரசின் மன்னனாக ஜூலியன் வந்த பிறகு கிறித்தவம் தடை செய்ய பட்டது.இவ்வளவு காலம் அரசின் ஆதரவோடு இயங்கி வந்த கிறித்தவம் இப்பொழுது பெரும் சிக்கலை சந்தித்தது.மன்னன் ஜூலியனை "வழிவிலகிய ஜூலியன்(Julian The Apostate)" என்று கிறித்தவர்கள் குறிப்பிடுகின்றனர்.இதில் ஆச்சரியப்பட வேண்டிய செய்தி ஒன்று உள்ளது.இந்த ஜூலியன் இளவயதில் கிறித்தவனாகவே வளர்க்கப்பட்டான். கிறித்தவத்திற்குள் இவனை வழிநடத்தியவர் நிகாமெடியாவின் பிஷப்(Bishop of Nicomedia)  யூசிபியஸ்(Eusibius) ஆவார்.ஆனால் ஓரளவுக்கு விபரம் தெரிந்த பிறகு ஜூலியன் கிறித்தவத்தின் "நகைப்புக்குரிய கருத்துக்களை(Absurd Claims)" அவன் வெறுத்தான். தானாகவே பிளாடோவின்(Plato)-வின் கருத்துக்களை தேடிப்பிடித்து படித்து அறிந்து கொண்டான்.அக்கருத்துக்கள் மீது காதல் கொண்டான்.அதே சமயத்தில் "கதிரவ வழிபாட்டையும்(Sun Worship)" ஆதரித்தான்.பண்டைய வழிபாட்டு முறைகளை மீட்டுக் கொண்டுவரவும் ஆதரவு வழங்கினான்.அவன் தன்னுடைய தகுதிக்கு மீறிய அளவுக்கு "தத்துவ அறிஞனாக" இருந்தான்.அவனுடைய இச்செய்கைக்கு ஆதரவும் இருந்தது.

கிறித்தவ சபைகள் சண்டையிடுவதை இவன் வேடிக்கை மட்டும் பார்த்தான்.இவனுக்கு முந்தைய மன்னர்களை போன்ற அல்லாமல் இவன் அவற்றில் தலையிடவில்லை.நடுவர் என்று எவரும் இல்லாமல் சண்டையிட்டுக் கொள்ள அனுமதித்தான்.இதன் நோக்கம் அவர்களாகவே தங்களுடைய அழிவை தேடிக் கொள்வது ஆகும்.இதிலிருந்து ஒரு செய்தியை நாம் அறிந்து கொள்ள வேண்டும்.கிறித்தவம் எந்த அளவிற்கு தங்களுடைய பிரச்சினைகளுக்காக மன்னர்களை நம்பியிருந்தது என்பதுதான்.எந்த அளவிற்கு மன்னர்களும் சபைகளுக்குள் முடிவெடுக்கும் அதிகாரத்தை பெற்றிருந்தனர் என்பதையும் கூட நாம் அறிந்து கொள்ள வேண்டும்.இப்பொழுது மன்னன் ஜூலியன் கிறித்தவர்களை வெறுத்தது மட்டுமன்றி "தீர்ப்பதற்கு யாருமின்றி அவர்களாகவே சண்டையிட்டு அழிந்து கொள்ள" அனுமதித்தான்.இது ஒரு தந்திரமான செயல்தான் என்பதில் சந்தேகம் இல்லை.

இவன் கிறித்தவர்களுக்கு எதிராக கலகங்களையும் அனுமதித்தான்.அப்படி ஒன்றில் அலெக்ஸாண்ட்ரியாவின் புது பிஷப் ஜார்ஜ்(George) கொல்லப்பட்டார்.கொல்லப்பட்ட இவருக்கும் முன்னிருந்த பிஷப் அதனாசியசுக்கும்(Athanasius) இடையே வெறுப்பு இருந்தது.உண்மையில் அதனாசியஸின் ஆதரவாளர்களே இவரைக் கொன்றனர் என்றும் கூறுகின்றனர்.எது உண்மை என்று தெரியவில்லை.இந்நிலையில் எதிர்பாராத ஒரு சம்பவம் நடைபெற்றது.

கி.பி.363-ல் நடைபெற்ற ஒரு போரில் மன்னன் ஜூலியன் கொல்லப்பட்டான்.இவனுடைய இறப்பு கிறித்தவர்களுக்கு பெரும் மகிழ்ச்சியை அளித்தது,குறிப்பாக அதனாசியசுக்கு.அதனாசியஸ் இச்சூழ்நிலையை தனக்கு சாதகமாக பயன்படுத்தினார்.ஏற்கனவே தன்னுடைய எதிரி ஜார்ஜ்(George) கொல்லப்பட்டதால் இப்பொழுது தனக்கு போட்டியாளர்கள் இல்லை என்ற நிலை இவருக்கு பெரும் சாதகமான சூழ்நிலையை ஏற்படுத்தியது.ஹோமோன்ஸ்-ம் (Homoeans) இப்பொழுது சிதறிப்போயிருந்தனர்.குழப்பங்களும் நீடித்தது.

இப்பொழுதும் கூட அமைதியை ஏற்படுத்துவதற்கென்று ஒரு பிரிவு தோன்றியது.இவர்களை "Semi-Arians" என்று அழைத்தனர். "Homoousios" என்ற வார்த்தையில் இவர்கள்(Semi-Arians) ஒரு சிறு மாற்றத்தை ஏற்படுத்தினார்.இவர்கள் பயன்படுத்திய வார்த்தை "Homoiousios" ஆகும்.ஒரு எழுத்து மட்டுமே சேர்க்கப்பட்டிருக்கிறது.ஆனால் பொருள் மாறிவிட்டது.இவர்கள் கூறியது என்னவென்றால்,"The Son and The Father are not same in essence but similer in essence",ஆகும்.தமிழில் இதனை பின்வருமாறு கூறலாம்,

தந்தையும் மகனும் ஒரே பொருளால் (Same) ஆக்கப்பட்டவர்கள் அல்ல, பதிலாக "ஒரே மாதிரியான(Smiler)" பொருளால் ஆக்கப்பட்டிருக்கிறார்கள்.

ஒரு எழுத்துதான் மாறியுள்ளது,ஆனால் பொருள் மாறிவிட்டது.இரண்டு பிரிவுகளுக்கும் ஏற்புடையதாக இருக்குமாறு இந்த வார்த்தை இருந்தது.ஆனாலும் ஒரு முழு உடன்பாடு இன்னும் எட்டப்படவில்லை.அதனாசியஸ் இன்னும் "Homoousios"-ஐ விட்டுக் கொடுக்கவில்லை.சிறிது மாறுதல் ஏற்பட்டிருந்தாலும் முழு மாற்றம் ஏற்படவில்லை.

ஏரியன்ஸ்(Arians)-ன் தோல்வி கி.பி.378-ல் நிகழ்ந்தது.அது வரையில் சபைகளுக்கிடையே கருத்து மோதல்கள் நடைபெற்றுக் கொண்டுதான் இருந்தது. கி.பி.381-ல் மன்னன் Theodosius-I (தியோடோஸியஸ்-I) பிஷப்புக்களின் கூட்டத்தை(Council of Bishops) கான்ஸ்டான்டிநோபிளில் கூட்டினான்.தற்போதைய மன்னன் தியோடோஸியஸ்-I ஏரியன்ஸ்-ஐ வெறுத்தான்.கான்ஸ்டான்டிநோபிளில் வைத்து பிஷப்புக்களின் கூட்டம் நடைபெறுவது இதுதான் முதல் முறை.இதே வருடத்தில் உரோமுக்கு பக்கத்தில் இருக்கும் அக்கிலா(Aaquileia) என்ற இடத்தில் மேற்கு பகுதியின் பிஷப்புக்களின் கூட்டம் ஒன்று நடைபெற்றது.இங்கு "Homoeans" கருத்துக்கள் முற்றிலும் தடை செய்யப் பட்டன.

தற்பொழுது கான்ஸ்டான்டிநோபிளில் வரலாற்று முக்கியத்துவம் வாய்ந்த கூட்டம் நடைபெறுகிறது. கான்ஸ்டான்டிநோபிள் எங்கிருக்கிறது என்று காட்டுவதற்காகவே பக்கத்தில் உள்ள படம்.உரோம பேரரசின் மேற்கு பகுதி மற்றும் கிழக்குப் பகுதிகள் மட்டுமல்ல விளிம்புகளில் இருந்த அர்மேனியன்ஸ்(Aarmenians),சிரியன்ஸ் (Syrians) போன்றோரும் இக்கூட்டத்தின் முடிவுகளை ஒருமனதாக ஏற்றுக்கொண்டனர்.உரோம பேரரசின் சபைகளில் அப்பம் பிடிக்கப்படும் நிகழ்வின் பொது இக்கூட்டத்தில் எடுக்கப்பட்ட முடிவுகளையே வசனித்து அனைவரும் கூறுவர்.இக்கூட்டத்தின் முடிவுகளையே இன்று வரையில் "நைசீன் முடிவுகள்(Creed of Nicene)" என்று தவறுதலாக வழங்கப்பட்டு வருகிறது.கான்ஸ்டான்டிநோபிள் முடிவுகள் கூறுவது என்னவென்றால்,

திரித்துவத்தில்(Trinity),கடவுளின் மகனாகிய இயேசு கிறிஸ்து  என்பவர் "உருவாக்கப்பட்டவர்(Created)" அல்ல,அவர் கடவுளுக்கு இனையானவர்.

மற்ற கருத்துக்கள் அனைத்தும் தடை செய்யப்பட்டன. கான்ஸ்டான்டிநோபிளில் எடுக்கப்பட்ட முடிவுகளே கிறித்தவத்தை இனிமேல் ஆளும் கருத்து ஆகும். உரோம பேரரசின் முடிவாகவே இக்கூட்டத்தின் முடிவுகள் அமைந்தது.திரித்துவம் என்ற ஒன்றுக்குள் மூவர் உள்ளனர்.அவர்கள் அனைவரும் ஒருவருக்கொருவர் இனையானவர்கள்,யாரும் யாருக்கும் தாழ்ந்தவர்கள் அல்ல,என்பதே முடிவான கருத்து.

ஒருவழியாக சர்ச்சைகள் முடிவுக்கு வந்தன.திரித்துவம் பற்றிய குழப்பங்கள் தற்காலிகமாக தீர்ந்தன.ஆனால் கேள்விகள் பல எழுவதை யாராலும் தடுக்க முடியவில்லை.இந்த நைசீன் முடிவுகளை பக்கத்தில் உள்ள படத்தில் பார்க்கலாம்.தங்களுடைய கருத்துக்கள் ஏற்கப்படவில்லை என்ற ஆதங்கத்தில் ஏரின்ஸ்(Arians) இருந்தாலும் இப்பொழுது அவர்களால் ஒன்றும் செய்ய முடிய வில்லை.இயேசுவும், தந்தையும் ஒருவருக்கொருவர் இனையானவர்கள் என்று ஒப்புக்கொண்டவர்களில் சிலர் வேறு ஒரு புது குழப்பத்திற்கு வழிவகுத்தனர்.இயேசுவும் தந்தையும் இணையானவர்கள் ஆனால் தூய ஆவி இவர்களுக்கு இனையானவர்  அல்ல, என்று வாதிட்ட ஒரு சிலர் தோன்றியிருந்தனர்.அவர்களையும் கூட கான்ஸ்டான்டிநோபிளில் நடைபெற்ற கூட்டம் தடை செய்தது.தந்தைக்கும் மகனுக்கும் இடையேயான வேறுபாடுகளை களைந்த இக்கூட்டம் தங்கள் விவாதங்களை தூய ஆவிக்கு விரிவுபடுத்த வில்லை.அதைப்பற்றி அக்கூட்டம் விவாதிக்கவே இல்லை.

இரா.இருதயராஜ்.

திரித்துவத்தின்(Trinity) சுருக்கமான வரலாறு - பாகம் 5

திரித்துவத்தின்(Trinity) சுருக்கமான வரலாறு - பாகம் 5

இவ்வாறு "மகனான" இயேசுவை கடவுளுக்கு இனையாக்கும் முயற்சி வெற்றிகரமாக நிறைவேற்றப் பட்டது.இதை எதிர்த்த ஏரிஸ்(Arius) ஏறத்தாழ கிறித்தவத்திலிருந்து ஒதுக்கி வைக்கப்பட்டார். இவை அனைத்தும் நைசியா(Nicaea) நகரத்தில் வைத்து தீர்க்கப்பட்டன. "தந்தையாகிய" கடவுள் எவற்றால் ஆக்கப்பட்டிருக்கிறாரோ அவற்றாலேயே மகனாகிய இயேசுவும் ஆக்கப்பட்டிருக்கிறார் என்று ஒருவழியாக முடிவெடுக்கப்பட்டாயிற்று.எனவே மகனும் தந்தையும் இனையானவர்கள்தான்.ஒருவர் மற்றவருக்கு உயர்ந்தவரும் அல்ல தாழ்ந்தவரும் அல்ல.முடிவாக இயேசுவுக்கு கடவுள் தன்மை உண்டு என தீர்க்கப்பட்டது.

ஒரு மத ஆசிரியராக இருந்த ஏரிஸ் சுயமான,சிந்தித்து முடிவெடுக்கும் போக்கை கொண்டிருந்தார்.ஆனால் இப்பொழுதோ பிஷப்புக்கள் அதிகாரம் செலுத்த ஆரம்பித்திருந்தனர்.அவர்களை எதிர்த்து செயல் பட முடியாத சூழல் உருவாகியிருந்தது.ஒரு அரசுக்கு இனையான மற்றொரு அரசு போல் சபைகள் செயல்பட ஆரம்பித்தன.பிஷப்புக்கள் மன்னனைப் போல் செயல் பட்டனர்.அதிகாரம் அவர்களிடத்தில் குவிந்தது.

நைசியா கூட்டத்திற்கு பின் "Homoousios(ஒன்று போல்,ஒரே பொருளால் ஆனது ,...)" என்ற வார்த்தை கவனம் பெற்றது.இது கிரேக்க வார்த்தை ஆகும்.மகனும் தந்தையும் ஒருவருக்கொருவர் இனையானவர்கள் என்பதற்கும், இருவரும் பொதுவான ஒன்றையே கொண்டுள்ளனர் என்றும் பொருள் தரும்.இதைக் குறிப்பதற்குத்தான் Homoousios என்ற வார்த்தை பயன்படுத்தப்பட்டது.ஏரிஸ்-ஐ எதிர்ப்பதற்காக அனைத்து பிஷப்புக்களும் இனைந்து இவ்வார்த்தை கூறும் பொருளை ஏற்றுக் கொண்டனர்.ஆனால் இவ்வார்த்தையில் ஒரு ஆபத்து மறைந்திருந்ததை பின்னர் கண்டுபிடித்தனர்.இதற்கு பின்னால் ஒரு கதையும் உள்ளது.திருமறையில்(The Bible) இவ்வார்த்தை கிடையாது என்பதையே முதலில் எவரும் தெரிந்து கொள்ள வேண்டும்.

உண்மையில் இவ்வார்த்தை ஆரம்ப கால கிறித்தவர்களால் வெறுக்கப்பட்ட ஒன்றாகும்.எப்படி என்பதை நாம் தெரிந்து கொள்ள,"மணிக்கேன்ஸ்(Manichaeans)" என்ற ஒரு அமைப்பை பற்றி நாம் தெரிந்து கொள்ள வேண்டும்.கி.பி.277-களில்  இந்த அமைப்பு கிறித்தவத்திற்கு கடும் போட்டியாக இருந்தது.கிறித்தவம் எப்படி பரவியது அவ்வாறு இந்த அமைப்பும் பரவியது.இதை தோற்றுவித்தவர் "மணி(Mani)" என்பவர் ஆவார்.இவர் ஈரானை சேர்ந்தவர்.

கிறித்தவர்களால் பெரிதும் போற்றப்படும் அகஸ்டின்(Augustine) இந்த அமைப்பில் 10 வருடங்கள் இருந்துள்ளார் என்பது கவனிக்க வேண்டிய தகவல் ஆகும்.இயேசுவின் "இயல்பை(Nature ) பற்றி இந்த மணிக்கேன்ஸ் குறிப்பிடும் பொழுது பயன்படுத்திய வார்த்தைதான் இந்த "Homoousios".அக்கால கட்டத்தில் கிறித்தவத்திற்கும் மணிக்கேன்ஸ்க்கும் இடையே கடும் விரோதம் நிலவியது.இப்பொழுது ஏரிஸ் இதனை சுட்டிக்காட்டினார்."எந்த மணிக்கேன்ஸ்-ஐ  வெறுத்தீர்களோ அந்த மணிக்கேன்ஸ்-டன் தொடர்புடைய வார்த்தையைத்தானே இப்பொழுது பயன்படுத்தி இருக்கிறீர்கள்" என்று கேள்வி எழுப்பினார்.இக்கேள்வி தீயாய் பரவியது.நைசியாவில் இவ்வார்த்தையைக் கொண்டு எடுத்த முடிவு பெரும் குழப்பத்தை விளைவித்தது.அடுத்து வந்த 50 ஆண்டுகள் சபைகளுக்கு பெரும் தலைவலியை இவ்வார்த்தை உண்டாக்கியது.முடிவாக இவ்வார்த்தையை பிஷப்புக்கள் பயன்படுத்துவதை தவிர்க்க ஆரம்பித்தனர்.மறுபடியும் சபைகள் சண்டையிட்டு கொள்ள ஆரம்பித்தன.

நைசியாவில் ஏற்பட்ட தோல்வியின் காரணமாக காயம்பட்டிருந்த,எரிஸுக்கு ஆதரவாக இருந்த நிகாமிடிசின் பிஷப் யூசிபிஸ் மற்றும் அவரது ஆதரவாளர்கள் மன்னன் கான்ஸ்டான்டினுக்கு இதைப்பற்றிய தகவல்களை கொடுக்க ஆரம்பித்தனர்.ஆரம்பத்தில் இவர் மீது வெறுப்பு கொண்டிருந்த மன்னன் பின்னர் அவருடைய கோரிக்கைகளுக்கு செவி கொடுக்க ஆரம்பித்தான்.அதற்கும் காரணம் இருந்தது.அந்தியோகியா(Antioch ) சபையின் பிஷப் யூஸ்தாதிஸ்(Eustathius) என்பவருடைய ஒழுங்கீனங்களை வெளிப்படுத்தியத்தின் காரணமாக  மன்னன் நிகாமெடியாவின் பிஷப்புக்கு செவிகொடுக்க ஆரம்பித்தான்.இந்த உஸ்தாதிஸ்(Eustathius) நைசியாவின் ஓட்டெடுப்பில் ஏரிஸ் தோற்க முக்கிய காரணமாக அமைந்தவர் ஆவார்.மன்னரின் தற்போதைய ஆதரவு நிலையை  பயன்படுத்தி தன்னுடைய எதிரிகளுக்கு தொல்லை கொடுக்க ஆரம்பித்தார்.நிறைய எதிரிகளையும் உருவாக்கிக் கொண்டார்.இதில் முக்கியமானவர் அலெக்ஸாண்ட்ரியா சபையின் பிஷப் அதனாசியஸ்(Athanasius) ஆவார்.நைசியாவில் எடுக்கப்பட்ட முடிவுகளை காப்பாற்ற இவர் தீவிரமாக இருந்தார்.ஆனால் "Homoousios" வார்த்தையை மட்டும் கவனமாக தவிர்த்தார்.ஏரிஸ்-ஐ கடைபிடித்தவர்களை "Arians" என்று முதன் முதலாக அழைத்தது இவர்தான். ஒரு கட்டத்தில் தன்னை எதிர்த்தவர்கள் அனைவரையும் "arians " என்றே அழைத்தார்.

அதனாசியஸ்-ஐ எதிர்த்தவர்கள் இப்பொழுது ஏரியன்ஸ்( Arians ) பட்டத்தை பெருமையுடன் ஏற்றுக்கொண்டனர்.இந்த ஏரியன்ஸ் ஒரு படி மேலே சென்று "இயேசுவும்(மகனும்),தந்தையும் ஒன்றுபோலானவர்கள் கிடையாது (Unlike),இருவரும் வெவ்வேறானவர்கள்" என்றனர்.இதனை கிரேக்க மொழியில் "Anomoeans" என்றும் லத்தீன் மொழியில் "Dissimilarians" என்றும் அழைத்தனர்.அதாவது தந்தையும் மகனும் "அனோமோன்ஸ் (Anomoeans)".

இந்நிலையில் சண்டையிடும் சபைகளை ஒருங்கிணைப்பதற்காக ஒரு குழு தோன்றியது.இவர்கள் ஒரு குறிப்பிட்ட முடிவை எடுத்தனர்.இரு குழுக்களுக்கும் பாதிப்புக்கள் ஏற்படாதவாறு ஒரு நிலைப்பாட்டை எடுத்தனர்.இவர்கள் "Homoeans (ஹோமோன்ஸ்)" என்று அழைக்கப்பட்டனர்.இவ்வாறு அழைக்கப்படுவதற்கு இவர்களின் நிலைப்பாடே  காரணம்.சண்டைக்கு காரணமே "தந்தை எதனால் ஆக்கப்பட்டிருக்கிறாரோ அதனாலேயே மகனும் ஆக்கப்பட்டிருக்கிறார்,எனவே தந்தையும் மகனும் இனையானவர்கள்" என்ற கருத்துதான்.இதற்கு இடையில் இவர்கள் நின்று கொண்டார்கள்.வார்த்தைகளை சற்று மாற்றி "மகன் தந்தையை போன்றே இருக்கிறார்,அதாவது "The Son is Like The Father" என்று மட்டும் கூறினார்கள்.Homoeans என்ற வார்த்தை கிரேக்க வார்த்தையான Homoios என்ற கிரேக்க வார்த்தையிலிருந்து வந்தது.இருவரும் ஒரே பொருளால் ஆக்கப்பட்டிருக்கிறார்கள் என்று கூற வில்லை.அதாவது இருவரும் "இனையானவர்கள்" என்று கூறுவதற்கு பதிலாக "மகன் தந்தையைப் போலானவர்" என்று மட்டும் கூறினார்கள்.

இந்த நிலைமையில் மன்னன் கான்ஸ்டாண்டின் இறந்து போன பிறகு உரோம பேரரசு மறுபடியும் உள்நாட்டு குழப்பங்களால் பிரிந்தது.மன்னன் கான்ஸ்டேடியஸ் II (Constantius II) மறுபடியும் பேரரசை ஒன்றிணைத்தான்.பேரரசின் மன்னனாக இவனே இருந்தான். Homoeans (ஹோமோன்ஸ்) இவனுடைய ஆதரவைப் பெற்றனர்.பேரரசை ஒன்றிணைத்த பிறகு சபைகளை ஒன்றினைக்க முயற்சிகள் எடுத்தான்.தன் பேரரசின் மேற்குப்பகுதி (உரோம்) மற்றும் கிழக்குப்பகுதி (கான்ஸ்டான்டிநோபிள்) பிஷப்புகளை கூட்டினான்(Council of Bishops).Homoeans (ஹோமோன்ஸ்)-ன் கருத்துக்களை ஏற்றுக்கொள்ளுமாறு "அறிவுறுத்தினான்".இது நடந்தது கி.பி.359-ல்.நடந்த இடம் "Ariminum(அறிமினும்)" ஆகும்.ஆனால் இந்த அறிமினும் கூட்ட முடிவுகளும் சபைகளை ஒன்றிணைக்க முடியவில்லை.ஏரியன்ஸின்(Arians) கருத்துக்களையே "அறிமினும் கூட்டம்" ஆதரிப்பதாக கூறி அதனை ஏற்றுக்கொள்ள மறுத்தனர்.பிஷப்புக்கள் மன்னனுக்கு பயந்து கையெழுத்திட்டாலும் "அறிவுறுத்தப்பட்ட ஹோமோன்ஸ்(Homoeans) கருத்துக்கள்" மனதளவில் ஏற்றுக்கொள்ளப்படவில்லை.

இந்நிலையில் மன்னன் கான்ஸ்டான்டியஸ்-II தனது நாற்பதுகளில் இறந்து விட்டான்.ஒருவேளை இம்மன்னன் இறந்து போயிருக்காவிட்டால் இன்றய கிறித்தவம் திரித்துவத்தை கடைபிடித்திருக்க வாய்ப்பில்லை.இவனுக்கு பிறகு இவனுடைய உறவினன் "ஜூலியன்(Julian)" பேரரசின் மன்னனாக முடிசூட்டிக் கொண்டான்.அரசின் ஆதரவைப் பெற்றிருந்த கிறித்தவம் திடீரென ஒரு ஆபத்தை "ஜூலியன்" வடிவில் சந்தித்தது.கிறித்தவம் தடைசெய்யப்பட்டதாக அறிவிக்கப்பட்டது.சபைகள் அதிர்ந்தன.

இரா.இருதயராஜ் 

திரித்துவத்தின்(Trinity) சுருக்கமான வரலாறு - பாகம் 4

திரித்துவத்தின்(Trinity) சுருக்கமான வரலாறு - -பாகம் 4

ஏன்சிரா(Ancyra)-வில் நடைபெற இருந்த பிஷப்புக்களின் ஆலோசனைக் கூட்டம் தடைபட்டவுடன் மன்னன் கான்ஸ்டான்டின் அடுத்த கூட்டத்தை கூட்ட முடிவு செய்கிறான். நைசியா(Nicaea) என்ற நகரம் இதற்காக தேர்ந்தெடுக்கப்படுகிறது.இந்நகரம் நிகாமெடியா(Nicomedia)வுக்கு பக்கத்திலேயே இருக்கிறது. தற்போதைய துருக்கியின் இஸ்னிக்(Iznik) நகரம்தான் இந்த நைசியா.நதிக்கரை ஓரம் அமைந்திருக்கும் இந்நகரம் மிகவும் அழகான ஒன்றாகும்.தற்போதும் கூட பழைய உரோம் ஆட்சியின் கோட்டைகள் உள்ளன. நிகாமெடியா நகரம் உரோம் ஆட்சியின் கிழக்குப்பகுதி (Administrative Headquarters)  தலைநகரமாக இருந்தது.ஆலோசனைக் கூட்டத்திற்கு வருபவர்கள் இந்நகரத்தின் அருமையான பருவநிலையை அனுபவிக்கலாம் என்று கான்ஸ்டான்டின் அறிவித்தான்.இம்முறை எதுவும் தவறாக நடந்துவிடக்கூடாது என்பதில் மிகக்கவனமாக இருந்தான்.நடக்க இருக்கும் கூட்டத்தில் தானும் பங்கெடுத்து விவாதங்களிலும் கலந்து கொள்ளும் வாய்ப்பு இருப்பதாகவும் அறிவித்தான்.கிறித்தவத்தின் நீண்ட வரலாற்றில் இது முதல்முறையாக நடந்தது.எந்த பேரரசால் கிறித்தவர்கள் கடும் துன்பத்திற்கு ஆளாக்கப்பட்டார்களோ அப்பேரரசின் மன்னன் ஒருவன் தற்போது அவர்கள் தொடர்புடைய கூட்டத்தில் பங்கெடுப்பது என்பது மிக முக்கியமான ஒரு நிகழ்வு ஆகும்.பேரரசின் ஆட்சி அதிகாரங்களில் கிறித்தவம் அங்கீகரிக்கப்பட்டு விட்டது என்பதற்கு அடையாளமே இது.மேலும் சிறிது சிறிதாக கிறித்தவம் ஆட்சி அதிகாரங்களில் தலையிட்டு பின்னர் கைவசப்படுத்தியதற்கு முதல் அடி இங்கேதான் எடுத்துவைக்கப்பட்டது.

கூட்டத்திற்கு தலைமை தங்கியதே கான்ஸ்டான்டின்தான் என்றும் சிலர் கூறுகின்றனர்.கிறித்தவம் பற்றிய கருத்துக்களில் கான்ஸ்டான்டினுக்கு ஆலோசகராக இருக்கும் ஸ்பானிய பிஷப் ஓசியஸ்(Hosius) அல்லது கோர்டோபாவின் ஓசியஸ்(Ossius of Cordova) ஒரு புதிய கருத்தை முன்மொழிந்தார்.கிறித்தவ நம்பிக்கையில்(Christian Creed) இது புத்தம் புதிய கருத்தாகும்.அனைவராலும் இது ஏற்றுக்கொள்ளப்பட்டு கிறித்தவத்தின் "விதிமுறைகளில் ஒன்றாக(A Clause in Christian Creed)" மாற்றப்பட்டது.இவர் முன்மொழிந்த கருத்து "தந்தை எப்படி இருக்கிறாரோ அப்படியே மகனும் இருக்கிறார்".

இதை படிப்பவர்களுக்கு புரியவேண்டும் என்பதற்காக நாம் சில வார்த்தைகளை பயன்படுத்த வேண்டியுள்ளது.இவ்வார்த்தைகள் கடவுளுக்கு பொருந்தாது எனினும் புரிதலுக்காக பயன்படுத்தி உள்ளோம்.ஸ்பானிய பிஷப் ஓசியஸ்(Hosius) முன்மொழிந்த கருத்து என்னவென்றால் "தந்தை எதனால் ஆக்கப்பட்டிருக்கிறாரோ அதனாலேயே மகனும் ஆக்கப்பட்டிருக்கிறார்".ஆங்கிலத்தில்,"The Son was of One Substance with The Father" என்று கூறலாம்.இதன் பொருள்,"தந்தையும் மகனும் வெவ்வேறு ஆட்கள் அல்ல,இருவரும் சம அளவு அதிகாரங்கள் உடையவர்கள்,சம அளவு மதிக்கப்படவேண்டியவர்கள்" என்பதே ஆகும்.கிரேக்கத்தில் இதற்காக பயன்படுத்திய வார்த்தை "Homoousius" ஆகும்."Of One Substance" என்பதற்கு உரிய கிரேக்க வார்த்தை "Homoousius" ஆகும்.இருவரும்,அதாவது தந்தையும் மகனும் ஒரே விதமான பொருளால் ஆக்கப்பட்டிருக்கிறார்கள் என்பது ஆகும்.இது கிறித்தவத்திற்கு புதியது ஆகும்.கூட்டத்தின் முடிவில் "அனைவராலும் ஏற்றுக்கொள்ளப்பட்ட" கருத்தாக இது அமைந்தது.மன்னன் கான்ஸ்டான்டின் இன்னும் ஒரு கிறித்தவனாக மாற வில்லை என்பதை நாம் கருத்தில் கொள்ள வேண்டும்.கிறித்தவனாக இல்லாத நிலையில் கிறித்தவ கூட்டத்திற்கு தலைமை ஏற்று நடத்தினான்.

பேரரசின் மன்னரே கூட்டத்தில் கலந்து கொண்டிருக்கிறார்,அவரின் ஆலோசகர் கருத்து ஒன்றை முன் மொழிந்திருக்கிறார்,ஏற்றுக்கொள்ளாமல் யாரும் இருப்பார்களா?அனைவரும் ஒருமனதாக ஏற்றுக்கொண்டனர்.இக்கூட்டத்தின் முடிவை இரு பிஷப்புக்கள் மட்டும் ஏற்றுக்கொள்ளவில்லை என்று பதியப்பட்டிருக்கிறது."தந்தையும் மகனும் ஒன்று" என்ற கருத்து புதிதாக அறிமுகப்படுத்தப்பட்டு,மன்னனின் ஆதரவோடு கிறித்தவத்திற்குள் இக்கருத்து இப்பொழுது நுழைந்திருக்கிறது.உரோம பேரரசின் அங்கீகாரமும் கிடைத்து விட்டது.ஆனால் பழைய ஏற்பாடு அல்லது புதிய ஏற்பாடு என்று இரண்டிலும் எங்கும் இக்கருத்து இல்லை.

இக்கூட்டத்தில் மேலும் பல பிரச்சினைகள் விவாதிக்கப் பட்டன. பிஷப்புக்கள் மற்றும் பிஷப்புக்களின் கீழ் இருக்கும் போதகர்கள் வட்டிக்கு கடன் கொடுப்பது(Money Lendin),மதம் மாறிய சிறிது காலத்திற்குள் அவசரமாக பதவி உயர்வு கொடுப்பது(Hasty Promotions in Episcopy),முரண்பட்ட கருத்துக்களால் பிரிந்து சென்றவர்களை(Schismatics) மறுபடியும் இனைத்துக் கொள்வது போன்ற செயல்கள் தடை செய்யப்பட்டன.தானாக முன்வந்து "ஆண்மையை நீக்கிக் கொண்டவர்களை" போதகர்களாக ஆக்குவது தடை செய்யப் பட்டது.

மன்னன் கான்ஸ்டான்டின் இக்கூட்டத்திற்காக காட்டிய அக்கறை பெரும் அளவில் பங்கேற்பாளர்களை கொண்டு வந்தது.அக்கறை என்பதைவிட,தன் பேரரசின் ஒற்றுமைக்கு "சபை சண்டைகள்" இடறலாக இருப்பதை கண்டு அதை ஒழிக்க முடிவு செய்ததின் வெளிப்பாடே மன்னன் காட்டிய அக்கறை.பிரச்சினைகளை முடிவுக்கு கொண்டு வர மன்னன் "தீவிரம்" காட்டினான்.மொத்தம் 318 பேர் கந்து கொண்டனர்.பேரரசின் அனைத்துப்பகுதிகளிலும் இருந்து பங்கேற்பாளர்கள் வந்திருந்தனர்.இதற்கு முன்னர் இவ்வளவு பேர் ஆலோசனைக்கு கூட்டத்திற்கு கூடியதில்லை.

கிறித்தவ வரலாற்றில் இது ஒரு மைல் கல் ஆகும்.இது "பொதுக் கூட்டம்"(General Council) என்று அழைக்கப்படுவதற்கு அனைத்து தகுதிகளையும் பெற்றிருந்தது.ஆனால் 1200 வருடங்களுக்கு பின் இந்த நைசியாவில் எடுக்கப்பட்ட முடிவுகள் விவாதிக்கப்பட்டன.அதைப்பற்றி வேறொரு கட்டுரையில் பார்க்கலாம்.இக்கூட்டத்திற்கு பின்னர் ஏரிஸ்(Arius) பொது வாழ்க்கையில் இருந்து விலகினார்.மன்னன் கான்ஸ்டான்டினால் மன்னிப்பு வழங்கப்பட்டிருந்தும் இவர் தனிமையில் இருந்தார்.கான்ஸ்டான்டிநோபிள் நகரத்தில் வயிற்றுப்போக்கினால்  கழிவறையில் வைத்து இறந்துவிட்டதாக வரலாறு கூறுகிறது.

திரித்துவத்திற்கான அடிக்கல் இங்குதான் நாட்டப்பட்டது.பிரச்சினைகளும் குழப்பங்களும்,அதிகார போட்டிகளும் இக்கூட்டத்திற்கு பின்னர் முடிவுக்கு வந்ததா என்றால் இல்லை.இதைப்பற்றி அடுத்ததாக கட்டுரையில் பார்க்கலாம்.

Ref:http://www.documentacatholicaomnia.eu/03d/0325-1965,_Concilia_Oecumenica,_Documenta_Omnia,_EN.pdf

இரா.இருதயராஜ்.